21, జులై 2017, శుక్రవారం

అయ్యో.. అమెరికా ఇలా ఉందేమిటి?

‘‘విమానం న్యూయార్క్ ఎయిర్‌పోర్టులో ల్యాండ్ అవుతోంది. సీటు బెల్టు పెట్టుకోమని అనౌన్స్ చేస్తుంటే మీరెంటి సీటుకిందకు దూరారు?’’
‘‘నాకన్నా నీకు ఎక్కువ తెలుసా? ఏడవ తరగతి నుంచే క్లాస్‌బుక్స్‌లో మధుబాబు షాడో డిటెక్టివ్ బుక్స్ చదివామిక్కడ. శత్రువు ఎలాదాడి చేస్తాడో? క్షణంలో ఎనిమిదవ వంతు సమయంలో తప్పించుకోవడం, అర నిమిషంలో 12వ వంతు సమయంలో ఎదురుదాడి ఎలా చేయాలో, నిమిషంలో 14వ వంతు సమయంలో పిడిగుద్దులతో ప్రత్యర్థిని ఎలా మట్టి కరిపించాలో చిన్నప్పుడే చదివాను.’’
‘‘ఎవరైనా దాడిచేస్తే కాలిక్యులేటర్‌లో ఈ లెక్కలు చూసుకుంటారా? ఈ లోపు వాడు మిమ్ములను చితగ్గొట్టి పోతాడు కదా?’’
‘‘నా మీదే సెటైరా? మనసులోనే లెక్కలు వేసుకుంటాం. నువ్వు కూడా సీటు కిందకు దూరు’’
‘‘అది సరే.. విమానం ల్యాండ్ కావడానికి, షాడోకు, సీటు కింద దూరడానికి సంబంధం ఏమిటి?’’
‘‘వయసులో నీకన్నా ఫైవ్ ఇయర్స్ సీనియర్‌ని. 15 ఏళ్ళ నుంచి తెలుగు న్యూస్ చానల్స్ చూస్తూ పెరిగిన బుర్ర ఇది. అమెరికా ఎలా ఉందో మన చానల్స్‌లో రోజూ చూపించారు. న్యూస్ చానల్స్ చూడమంటే హారర్ మూవీస్, హారర్ న్యూస్ నచ్చవుఅని సీరియల్స్ మాత్రమే చూస్తే ఏం తెలుస్తుంది?’’
‘‘మీరు చెప్పారని వాడెవడో అర్నబ్ అని టీవీ నుంచి బయటకు వచ్చి 3డి ఎఫెక్ట్‌లో భయపెడుతున్నట్టు అనిపిస్తే భయం వేసి మళ్లీ చూసే సాహసం చేయలేదు.’’
‘‘మరదే..! అన్నప్రాసన నాడే అర్నబ్ వార్తలు చూస్తే ఎలా? కళ్ళు తెరవగానే రాంగోపాల్‌వర్మ సినిమాలు చూసినట్టు, క్రమంగా అలవాటుపడితే విషం కూడా జీర్ణం అవుతుంది. ముందు తెలుగు న్యూస్ చానల్స్‌కు అలవాటుపడితే, అర్నబ్ కూడా జీర్ణం అవుతాడు.’’
‘‘ఇంతకూ మీరు సీటు కిందకు ఎందుకు దూరినట్టు?’’
‘‘రామాయణం అంతా విన్నాక దుర్యోధనుడికి సీత ఏమవుతుంది అని అడిగారట. నీలాంటి వారెవరో?’’
‘‘రాముడికి సీత ఏమవుతుంది? అని అనాలి.’’
‘‘ఈ తెలివికేమీ తక్కువ లేదు. రాముడు, కృష్ణుడు, దుర్యోధనుడు అంటే ఎన్టీఆరే కదా? సీత అంటే అంజలీదేవి, గీతాంజలి, జయప్రద నుంచి నయనతార వరకు ఎవరైనా కావచ్చు.. అదన్నమాట విషయం.’’
‘‘మరి సీటు కిందకు?’’
‘‘అదే చెబుతున్నా.. అమెరికా పరిణామాలపై మన న్యూస్ చానల్స్ చూడకపోవడం వల్ల నువ్వు చాలా అజ్ఞానంలో ఉండిపోయావు. శబ్దం వినిపిస్తుంది కదా! అది విమానం ల్యాండింగ్ శబ్దం అనుకుంటున్నావు కదూ! కాదు. తూటాల శబ్దం. అమెరికాలో తూటాలతో ఆడుకుంటారు. ఏ తూటా ఎటువైపు నుంచి వచ్చి తాకుతుందో తెలియదు. న్యూస్ చానల్స్ వల్లనే నాకీ విషయాలు తెలిశాయి. వడియాలు లేనిదే మనం అన్నం తిననట్టు వారికి లంచ్‌లో తూటాలు తప్పనిసరి ఆట. యాంకర్ అందాన్ని చూస్తున్నావా? వార్తలు చూస్తున్నావా? అని నువ్వోసారి అ పార్థం చేసుకున్నావు గుర్తుందా? ఆ న్యూస్ యాంకర్ చెప్పింది ఈ విషయాలు వార్తల్లో. అంత అందంగా ఉన్న అమ్మాయి అబద్ధాలు చెబుతుందా?’’
‘‘అదా విషయం. పోకిరి లాంటి సూపర్ హిట్ సినిమాలు తీసిన తన తండ్రికి డ్రగ్స్‌తో సంబంధం ఉందంటే నమ్మే ప్రసక్తేలేదు అంటోంది పూరీ జగన్నాథ్ కూతురు. ఫ్లాప్ సినిమాలు తీసిన డైరెక్టర్లు, హీరోలకు డ్రగ్స్‌తో సంబంధం అంటే నమ్మవచ్చు కానీ హిట్ సినిమాల వాళ్ళకు డ్రగ్స్‌తో ఆ ప్రసక్తే లేదు.’’
‘‘జోకా?’’
‘‘మీతో జోకులా.. లాడెన్ కొడుకు తన నాన్నను టెర్రరిస్ట్ అంటాడా? విజయ్ మాల్యా కుమారుడు తండ్రిది తప్పంటే నమ్ముతాడా?’’
‘‘ఏం చెబుతున్నావో అర్థం కాలేదు. వర్షపు చినుకులు పడకుండా గొడుగు ఎలాగో తూటాలు పడకుండా అమెరికాలో జాగ్రత్తగా ఉండాలి. చిన్న సౌండ్ వినిపించినా కింద కూర్చోవాలి. పారిపోవాలి.’’
‘‘అబ్బా.. అది నా తుమ్ము. అంత భయపడితే ఎలా?’’
‘‘మనం నడుస్తూ రోడ్డు దాటుతుంటే అల్లంత దూరంలో కారు ఆపాడు అంటే వాడు మనల్ని లేపేయాలని చూస్తున్న జాత్యహంకారి. కాలినడకన వచ్చే వారి కోసం అంత ఖరీదైన కారు ఆపడమా?
‘‘మీ అనుమానంతో చంపేస్తున్నారు. అమెరికాలో కాలినడక వారిని మన దేశంలోలా పనికి మాలిన వారిలా చూడరు. వారికోసం కారు ఆపాల్సిందే.’’
‘‘ఏమోయ్ కాస్త చెయ్యిగిచ్చు. నిజంగా ఇది అమెరికానేనా? గ్రాఫిక్స్‌తోనే రాజధానులను నిర్మిస్తున్నారు. దేన్నీ నమ్మేట్టుగా లేదు. హైదరాబాద్‌లోని బోలక్‌పూర్‌లో కబేళాల నుంచి ఎక్కడ చూసినా రక్తం పారినట్టు, అమెరికాలోనూ అలానే రోడ్లన్నీ రక్తంతో ఎరుపెక్కి ఉంటాయనుకున్నా. కానీ శుభ్రంగా నల్లగా తళతళలాడుతున్నాయి. టీవీల్లో చెప్పినట్టు ట్రంప్ వల్ల మన ఐటి కుర్రాళ్ళు అందరూ హాహాకారాలు చేస్తూ రోడ్లపై వరద బాధితుల్లా ఉంటారనుకున్నాను. ఎవరి పనుల్లో వారు బిజీగా ఉన్నారు.’’
‘‘మీ ఫేవరేట్ టీవీ యాంకర్ మీద ఒట్టు. మనం అమెరికాలోనే ఉన్నాం. మీపై న్యూస్ చానల్స్ ప్రభావం ఎక్కువగా ఉంది. అందుకే కళ్ళతో చూసినా నమ్మలేకపోతున్నారు. అందమైన యాంకర్ వార్తల ప్రభావం అంత త్వరగా పోదు.’’
‘‘నువ్వు మీడియా స్వేచ్ఛపై దాడి చేస్తున్నావు.’’
‘‘ఏ పార్టీ మీడియాపై?’’
‘‘అవన్నీ ఇప్పుడెందుకులే? ముందు అమెరికా చూద్దాం. అమెరికా ఏదో గొప్పగా అభివృద్ధి చెందిన దేశం అని మనం భ్రమల్లో ఉన్నాం. కానీ వీళ్ళు రాజకీయంగా చాలా వెనకబడి ఉన్నారు. వాళ్ళకు మనం ఆన్‌లైన్‌లో పొలిటికల్ క్లాసులు తీసుకోవాలి. కమర్షియల్ ఏరియా, హైవే అదీ ఇదీ అని కాదు. ఎక్కడ చూసినా అడవిలా చెట్లు కనిపిస్తున్నాయి. మనం అడవిలో కూడా చెట్లు కనిపించనంతగా అభివృద్ధి సాధిస్తే, వీళ్ళేమో వెనకబడ్డారు. చెట్లను ఇలానే వదిలేస్తే మనుషులకు చోటు మిగల్చకుండా ఆక్రమించుకుంటాయి. అమెరికా ఇప్పటికైనా మనలా మేల్కొనాలి. ఎ.సి.లతో కూల్‌సిటీల టెక్నాలజీ గురించి మనం ఆలోచిస్తుంటే, చెట్లతో చల్లదనం కోసం వేల ఏళ్ళ క్రితం నాటి పద్ధతులను అమెరికా నమ్ముకొంది.’’
‘‘ఎవరిగోల వారిది.. నయగారా చూద్దాం పద’’
‘‘ట్రంప్‌ను గెలిపించవద్దు అని మా తెలుగు మీడియా మీకు చెప్పింది ఇందుకే? అనుభవించండి. కళ్ళముందు వర్ణవివక్ష చూస్తుంటే రక్తం మరిగిపోతోంది. తెల్లవాళ్ళను వదిలేసి, నల్లవాళ్ళను ఆపేస్తున్నారు.’’
‘‘అన్నిటికీ తొందరే. టికెట్ చూపించమని ఆపుతున్నాడు. వర్ణవివక్ష కాదు. పాడు కాదు.’’
‘‘నువ్వు ఎంత చెప్పినా నమ్మబుద్ధి కావడం లేదు. ఎక్కడికి వెళ్ళినా పరిచయం లేని వాడు కూడా నవ్వుతూ పలకరిస్తాడు. నవ్వే వాణ్ణి అస్సలు నమ్మకూడదు. మన నుంచి ఏదో ఆశించకపోతే నవ్వుతూ ఎందుకు పలకరిస్తారు? మనవద్ద ఉన్న డాలర్లు లాగేసుకుందామని చూస్తున్నారేమో?’’
‘‘ఆప్యాయంగా పలకరించింది షాప్ ఓనర్ కాదు. మనలాంటి కస్టమర్లే. అలా పలకరించడం వారి సాంప్రదాయం.’’
‘‘మన న్యూస్ చానల్స్‌లో నేను చూసిన అమెరికాకు, కళ్ళతో చూస్తున్న అమెరికాకు సంబంధమే లేదు. ఇది నిజంగానే అమెరికా అంటావా? దేశంలో ఎక్కడ తిరిగినా ఒక్కడూ దాడి చేయలేదు. వైట్‌హౌస్‌కు వెళ్ళినా, వాళ్ళ క్యాపిటల్ సిటీ ఆఫీసుకు వెళ్ళినా ఒక్కరూ ఆపడం లేదు. మనం కనీసం మండల రెవెన్యూ కార్యాలయానికి వెళ్ళినా పదిమంది అడ్డుకుంటారు. ఇక్కడ ఎక్కడా ఒక్క పోలీసు కూడా అడ్డుకోలేదు.
* * *
‘‘మనం అమెరికా యాత్ర ముగించుకొని వచ్చామని స్వాగతం పలుకుతూ ఆకాశంలోకి తారాజువ్వలు విసురుతున్నారు చూశావా?’’
‘‘మీకంత సీన్ లేదు. అలా విసురుతున్న వాళ్ళు కూడా మనతోపాటు అమెరికా నుంచి తిరిగి వచ్చిన వారే ఉత్సాహంగా వాటర్ బాటెల్స్‌ను ఆకాశంలోకి విసిరేస్తున్నారు. ఖాళీ వాటర్ బాటెల్స్ కారులో నుంచి అలా విసిరి వేయడం మన ఆచారం.’’
‘‘వాళ్ళు విసిరిన బాటెల్‌ను మన బాటెల్‌తో నేను భలే కొట్టానుకదా? ఆకాశంలో.’’
‘‘్భలే కొట్టారు అంకుల్ గురి చూసి.’’
‘‘చూశావోయ్. నా గురిని ఆ కుర్రాడు కూడా మెచ్చుకుంటున్నాడు. అమెరికాలో ఉన్నన్ని రోజులు భ్రమల్లో ఉన్నట్టు అనిపించింది. జాతీయ రహదారులపై కారును ఆపి టాయ్‌లెట్స్‌గా ఉపయోగించడం చూశాక పూర్తి స్వేచ్ఛా వాయువులను పీలుస్తున్న భావన కలుగుతోంది. చట్టాలను పాటించి బతకడం కన్నా చావడం మేలు ఏమంటావోయ్. కారులో వచ్చి రోడ్డు ప్రక్కన చెత్త పారేయడం, ట్రాఫిక్ రూల్స్ పాటించకపోవడం అన్నీ చూశాక ఇప్పుడు మన దేశంలో మనం ఉన్నామని సంతోషంగా ఉంది. నువ్వేమంటావ్?’’
‘‘ గాంధీజీ సహాయ నిరాకరణ ఉద్యమం గుర్తుకొస్తోంది..’’
‘‘ఎందుకలా?’’
‘‘1920 ప్రాంతంలో గాంధీ శాసనోల్లంఘనకు పిలుపు ఇచ్చాడు. ఉద్యమం హింసాత్మకంగా మారాక మహాత్ముడు తన పిలుపును ఉపసంహరించుకున్నాడు. భారతీయులందరూ ఇప్పటికీ శాసనోల్లంఘన ఉద్యమంలోనే ఉన్నాం. ఇక్కడ చట్టాలు పాటించే వాడు పిచ్చోడు, ఉల్లంఘించే వాడు హీరో, టెర్రరిస్టులను ఆరాధిస్తాం. డ్రగ్స్‌లో మునిగిన హీరోలను పూజిస్తాం. చట్టాలు చేసేవారికి చట్టాలపై గౌరవం ఉండదు. ఎవరి కోసం చట్టాలో వారికే చట్టాలంటే పట్టదు. శాసన ఉల్లంఘన ఉద్యమానికి చరమగీతం పాడేంతవరకు ఈ దేశం ఇంతే.’’
‘‘ఏం మాట్లాడుతున్నావ్. మనింట్లో మనకు మర్యాదలేమిటి? మన చట్టాలను మనం పాటించడమేమిటి? విదేశాల్లో చట్టాలు పాటించాలి కానీ మన చట్టాలను మనం పాటించాలి అంటే విన్నవారు నవ్విపోతారు!’’
*
-బుద్దా మురళి (జనాంతికం 21. 7. 2017)

14, జులై 2017, శుక్రవారం

మనుషులంతా ఒక్కటే..!

‘‘ఈ కాలంలో ఎవరినీ నమ్మేట్టు లేదు’’
‘‘ఔను నిజం.. ఆ ముఖ్యమంత్రి యోగినో త్యాగినో దేశప్రజల వ్రత ఫలం, పుణ్యపురుషుడు అని ఎన్ని ఆశలు పెట్టుకున్నాం. ఆయనా అందరు నాయకుల్లాంటివాడే. ఆ మహిళా పోలీసు అధికారి బదిలీతో ఈ విషయం తేలిపోయింది. తప్పు చేసిన అధికార పక్షం కార్యకర్తలను ప్రశ్నించడమే ఆమె చేసిన ఘోరమైన తప్పిదమై, ఆమెను నెపాల్ సరిహద్దులకు బదిలీ అయ్యేట్టు చేసింది. అదేదో లాలూప్రసాద్ యాదవ్ బదిలీ చేస్తే- మన నాయకులు ఇంతే.. అనుకునే వాళ్లం. కానీ మన ఆదర్శ పురుషుడు ఆదిత్యనాథ్ యోగి ఇలా చేయడం నమ్మలేక పోతున్నాం’’
‘‘అక్షర లక్షలు విలువ చేసే మాట చెప్పావు’’
‘‘నువ్వు లక్షలు అంటే 28 శాతం జిఎస్‌టి కట్టమంటారు’’
‘‘జిఎస్‌టి మంచిదే అని కెసిఆర్ చెబుతున్నారు కదా?’’
‘‘మరక మంచిదే అని సర్ఫ్ ఎక్సెల్ వాళ్లు చెబుతారు. మరక ఉంటేనే కదా సర్ఫ్ అమ్ముడు పోయేది.. ఎవరి కోణం వారిది. పాలకుడు కోరుకునేది మరింత ఆదాయం. పాలితులు కోరుకునేది మరింత పొదుపు. ఐనా నేనన్నది ఉత్తర ప్రదేశ్ గురించి కాదు. ’’
‘‘ఎవరినీ నమ్మేట్టు లేదన్నది దేని గురించి?’’
‘‘గుండెపోటు గుమ్మడి ఓ తాతలా, మోతుబరి రైతులా కనిపిస్తాడు.. అలాంటి గుమ్మడిలో కూడా విలన్ ఉంటాడని అనుకుంటామా? నాగభూషణం అంటే తడిగుడ్డతో గొంతులు కోసే విలన్ అనుకుంటాం.. కానీ విలన్‌ను చీల్చి చెండాడే వీరోచిత హీరో ఆయనే అంటే నమ్మగలమా? మొన్న ఓ న్యూస్ చానల్‌లో ఓ నాయకుడు నైతిక విలువల గురించి అదే పనిగా చెబుతుంటే చూడలేక చానల్ మారిస్తే మరో టీవిలో ‘ఏది నిజం?’ అని 1950 ప్రాంతం నాటి సినిమా కనిపించింది. అందులో హీరో నాగభూషణం, విలన్ గుమ్మడి.. నమ్మలేక పోయాను. విలువల గురించిన ఉపన్యాసాలకు ఉండే విలువ ఏంటో తెలుసు కాబట్టి నవ్వుకొని చానల్ మార్చేస్తే ఈ సినిమా కంట పడింది. ’’
‘‘విలన్లు, కమెడియన్లు పరిణామక్రమంలో హీరోలు కావడం, హీరో విలన్ కావడం జూనియర్ ఆర్టిస్ట్ నుంచి హీరోయిన్‌గా ఎదగడం టాలీవుడ్ నుంచి బాలీవుడ్ వరకూ ఎప్పటి నుంచో ఉన్నదే కదా? నాగభూషణం హీరో అంటేనే నమ్మలేం ’’
‘‘ఇందులో నమ్మక పోవడానికేముంది మోహన్‌బాబు షక్కర్ మే రక్కర్ అంటూ విలనీ పండించి.. దారి చూపిన దేవత అంటూ తాను రేప్ చేసిన కథానాయికనే పెళ్లి చేసుకుని మారిన మనిషిగా పెదరాయుడుగా గ్రామస్తులకు తీర్పులు చెప్పలేదా? అంతులేని కథలో బాధ్యత తెలియని వ్యక్తిగా జయప్రదకు అన్నగా నటించిన రజనీకాంత్ కోట్లాది మంది తమిళులకు ఆరాధ్య దైవం అవుతాడని ఊహించామా? ఓవైపు తీర్పులు చెప్పి, బాషాగా అలరించి ఇప్పుడు రాజకీయాల్లోకి వచ్చి కోట్లాది మందిని ఉద్ధరించాలనే స్థాయికి చేరుకుంటాడని ఎప్పుడైనా అనుకున్నామా? సాగర సంగమంలో తాగుబోతు కమల్ హాసన్ బాధ్యతాయుతమైన ‘్భరతీయుడు’గా మారుతాడని ఎవరనుకున్నారు? ఎవరైనా ఎప్పుడూ ఒకేలా ఉంటారని ఎందుకనుకుంటావు? కాలాన్ని బట్టి మారుతారు. జగపతిబాబు వాళ్ల నాన్న సూపర్ హిట్ సినిమాలు తీస్తే, జగపతిబాబు హీరోగా సూపర్ హిట్ సినిమాల్లో నటించి కాలం కలిసి రాక హీరో నుంచి ఇప్పుడు విలన్ కాలేదా? తాత వయసులో బాలకృష్ణ ఇపుడు ఇరగదీయడం లేదా? అంతా కాలమహిమ.’’
‘‘మన చేతిలో ఏమీ ఉండదు.. అంతా కాల మహిమ.. దూరదర్శన్ సీరియల్స్‌లో పేదవృద్ధుడి పాత్రలో నరసింహరాజు కనిపిస్తుంటాడు. ఆయన ముఖంలో పేదరికం వెళ్లి విరుస్తుంటుంది. చెబితే నమ్ముతావా? నరసింహరాజు ఒకప్పుడు టాప్ హీరో.. పున్నమినాగులో చిరంజీవి విలన్ అయితే ఆయన హీరో. హీరో అన్నాక విలన్‌ను పిచ్చకొట్టుడు కొట్టాలి అలా కొట్టాడు కూడా. వాళ్లిద్దరి జాతకాలు తారు మారయ్యాయి నరసింహరాజు దూరదర్శన్ జూనియర్ ఆర్టిస్ట్‌లా మారిపోతే చిరంజీవి మెగాస్టార్ అయ్యాడు.’’
‘‘ కాలం కలిసొస్తే ఎన్టీఆర్ మునిమనవళ్లు కూడా హీరోలు అవుతారు కలిసి రాకపోతే హీరో నుంచి జూనియర్ ఆర్టిస్ట్‌లై పోతారు.’’
‘‘మీ ఇద్దరూ ఏం మాట్లాడుకుంటున్నారో నాకస్సలు అర్థం కావడం లేదు.’’
‘‘ఒక్కో సమయంలో ఒక్కోలా ఉంటారు అనుకుంటున్నాం. బాగో జాగో అన్న కెసిఆర్ తెలంగాణ వచ్చాక మీ కాళ్లకు ముళ్లు గుచ్చుకుంటే పంటితో తీస్తాను అని చెప్పలేదా? నా లేఖతోనే తెలంగాణ వచ్చిందని తెలంగాణలో చెప్పి మధ్యాహ్నం హెలికాప్టర్‌లో విజయవాడకు చేరుకుని అన్యాయంగా విడదీశారు అని బాబు చెప్పలేదా? ’’
‘‘అంతే కదా? అదేదో సినిమాలో ఎన్టీఆర్ హీరో, సత్యనారాయణ విలన్ ఇద్దరి మధ్య ఫైటింగ్ సీన్ పూర్తి కాగానే అదే స్టూడియోలో మరో ఫ్లోర్‌లో ఎన్టీఆర్, సత్యనారాయణలు తాతా మనవళ్లుగా అద్భుత రసాన్ని పండించారు. ఏ ఫ్లోర్ నటన ఆ ఫ్లోర్ కే పరిమితం. గుజరాత్ ముఖ్యమంత్రిగా ఉన్నప్పుడు జిఎస్‌టిని వీరోచితంగా వ్యతిరేకించిన మోదీ ప్రధానమంత్రి కాగానే జిఎస్‌టి అమలుతోనే దేశం ముందుకు వెళుతుందని చెప్పలేదా? గుజరాతీ భాషలో కేంద్రం మిధ్య అని హూంకరించి, ఇప్పుడు జిఎస్‌టితో రాష్ట్రం మిధ్య అని మోదీ చెప్పడం లేదా? ఏ పాత్రలో ఉంటే ఆ డైలాగు చెప్పక తప్పదు కదా? అద్వానీ సూపర్ హిట్ సినిమా ‘రథయాత్ర’ సమయంలో మోదీ జూనియర్ ఆర్టిస్ట్. అదే మోదీ హీరో అయ్యాక అద్వానీకి కనీసం క్యారక్టర్ ఆర్టిస్ట్ పాత్ర కూడా దక్కకుండా చేయలేదా? ’’
‘‘బాగా చెప్పావు.. దానవీర శూరకర్ణలో దుర్యోధనుడిగా ఎన్టీఆర్ అద్భుతమైన డైలాగులు చెబితే- మనకు మహాభారతంలో నిజమైన హీరో దుర్యోధనుడే అనిపించింది. అదే ఎన్టీఆర్ శ్రీకృష్ణుడిగా నటించిన సినిమాలో దుర్యోధనుడు ఇంత ఫవర్‌పుల్‌గా ఉండడు. ఎన్టీఆర్ కూడా దుర్యోధనుడి పాత్రలో చెప్పిన డైలాగులను బృహన్నల పాత్రలో చెప్పలేడు కదా? ఏ పాత్ర డైలాగులు ఆ పాత్రకే’’
‘‘సినిమాకు, రాజకీయాలకు సంబంధం ఏంటి?’’
‘‘రెండూ ఒకదానిలో ఒకటి కలిసిపోయి చాలా కాలం అయింది. రెండూ నటనే’’
‘‘మీ ఇద్దరి చర్చ సినిమాలపైనా, రాజకీయాల గురించా? నాయకుల గురించా? ’’
‘‘మనుషులంతా ఒకటే . రాజకీయాలు,సినిమాలు ఒకటే.. పాత్రకు తగ్గ డైలాగులు చెబుతారు. ఏ పాత్రా శాశ్వతంగా ఒకేలా ఉండదు. కాలాన్ని బట్టి అవసరాన్ని బట్టి మారుతుంది. దానవీర శూరకర్ణ డైలాగులను శ్రీకృష్ణ పాండవీయంలో ఆశించవద్దు అని అంతే.’’
*
-బుద్దా మురళి(జనాంతికం 14-7-2017)

8, జులై 2017, శనివారం

సభ్య సమాజానికి ఓ సందేశం..

‘‘ఏమండోయ్.. ముందు లేవండి.. మీకో అ ద్భుతమైన విషయం చెబుతాను’’
‘‘ప్రశాంతంగా పడుకోనివ్వవా? ఏంటీ చెప్పు.. కొంపతీసి జిఎస్‌టిని ఉపసంహరించుకుంటున్నట్టు మోదీ ప్రకటించారా? ఫలనా హీరో సినిమా మొదటి ఆటకే తనే్నసిందా? ’’
‘‘అవేం కాదు..’’
‘‘ ఐశ్వర్యారాయ్ ఏమన్నా మనంటికొస్తుందా? కత్రినా కైఫ్ మనల్ని రమ్మందా? ’’
‘‘పాచి మొఖంతో మీ సరసాలు ఏడ్చినట్టే ఉన్నాయి. ఐశ్వర్యారాయ్ మనింటికి రావడానికి మీరేమీ అభిషేక్ బచ్చన్ కాదు.’’
‘‘జిఎస్‌టి వల్ల అద్దె తగ్గిస్తున్నట్టు ఓనరుడు మాటిచ్చాడా? మనం వాడ్ని తెగ తిట్టుకుంటాం.. కానీ పిచ్చి వెధవ మంచోడే!’’
‘‘అద్దెలు పెరుగుతాయి కానీ కలియుగంలో ఎక్కడైనా తగ్గుతాయా? మీ ఛాదస్తం కాకపోతే ’’
‘‘మరేంటో చెప్పు..’’
‘‘పోయిన జన్మలో నేను రాకుమార్తెనట’’
‘‘సోదమ్మ చెప్పిందా? రోడ్డుమీద చిలక జోస్యం వాడు చెప్పాడా? ఇంకో పది రూపాయలు ఇస్తే మోదీ తరువాత కాబోయే ప్రధానమంత్రివి నువ్వే అని కూడా చెబుతాడు’’
‘‘నాకంతా ఆశేమీ లేదు. ఏదో సిఎం అంటే ఓకే.. కానీ ప్రధానమంత్రి పదవి వద్దు. ప్రయాణాలు నాకు పడవు. నా జన్మభూమి ఎంత అందమైన దేశము.. అంటూ పాడుకుంటూ ఇక్కడే ఉంటాను. నాకు స్కూల్ టీచర్‌ను కావాలని చిన్నప్పటి నుంచి కొరికగా ఉండేదండి. రోజూ పిల్లల మీద- అసలేం చేస్తున్నారు, ఇలాగేనా? అంటూ ఆగ్రహం వ్యక్తం చేస్తూ ఉంటే ఎంత బాగుంటుందో? మనమేం చేయకపోయినా అసలేం చేస్తున్నారు.. అని ఎదుటి వాడిని నిలదీయడం కన్నా మించిన ఆనందం మానవ జన్మకు లేదు. బిఇడి చేస్తున్నప్పుడు మంచి సంబంధం అని మా వాళ్లు మీకు కట్టబెట్టారు లేకపోతే టీచర్‌నై పిల్లలపై ఆగ్రహం వ్యక్తం చేస్తూ సంతోషంగా ఉండేదాన్ని. చిన్నప్పుడు రోజూ నాన్న అమ్మపై ఆగ్రహం వ్యక్తం చేస్తుంటే ఏ నాటికైనా రోజూ ఆగ్రహం వ్యక్తం చేసే పోస్టులో ఉండాలనుకున్నాను. నా పరిశోధనలో టీచర్‌కు పిల్లల మీద, సిఎంకు అధికారుల మీద, నాయకుల మీద రోజూ ఆగ్రహం వ్యక్తం చేసే అధికారం ఉంటుందని తేలింది. ఔ నండీ.. నాకో డౌటు.. ప్రధానమంత్రికి ఆగ్రహం రాదా? ఎప్పుడు చూసినా పత్రికల్లో సిఎం ఆగ్రహం అనే వస్తుంది కానీ ప్రధాని ఆగ్రహం, రాష్టప్రతి ఆగ్రహం అని రాదెందుకు? ఆగ్రహం వ్యక్తం చేయలేని ప్రధానమంత్రి పదవి నాకు వద్దే వద్దు. ’’


‘‘ప్రధానమంత్రి పదవి తీసుకోమని నినే్నదో బతిమిలాడుతున్నట్టు .. ప్రధాని పదవి నాకు వద్దంటే వద్దు అని ప్రకటిస్తున్న రాజకీయ నాయకులు అరడజను మంది తయారయ్యారు. ఇప్పుడు వారికి జతగా నువ్వు.. సాయంత్రం ఏం వండాలో ఉదయం చెప్పి వెళితేనే నీకు గుర్తుండదు. పోయిన జన్మది బాగానే గుర్తుంది. నువ్వు రాజకుమార్తె వైతే నేను రాజకుమారుడినా? ఏ దేశం స్వయం వరంలో ప్రత్యర్థులందరినీ ఓడించి నిన్ను వరించానా? ఎలా? ఆ కథ చెప్పు ’’
‘‘మీకంత సీన్ లేదు లేండి .. నేను పోయిన జన్మలో రాజకుమారినట! మనింట్లో ఆరువందల చీరలు, వంద ఆభరణాలు, వెయ్యి జతల చెప్పులున్నాయి. ఇంతలో మెలకువ వచ్చింది.’’
‘‘రాత్రి టీవిలో వాడెవడో వందల కోట్లు వెనకేసుకున్నాడు అని కథలు కథలుగా వార్తల్లో చెప్పారు కదా? ఆ ప్రభావం కావచ్చు’’
‘‘నా జీవితానికి కల కనడమే తప్ప మురిసిపోవడానికి ఇంకేముంది? మంచి ఉద్యోగం, పట్టిందల్లా బంగారం అని ఏదేదో ఊహించి మీకు కట్టబెట్టారు. బంధువులకు చెప్పుకోవాలంటే సిగ్గుగా ఉంది. మీ ఆయన కేవలం జీతం పైనే ఆధారపడి జీవిస్తారట కదా? ఈ కాలంలో ఎలా బతుకుతున్నారని నలుగురూ అడిగితే చెప్పలేక సిగ్గుతో తల చితికి పోయినట్టు ఉం టుంది. ఫలానా ఇంట్లో ఎసిబి దాడిలో ఉద్యోగి ఇంట్లో నాలుగు వందల జతల చెప్పులు, 30 వడ్డాణాలు, 13 ప్లాట్లు, వంద ఎకరాల పొలం, ఇతర ఆస్తిపత్రాలు బయటపడినట్లు టీవిలో వాళ్ల గురించి చెబుతుంటే ఇంట్లో మూలన పడి ఉన్న మూడు జతల చెప్పులు గుర్తుకు వచ్చి- హే భగవాన్.. నాకెందుకీ శిక్ష అని ఎన్నిసార్లు మూగగా రోదించానో మీకేం తెలుసండీ? మీకు కొంచెం అయినా సిగ్గనిపించదా? తోటి వారు అనే్నసి వందల కోట్లు సంపాదిస్తుంటే? ఆ మధ్య కూకట్‌పల్లిలో పోలీసు అధికారి ఒకరు పట్టుపడితే రెండుమూడు వందల కోట్ల ఆస్తులు దొరికాయి. ఆయనెవరో ఆరోగ్య శాఖలో ఏకంగా తొమ్మిది వందల కోట్లు నొక్కేశారు. మిమ్మల్నేమన్నా వేల కోట్లు కొట్టుకు రమ్మన్నానా? మన గౌరవానికి తగ్గట్టు ఓ పాతిక కోట్లయినా వెనకేయకపోతే మన బంధువుల్లో ఏం విలువ ఉంటుంది? మా ఆయనపై ఎసిబి దాడి జరిగిందంటూ అమ్మలక్కలకు చెప్పుకోవాలని నాకు మాత్రం ఉండదా? అల్లుడు గారు భలే సంపాదించారమ్మాయి నీక్కూడా చెప్పకుండా.. అ ని నాన్నగారు మెచ్చుకోవాలనే ఆశ సగటు మహిళగా నాకూ ఉంటుందండి.. ఉంటుంది. ఏదో బంగారు వడ్డాణాలు పెట్టుకొని తిరగాలని కాదు. మా ఆయనా సంపాదించగలడు.. జీతం మీదే బతకాల్సిన ఖర్మ మాకు పట్టలేదు అని గట్టిగా అరవాలనుంటుంది. జీతంపైనే బతకడం ద్వారా ఈ సభ్య సమాజానికి మీరేం సందేశం ఇవ్వదలచుకున్నారు. మా నాన్న హీరో, మా నాన్న కాంట్రాక్టర్, మా నాన్న రియల్డర్ అని సాటి పిల్లలు గర్వంగా చెప్పుకుంటే- పోవోయ్ పో.. మా నాన్న మీద ఎసిబి దాడి జరిగితే వంద కోట్ల క్యాష్ దొరికింది తెలుసా? అని గర్వంగా కాలర్ ఎగరేయాలని మన పిల్లలకు ఉండదా? చెప్పండి... ఈ సభ్య సమాజానికి మీరేం చెప్పదలుచుకున్నారు. ? ’’
‘‘ఆపు.. శకుంతలా ఆపు.. నేనేమన్నా సత్యహరిశ్చంద్రుడినని చెప్పానా? అన్ని ఉద్యోగాలూ ఒకేలా ఉండవు. అదృష్ట జాతకులు కొద్దిమందే ఉంటారు. అలాంటి ఉద్యోగం దక్కితే మూడు వందలేంటి ఐదువందల జతల చెప్పులుండేవి మన ఇంట్లో.’’


‘‘అధికారానికి అవినీతి ఆత్మ లాంటిది. ఆత్మలేని మిమ్మల్ని నాకు కట్టబెట్టినందుకు ఆ దేవున్ని అనాలి. అంతా నా ఖర్మ’’.
‘‘అలా అంటావేం..? మీ అమాయకత్వం నాకెంత నచ్చింది. జన్మజన్మలకు మన అనుబంధం ఇలానే ఉండాలి అని మొన్ననే కదా సుల్తాన్ బజార్‌లో తుంగస్వామి బట్టల షాపు చీరలు కొనేప్పుడు చెప్పావు.’’
‘‘నేనే కనుకు పతివ్రతను అయితే ఏడాదిలో ఎసిబి దాడి చేసేంతగా మా ఆయన ఎదగాలి. ఇదే నా శపథం.. అప్పటి వరకు నన్ను ముట్టుకోవద్దు’’
*

30, జూన్ 2017, శుక్రవారం

అమ్మా నాన్నా.. జిఎస్‌టి లవ్‌స్టోరీ



‘‘అబ్బాయి తీరు అనుమానంగా ఉంది.. సెల్‌ఫోన్, ల్యాప్‌టాప్‌ను వదలడం లేదు’’
‘‘ఆ రెండు లేకుండా కనిపిస్తే అనుమానించాలి. బట్టలు లేకుండా తిరిగితే పిచ్చోళ్లు అన్నట్టు, సెల్‌ఫోన్ లేకుంటే పిచ్చోళ్లు అనుకుంటారు.’’
‘‘ఈ మధ్య ప్రేమ కొటేషన్లు తెగ సేకరిస్తున్నాడు. ఏదో తేడాగా ఉంది. నిన్న వాడు ఫేస్‌బుక్‌లో రాసిన ప్రేమ కొటేషన్లు చూడండి. రామ్‌కో సిమెంట్‌తో కట్టిన గోడైనా కూలుతుంది.. కూలనిది అమర ప్రేమ ఒక్కటే.. ఫెవికాల్‌లా అతుక్కునేదే స్వచ్ఛమైన ప్రేమ. ఆర్ట్ ఫిల్మ్ అనుకొని వెళితే మాస్ మసాలా సినిమా టికెట్లు దొరికినట్టు ఎవరి కోసమో ఎక్కడికో వెళితే నీ ప్రేమ దొరికింది. జీన్స్ ఫ్యాంటు జీవిత కాలం లాంటిదే.. ప్రేమ బోర్ కొట్టినా వదుకోలేనంత కాలం ఉంటుంది. తెలుగు సీరియల్స్‌కు ముగింపు, మన ప్రేమకు ఫుల్‌స్టాప్ ఉండదు.’’
‘‘చాలు రాధా చాలు.. ఇంకేం చెప్పకు.. నాకు అర్థమైంది. మనవాడు ప్రేమలో పడ్డాడు. వీడిది అతితెలివి కదా? ప్రేమ కొటేషన్లను చదివి లేటెస్ట్ ట్రెండ్‌కు తగ్గట్టు మార్చి రాస్తున్నాడు. చెబుతా.. వాడి సంగతి’’
***
‘‘ఏంటీ విషయం?’’
‘‘డాడ్.. డొంక తిరుగుడుగా అడగడమెందుకు సూటిగా అడుగు.’’
‘‘ఎవరా? అమ్మాయి?’’
‘‘ఏ అమ్మాయి?’’
‘‘డొంక తిరుగుడుగా వద్దని చెప్పి నువ్వు.. ?’’
‘‘ఓకే డాడ్.. వర్కౌట్ అయ్యాక చెబుతాను’’
‘‘అంత కాన్ఫిడెన్సా? నీ ప్రేమకు చిన్న పరీక్ష పెడతాను.. అందులో పాసైతే నీకు అనుమతి ఇవ్వడమే కాదు.. నీకు మద్దతుగా నేనూ సహకరిస్తాను లేకపోతే నేను చెప్పినట్టు బుద్ధిగా చదువుకోవాలి ’’
‘‘ఏం పరీక్ష డాడ్? బొమ్మరిల్లులో హీరోయిన్ హీరో ఇంట్లో కొంత కాలం ఉండే పరీక్ష లాంటిదా? దేనికైనా ఓకే డాడ్’’
‘‘దరిద్రంగా డాడ్ అని పిలవకురా! నాన్నా, అయ్యా, డాడీ, పితాశ్రీ అని నీ ఇష్టం వచ్చినట్టు ఎలా అయినా పిలువు తమిళంలో పిలిచినా, ఉర్దూలో పిలిచినా పలుకుతా.’’
‘‘ఓకే.. ఓకే.. కూల్... ’’
‘‘రాజకుమారి కోసం తోట రాముడు మాంత్రికునితో పోరాడ్డం చూశాం, మహేశ్ బాబు, జూనియర్ ఎన్టీఆర్‌లు ప్రేమించిన అమ్మాయి కోసం విలన్ పెట్టిన పరీక్షలో విజయం సాధించి హీరోయిన్‌ను చేపట్టిన కథలూ చూశాం. మాకూ తెలుసు ఈ పరీక్షలు వాటి ఫలితాలు.. నీకు అలాంటి పరీక్ష కాదు చిన్న జనరల్ నాలెడ్జి పరీక్ష పెడతాను. ’’
‘‘సిఎ అయిపోగానే నా టార్గెట్ సివిల్స్.. ఇప్పటి నుంచే ప్రిపేర్ అవుతున్నా.. కౌన్ బనేగా కరోడ్‌పతికి సెలక్ట్ అయ్యాను. ఆబిడ్స్‌లో నువ్వు ఆదివారం సెకండ్ హ్యాండ్‌లో కొనుక్కొచ్చిన పాత బుక్స్ అన్నీ ఎప్పుడో చదివేశాను. యక్ష ప్రశ్నలు, లకోటా ప్రశ్నలు, ఇంకేం అడిగినా చెబుతాను. కౌరవ సభలో ద్రౌపదికి అవమానం జరుగుతుంటే భీష్ముడు ఎందుకు స్పందించలేదు? సీతమ్మను శ్రీరాముడు ఎందుకు అడవులకు పంపాడు? అడుగుతావా? అడుగు.. ఆ పాత బుక్స్ నువ్వు చదివావో లేదో కానీ సివిల్స్ కోసం నేను ఎప్పుడో చదివి పారేశా’’
‘‘ అవి కాదు.. లేటెస్ట్ విషయమే. ఒక రోజంతా ప్రిపేర్ కా.. రేపు ఉదయం అడుగుతాను. గూగుల్ నుంచి గురువు వరకు ఎవరినడిగి చెప్పినా అభ్యంతరం లేదు. నువ్వు కరెక్ట్‌గా చెబితే నువ్వు ప్రేమించిన అమ్మాయితో నీకు పెళ్లి జరిపిస్తా? ’’
***
‘‘అమ్మా.. నాన్నా.. కాలేజీకి వెళ్లొస్తా.. నన్ను దీవించండి’’
‘‘అలాగే వెళ్లిరా బాబు’’
‘‘ఏమండీ మనవాడికి ఏదో గాలి సోకినట్టుంది.జీవితం లో మొదటి సారి మన ఇద్దరి కళ్ళు మొక్కి ఆశీర్వాదం తీసుకోని బుద్ధిగా కాలేజీకి వెళుతున్నాడు. ఎవరైనా ప్రేమికులు కనిపించినా చిరాకు పడుతున్నాడు. మామ్, డాడ్ అనడం లేదు. వాడికేమైందండీ? నాకేదో భయంగా ఉంది. నిజం చెప్పండి.. చేతబడి చేయించారా? ’’
‘‘ఆ రోజు ఉదయమే వాడికి పరీక్ష పెడతానని అన్నాను కదా? ఏమైంది ఫ్లాష్‌బ్యాక్‌లోకి రా.. చూపిస్తా రా! ’’
***
‘‘తొందరగా అడగండి డాడ్.. ప్రశ్నలు సివిల్స్ రేంజ్‌లో ఉండాలి ’’
‘‘నిదానం.. నిదానం.. ముందు కూల్‌గా కూర్చో... జిఎస్‌టి అంటే ఏంటి?’’
‘‘ఆ..’’
‘‘జిఎస్‌టి ఫుల్‌ఫామ్ కాదు. వివరంగా చెప్పమని అడుగుతున్నా? జిఎస్‌టి వల్ల ధరలు తగ్గుతాయా? పెరుగుతాయా? ఒక వస్తువుపై పన్నులు పెరిగాయనే వార్త రాగానే వెంటనే ధర పెంచుతారు. అలానే పన్నులు తగ్గించినప్పుడు ఆ వస్తువుల ధర తగ్గాలి కదా? కానీ తగ్గదు. ఒక్కోసారి పన్ను తగ్గితే, రేటు పెరుగుతుంది. ఏ సూత్రం ప్రకారం ఇలా జరుగుతుంది? జిఎస్‌టి వల్ల ప్రజలకు ఉపయోగమా? ప్రభుత్వానికా? ప్రభుత్వ ఆదాయం తగ్గుతుందా? ప్రజలపై భారం పెరుగుతుందా? ప్రజలకు మేలు అని ప్రభుత్వం చెబుతుందే- ఇంట్లో ఖర్చు లెక్క పెరుగుతుంది. ఇంట్లో అమ్మ లెక్క తప్పా? ప్రభుత్వం చెప్పే లెక్క తప్పా? ’’
‘‘డాడీ.. చిన్న పిల్లాన్ని చేసి ఇలా హింసించడం అన్యాయం’’
‘‘ముందు చెమటలు తూడుచుకో, ఆ ఏసీ ఆన్ చెయ్’’
‘‘సిఎకు ప్రిపేర్ అవుతున్నావు పన్నులు తగ్గినా ధరలు ఎందుకు తగ్గవో చిన్న లెక్క చెప్పలేవా? ’’
‘‘ పన్నులు తగ్గినా ధరలు ఎందుకు తగ్గవో ఏ లెక్కల బుక్కుల్లోనూ సమాధానం ఉండదు. అమర్త్యసేన్ కూడా చెప్పలేడు. చైతన్య, నారాయణల్లో కూడా ఇలాంటి లెక్కలు చెప్పరు. పోనీ 13వ ఎక్కం, 17వ ఎక్కం వరుసగా చెప్పమంటావా? ప్రజారోగ్య శాఖలో ఒక్క అధికారిని ఎసిబి పట్టుకుంటే ఎనిమిది వందల కోట్లు బయటపడితే, అందరు అధికారుల వద్ద ఎంత సొమ్ము ఉంటుంది? నంద్యాలలో ఒక్క ఓటుకు ఐదువేల రూపాయలు అయితే మొత్తం ఓట్లకు ఎన్ని? ఒక రాష్ట్రానికి ఎంత? రెండు రాష్ట్రాలకు ఎంత? ఠకా ఠకా చెప్పమంటావా? ’’
‘‘ పందెం .. పందేమే’’
‘‘ జిఎస్‌టితో ఏం జరుగుతుందో అమలైతే కానీ తెలియదని రాష్ట్ర ఆర్థిక మంత్రి సూటిగా, కేంద్ర ఆర్థిక మంత్రి డొంక తిరుగుడుగా చెప్పాడు. వాళ్లు చెప్పలేని ప్రశ్నను నన్ను అడగడం అన్యాయం పితాశ్రీ’’
***
‘‘ అదీ కథ.. దారి తప్పకుండా మనవాడి జీవితాన్ని కాపాడిన జిఎస్‌టికి ధన్యవాదాలు చెప్పుకుందాం రా.. రాధా... రా’’
‘‘ఏమండీ జిఎస్‌టితో ఉగ్రవాదులు తోక ముడుస్తారని, ప్రపంచ పటం నుంచి పాకిస్తాన్ మాయమవుతుందని, చైనా వణికిపోతుందని వాట్సప్‌లో మెసేజ్ వచ్చింది. నిజంగా ఇలా అవుతుందా?’’
‘‘చూడు రాధా.. మన వాడ్ని దారిలోకి తేవాలని నేను జిఎస్‌టిని నమ్ముకున్నాను. నన్ను నువ్వు ఎప్పుడో దారిలోకి తెచ్చుకున్నావ్, ఇంకెందుకు జిఎస్‌టి. మనకు మంచి చేసిన జి ఎస్ టి కి కృతజ్ఞ తలు చెప్పుకొందాం రా రాధా రా . జిఎస్‌టి వర్థిల్లాలి’’
*బుద్దా మురళి (జనాంతికం 30. 6. 2017)

23, జూన్ 2017, శుక్రవారం

కల్తీలేని స్వచ్ఛమైన బూతు



‘‘ముందు దిగ్భ్రాంతి చెందాను, తర్వాత నిర్ఘాంత పోయాను’’
‘‘ఎందుకు? తెలంగాణ నుంచి బియ్యం అంధ్రకు ఎగుమతి అవుతున్నాయనా? ఈ సీజన్‌లో తెలంగాణలో 60 లక్షల టన్నులు, ఆంధ్రలో 39 లక్షల టన్నుల వరి ధాన్యం పండిందనే వార్త చదివి నిర్ఘాంత పోయావా?’’
‘‘అది కామన్.. పంటపొలాలు ప్రపంచ స్థాయి రాజధానిగా మారుతున్నప్పుడు- పంట విస్తీర్ణం తగ్గడం సహజం. హైదరాబాద్‌లో హైటెక్ సిటీ, అపార్ట్‌మెంట్స్ ఉన్న ప్రాంతాల్లో ఒకప్పుడు వ్యవసాయం సాగేది. ఇక్కడా అంతే ’’
‘‘కృష్ణారావును బ్రాహ్మణ పరిషత్ పదవి నుంచి తొలగించినందుకే కదా? నిజంగా అన్యాయం కదూ?’’
‘‘ప్రత్యర్థి పార్టీ ఎమ్మెల్యేలు తనను విమర్శిస్తేనే ఎస్సీ,ఎస్టీ అట్రాసిటీ కేసు పెట్టి జైలులో వేసేయిస్తున్న బాబు. ఫేస్‌బుక్‌లో వ్యంగ్యోక్తులు విసిరిన వారిని సెంట్రల్ జైలులో చుక్కలు చూపించిన వారు, తమకు వ్యతిరేకంగా ఉన్న పోస్టులను ‘షేర్’ చేస్తే పదవి నుంచి ఊడబెరకక పోతే ఆ పోస్టులకు లైక్ చేస్తారని అనుకున్నావా? ’’
‘‘ ఆ... తెలిసింది లే.. ఆర్‌ఎస్‌ఎస్‌కు చెందిన రామ్‌నాథ్ కోవింద్‌ను రాష్టప్రతి అభ్యర్థిగా ఎంపిక చేసినందుకే కదా? రెండు సీట్ల నుంచి రథయాత్రతో బిజెపిని అధికారంలోకి తీసుకు వచ్చిన అద్వానీని ప్రధానిగా చూద్దామనుకుంటే 2004లో ముందస్తు ఎన్నికలు, ‘ఇండియా షైనింగ్’ అంటూ బాబుగారు తానూ మునిగి బిజెపిని ముంచేశారు. రాష్టప్రతి పదవి ఖా యం అనుకుంటే ఇలా కావడం దిగ్భ్రాంతికరమే ? ’’
‘‘ఇంట్లోంచి రోడ్డు మీదకు వెళ్లేప్పుడే పిల్లలకు సవాలక్ష జాగ్రత్తలు చెబుతాం. సైకిల్, బైక్, కారు సీట్లో కూర్చుంటేనే అన్ని జాగ్రత్తలైతే, దేశాన్ని నడిపే వాళ్లు కుర్చీలో ఇంకెంత జాగ్రత్తగా కూర్చోవాలి? ఎంత జాగ్రత్తగా అధికార చక్రం తిప్పాలి? రాబోయే ప్రమాదాలను కూడా ముందే పసిగట్టి నిర్ణయాలు తీసుకోవాలి. అద్వానీ కలలు కన్న కుర్చీలో మోదీ కూర్చున్నారు. రాష్టప్రతి పదవిలో కూర్చోబెడితే ఎప్పుడే ఇబ్బంది కలిగిస్తారో? వచ్చే ఎన్నికల్లో సొంతంగా మెజారిటీ రాకపోతే ఏం చేస్తారో? ఇన్ని సందేహాలు తొలుస్తుంటే అద్వానీకి రాష్టప్రతి అభ్యర్థిగా ప్రకటిస్తారని ఎలా ఊహించావు?’’
‘‘అధికార పక్షం ఆర్‌ఎస్‌ఎస్ వాదిని రాష్టప్రతి అభ్యర్థిగా ప్రకటించినందుకా? విపక్షాలు సైతం దళిత కులానికి చెందిన మీరాకుమార్‌ను రంగంలో నిలిపినందుకా? ఆ దిగ్భ్రాంతి ? ’’
‘‘బిజెపి అధికారంలో ఉన్నప్పుడు ఆర్‌ఎస్‌ఎస్ కాకపోతే కాంగ్రెస్ వాది రాష్టప్రతి అవుతారా? కమ్యూనిస్టులు అవుతారా? సోనియానో, ఏచూరినో చెప్పిన వాళ్లు అవుతారనుకున్నావా? విపక్షాల నుంచి పోటీ ఊహించిందే కదా? చక్రం తిప్పిన బాబుకే చెప్పలేదు.. మోదీ ఇక వీళ్లకు చెబుతారా?’’
‘‘ నా చెవుల వరకూ వచ్చిందో విషయం.. నాకో మేధావి మిత్రుడున్నాడు అతను చెబితే నమ్మలేదు. ఇది నీ వద్దకూ వచ్చిందా? బహుశా నీ ఆశ్చర్యానికి కచ్చితంగా అదే కారణం అయి ఉంటుంది? ’’
‘‘???’’
‘‘నాతోనే చెప్పించాలని.. కెసిఆర్ పెద్ద కుట్రకు తెర లేపారట! కోటి ఎకరాలకు సాగునీరు ఇవ్వడం. లక్షలాది గొర్రెలు, కోట్లాది చేప పిల్లలు ఉచితంగా ఇవ్వడం ద్వారా గ్రామాల్లోని ప్రజలు కుల వృత్తుల్లో అక్కడే ఉండి తనకు ఎప్పటికీ పోటీకి రాకూడదని కుట్ర పన్నుతున్నారట! కరవు విలయ తాండవం చేస్తే ప్రజల్లో అసహనం పెరిగిపోయి తిరుగుబాటు చేస్తారనే కోటి ఎకరాలకు సాగునీరు పథకాన్ని ప్లాన్ చేశారట! ’’
‘‘అధికారంలో ఉన్న వాళ్లు సాధ్యమైనంత కాలం తామే అధికారంలో ఉండాలని కోరుకుంటారు. కాంగ్రెస్‌లోని మేధావులను మినహాయిస్తే మన ప్రత్యర్థులను ఎలా అధికారంలోకి తేవాలి? అని ఆలోచించే వారు ఎవరూ ఉండరు. కేంద్రంలో మోదీ, తెలంగాణలో కెసిఆర్, ఆంధ్రలో బాబు తమ పదవులు నిలుపుకోవడానికి సర్వశక్తులూ ఒడ్డుతారు. మళ్లీ అధికారంలోకి రావడానికి ఎవరికి చాతనైన పనులు వాళ్లు చేస్తారు. దీనిలో నిర్ఘాంత పోవడానికేముంది’’
‘‘అబ్బా.. ఇక నా వల్ల కాదు.. సస్పెన్స్ భరించలేను.. చైనా మన మీద దాడి చేస్తుందనే సమాచారం ఏమైనా ఉందా? తాలిబాన్లు ప్రపంచాన్ని నాశనం చేయనున్నారా? వాడెవడో కోరియావాడు మనమీదెమన్నా గురిపెట్టాడా? చెప్పు ప్లీజ్ ... చెప్పు’’
‘‘ఇవన్నీ పెద్దగా పట్టించుకోవలసినవి కాదు. నీకు కాబట్టి చెబుతున్నా లోకులకు చెప్పినా అర్థం కాదు. బూతు లేనిదే భవిష్యత్తు లేదని తేల్చి చెప్పిన జబ్బర్‌దస్త్, పటాస్ ప్రోగ్రామ్‌లను నిలిపివేస్తున్నారు అనే వార్త వినగానే ఒక్కసారిగా గుండె ఆగినట్టు అయింది... నిర్ఘాంత పోయాను. సినిమాల్లో హీరోకో హీరోయిన్‌కో కష్టం వస్తే సముద్రంలో పైకి వచ్చిన అలలు అలానే నిలిచిపోతాయి చూడు.. అచ్చం అలానే మెదడు మొద్దుబారి శూన్యం ఆవరించింది. ఉన్నావా? అసలున్నావా? ఉంటే కళ్లు మూసుకున్నావా? అని అక్కినేనిలా దేవున్ని నిలదీయాలనుకున్నాను’’
‘‘???’’
‘‘పెద్ద మనుషులుగా బయటకు మనం ఎన్ని నీతులైనా చెప్ప వచ్చు కానీ ఆ ప్రొగ్రామ్స్‌లోని బూతు మన జీవితానికి నూతనోత్తేజాన్ని ఇస్తోంది. నిషేధిత వెబ్‌సైట్స్ చూస్తే లేని పోని సమస్య. పెద్ద మనుషులు రూపొందించి పెద్దమనుషుల చానల్స్‌లో పెద్ద మనుషుల్లా ప్రసారం చేస్తే మనలాంటి పెద్ద మనుషులు ఇంట్లో కూర్చోని నిర్భయంగా చూడవచ్చు. ఏ జన్మలోనో మనం చేసుకున్న పుణ్యం వల్ల ఇలాంటి ప్రసారాల కాలంలో బతికున్నాం. ఈ అదృష్టం నుంచి మనల్ని దూరం చేసే కుట్ర జరుగుతోందని తెలిసి మనసు కకావికలం అయింది. మనమేమన్నా జిఎస్‌టి వద్దన్నామా? తిరుపతిలో గుండు కొట్టించుకున్నా పన్ను కట్టమంటే కట్టమన్నామా? మా సంతోషాల మీద ఎందుకీ కుట్ర..? దేవుడున్నాడు.. వాళ్ల కుట్రలను భగ్నం చేశాడు. మన పెద్దల మీద నాకు పూర్తి విశ్వాసం ఏదో చేసి మనను బూతుకు దూరం కాకుండా చేస్తారు అను కున్నా .. నా నమ్మకమే నిజమైంది సర్వే జన సుఖినోభవంతు. అరచేతిని అడ్డుపెట్టి సూర్యోదయాన్ని ఆపలేరు. కేసులు అడ్డుపెట్టి బూతును అడ్డుకోలేరు. అవసరం అయితే రాజ్యాంగాన్ని సవరించైనా భవిష్యత్తు తరాల కోసం బూతును కొనసాగించాలి. బూతే భవిష్యత్తు. ఒకప్పుడు తెలుగు సినిమాలు బూతును కల్తీ చేసి డబుల్ మీనింగ్డైలాగులు అని వినిపించేవి .. ఇప్పుడు కల్తీ లేకుండా స్వచ్ఛమైన బూతు ఇంటి తెర ద్వారా ఇంట్లోకి పంపిస్తున్నారు 
కవి చౌడప్ప సిగ్గుపడేలా  కల్తీలేని స్వచ్ఛ బూతు భవిష్యత్తు తరాలకు ఏ ఆటంకం లేకుండా కల కాలం ఇలానే అందించాలని కోరుకుందాం.’*
-బుద్దా మురళి(జనాంతికం 23. 6. 2017) 

16, జూన్ 2017, శుక్రవారం

అజ్ఞాన పీఠాలు కావలెను



‘‘ఏంట్రోయ్.. ఈ వయసులో ప్రేమలేఖ రాస్తున్నావా? నేను రాగానే రాయడం ఆపేశావు. కాలేజీలో ఎవడికో డబ్బిచ్చి ప్రేమలేఖ రాయించుకునే వాడివి.. నువ్వేమో అంత కష్టపడి ప్రేమలేఖలు రాయిస్తే- రాసింది సుభాష్ అని తెలుసుకుని అతని ప్రేమలో పడిన కల్పన సంగతి గుర్తుందా? ఏదైతేనేం ఇంత కాలానికైనా సొంతంగా రాస్తున్నావు.. చాలా సంతోషం’’
‘‘ఎందుకు గుర్తులేదు. ఆ సుభాష్ గాడికి బట్టతలొచ్చింది. కల్పనకు తగిన శాస్తి జరిగిందిలే..’’
‘‘తెలివైన వాళ్లకే తొందరగా బట్టతల వస్తుందని వాళ్లయన్ని మురిపెంగ చూస్తూ చెబుతుంది కల్పన.. ఆ మధ్య ఓ పెళ్లిలో కలిశాం లే. ’’
‘‘ఆ కల్పన ఎవరో అదృష్టవంతురాలు అన్నగారూ.. ఈయన ప్రేమను ఒప్పుకున్నా బాగుండేది’’
‘‘ఇంతకూ అంత రహస్యంగా ఏం రాస్తున్నావు. చిన్నప్పటి నుంచి కవిత్వం రాసేవాడివి కదా? పత్రికల్లో ఎక్కడా నీ కవిత్వం కనిపించనే లేదు’’
‘‘నాకీ పత్రికల మీద నమ్మకం లేదు. నేను ఎంతో ఆలోచించి పత్రికలకు పంపితే వాళ్లు తమ సొంత పేరుతో వేసుకుంటారనే భయంతో పత్రికలకు ఎప్పుడూ పంపలేదు. పంపితే శ్రీశ్రీ, నారాయణరెడ్డిలను మించి ఓ వెలుగు వెలిగే వాణ్ణి. మనలోమాట.. నేను కవిత్వం రాస్తే శ్రీశ్రీ, నారాయణరెడ్డి, కాళోజి , విశ్వనాథ సత్యనారాయణ ,కరుణ శ్రీ ,దాశరథిలను మించి పోనూ.. నాలాంటి వాళ్లు రాయకపోవడం వల్లే వాళ్లు మహాకవులుగా వెలిగిపోయారు. ’’
‘‘ఔనవును.. ఈ మధ్య సామాజిక మాధ్యమాల్లో కొందరు మేధావుల చర్చలు నేనూ చూశాను.. తాను శ్రీశ్రీని గుర్తించడం లేదని ఒకరు, సినారెను కవిగా గుర్తించడం లేదని ఇంకొకాయన.. గుంపులో గోవిందయ్యనో, దారిన పోయే దానయ్య లాంటి పేరు ఏదో ఉంది గుర్తు రావడం లేదు.. ఆయన తెగ రాసేశాడు.’’
‘‘నిజమే కదా? సినారె తాను పుట్టిన ఊరు గురించి కవిత రాశారు. కానీ మా పుట్టిన ఊరు గురించి రాయలేదు.. మా ఊరి గురించి రాయని ఎవరినీ నేను ఖాతరు చేయను. కనీసం మా బాబాయ్ గురించైనా రాశాడా? శ్రీశ్రీ తాజ్ మహల్ నిర్మాణానికి రాళ్ళెత్తిన కూలీలు ఎవరూ అని అడగడం ద్వారా మైనారిటీ సంతృప్తికర విధానం అవలంభించారు .. సోమనాథ్ ఆలయానికి రాళ్ళెత్తిన కూలీలు ఎవరూ అని అడగ వచ్చు కదా ? వస్తున్నాయ్.. వస్తున్నాయ్.. జగన్నాథ రథచక్రాలొస్తున్నాయ్.. ఇదేం కవిత్వమోయ్. రథాలు అంటే బూర్జువా మనస్తత్వం కదా? హిందుత్వ కాదా  ?  ఐనా ఆ రోజుల్లో ఎడ్లబండ్లు ఉండేవి కాబట్టి రథాల గురించి రాశాడు. వంద రాకెట్లను ఒకేసారి పంపిన కాలంలో ఇంకా శ్రీశ్రీ రథాలు అవసరమా? అదే నేనైతే వస్తున్నాయ్.. వస్తున్నాయ్.. బుల్లెట్ ట్రైన్‌లు వస్తున్నాయ్.. అంటూ రాసేవాడ్ని.. ’’
‘‘ నువ్వు రాసేవాడివేమో కానీ ఆ నాయకుడెవరో జిల్లాకో బుల్లెట్ ట్రైన్ అని ఎప్పుడో హామీ ఇచ్చేశారు. కవిత్వానికి, నాయకుల హామీలకు పెద్ద తేడా లేకుండా పోతుందోయ్. అయినా ఆ కవులేమైనా వార్తలు రాశారా ?  మా సామజిక వర్గం గురించి ఎందుకు రాయలేదు  అని అడిగేందుకు ... వాళ్ళు రాసింది కవిత్వం ఎంతైనా కవులకు కష్టకాలమే. కవిగారి కవిత్వం బాగుందా? నాయకుని హామీల జాబితా బాగుందా? అంటే తేల్చుకోవడం సామాన్యుడికి కష్టమే. ఆ మహాకవులు చనిపోయి బతికి పోయారు. ఉన్నా నీతో పోటీ పడలేకపోయేవారనుకో! వాళ్లకొచ్చిన నాలుగు ముక్కలేవో రాసి వదిలేసి పోయారు. వాళ్ల సంగతి వదిలేయ్! నువ్వు రాకెట్‌లొస్తున్నాయ్ అని రాయి.. వద్దన్నదెవరు? అడ్డుకునేదెవరు? నువ్వు ఇంత కాలం రాయకపోడవం వల్ల తెలుగు సాహిత్యం ఓ వజ్రాన్ని కోల్పోయిందని అం టావు. ఇంతకూ అంత రహస్యంగా ఏం రాస్తున్నావు’’
‘‘పత్రికల మీద నమ్మకం లేక ఇంత కాలం నా కవిత నా మనసులోనే ఉంచుకున్నా’’
‘‘ఏ వస్తువైనా ఎక్కువ రోజులు నిల్వ ఉంటే మురిగిపోతుంది. ఇంత కాలం దాచుకున్న కవితలు ఇప్పుడు మార్కెట్‌లోకి వదులుతావా? ఫుడ్ ఫాయిజన్ అవుతుందేమో’’
‘‘ఏడ్చావ్ లే! ఇప్పుడు కవిత్వం రాయాలంటే’’
‘‘బుర్రతో పనిలేదంటావా?’’
‘‘అప్పుడంటే పత్రికల వారి కరుణ ఉంటేనే కవిత్వం బయటికొచ్చేది. ఇప్పుడు సామాజిక మాధ్యమాల పుణ్యమాని క్షణాల్లో జనం లోకి వెళ్లిపోతున్నాయి’’
‘‘మరి అంత భయం భయంగా రాయడం ఎందుకు? జనం దాడి చేస్తారని భయమా? ‘చెల్లికి పెళ్లి.. మళ్లీ మళ్లీ’ అని రాసినందుకు అదేదో సినిమాలో ఎడిటర్‌పై రౌడీ షీటర్ కక్ష తీర్చుకున్నట్టు నీమీద ఎవడైనా దాడి చేస్తాడని భయమా?’’
‘‘అడ్రస్ ఉండదు కాబట్టి దాడి చేసే ప్రసక్తే లేదు’’
‘‘మరి ఇంకెందుకు భయం?’’
‘‘ఇప్పుడు సామాజిక మాధ్యమాల్లో మనం రాసే అన్నింటిపైనా నిఘా ఉంటోంది. ఎవరికీ చెప్పవద్దు.. నీకో రహస్యం చెబుతాను. నాపై ఎఫ్‌బిఐ నిఘా ఉంది!’’
‘‘దాన్ని ఏఫ్‌బిఐ అనరు సిబిఐ అంటారు.
అసలే భూముల రిజిస్ట్రేషన్ శాఖలో రైటర్‌గా పని చేశావు. బోలెడు వెనకేసి ఉంటావు.. కేసు సిబిఐ వద్దకు వచ్చినప్పుడు నీపై నిఘా ఉండకుండా ఎలా ఉంటుంది’’
‘‘తెలియకుండా మాట్లాడకు.. నేను చెప్పింది ఎఫ్‌బిఐ గురించే... ఈ మధ్య ట్రంప్‌ను ఏకి పారేస్తూ బోలెడు కవిత్వం రాసి పారేశాను. అప్పటి నుంచి నాపై ఎఫ్‌బిఐ నిఘా ఉందని కచ్చితమైన సమాచారం. నేనేం రాస్తున్నానో ఎఫ్‌బిఐ ఎప్పటికప్పుడు ట్రంప్‌కు సమాచారం ఇస్తూనే ఉంది. ఆయన అమెరికా అధ్యక్షునిగా పోటీ చేస్తారని చినబాబు చేసిన ప్రకటనకు మద్దతు తెలిపినప్పటి నుంచి నన్ను ఎఫ్‌బిఐ టార్గెట్ చేస్తోంది. సరే.. లోకల్‌గా సిబిఐ నిఘా నాపై ఎలాగూ ఉంటుందనుకో, సిఐడి పోలీసుల గురించి వేరుగా చెప్పాల్సిన అవసరం లేదు. కవిత్వంతో- నీళ్లలో నిప్పులు సృష్టించే సత్తా నాకుందని వీరి భయం. ఇప్పుడు అలాంటి కవిత్వం ఒకటి రాస్తున్నాను. ప్రభుత్వాన్ని పడగొట్టేందుకు కుట్ర పన్నారనే కేసు పెట్టే స్థాయి కవిత్వం రాస్తున్నా’’
‘‘విన్నవాళ్లకు విరేచనాలు అయితే.. కేసులు పెడితే ప్రభుత్వానిదా బాధ్యత?’’
‘‘విన్నవాళ్లు కాదు... ప్రభుత్వమే కేసులు పెడుతుంది చూడు’’
‘‘వచ్చావా దసరా మళ్లీ వచ్చావా. చీకటి నిండిన మా జీవితాల్లో ... ఇదేనా నీ కుట్ర కవిత. ఈ కవిత ఇంతకు ముందు విన్నట్టుగా ఉంది’’
‘‘మనిషన్నాక కాసింత కవితా జ్ఞానం ఉండాలి. ఇది కొత్త కవిత.. నువ్వు విన్నది వచ్చావా ఉగాది మళ్లీ వచ్చావా? అనే కవిత.. ఉగాదికి, దసరాకు తేడా తెలియదు నువ్వేం మనిషివోయ్ కవిత్వం గురించి కొంతైనా అవగాహన లేకపోతే ఎలా? ’’
‘‘ఎలా ఉంది నా కవిత?’’
‘‘తెలుగువాళ్లకు మూడు జ్ఞానపీఠ్‌లు వచ్చాయి చాలు ... కానీ నీ వాదన విన్నాక, నీ కవిత చదివాక మనకు అజ్ఞానపీఠ్‌లు చాలా రావలసి ఉంది అనిపిస్తోంది’’
*
-బుద్దా మురళి( జనాంతికం 16. 6. 2017)

9, జూన్ 2017, శుక్రవారం

మీరు.. ప్లాస్టిక్ మనుషులా?

‘‘రండి.. అన్నయ్య గారూ రండి.. భోజనాల సమయానికి వచ్చారు. భోజనం చేసి వెళ్లండి’’
‘‘వద్దులేమ్మా ఉదయం ఇంట్లోంటి బయటకు వచ్చేప్పుడే కడుపునిండా తినే వ చ్చాను’’
‘‘అదేంటోయ్ చెల్లెమ్మ ఇప్పుడే ఫోన్ చేసి చేసింది. కనీసం పచ్చి మంచి నీళ్లు కూడా ముట్టకుండా ఉదయమే రోడ్డున పడ్డావని చెప్పింది.’’
‘‘అలా చెప్పి తగలడిందా? అదంతేలేవోయ్.. నేను బకాసురుడిలా రోజుకు నాలుగైదు సార్లు తింటాను అనుకుంటుంది. నీమీదొట్టు.. తినే వచ్చాను’’
‘‘ఒట్టు నా మీదెందుకులే? ’’
‘‘భోజనం చేయక పోతే  వేడివేడి ఎగ్ ఆమ్లేట్ వేస్తాను తినండి అన్నయ్య గారూ...’’
‘‘అయ్యో.. నీకీ విషయం ఇప్పటి వరకు తెలియదా? నేను గండర గండ స్వామి దీక్ష పట్టాను. ఈ దీక్షలో ఉన్న వాళ్లు గుడ్డును దూరం నుంచి కూడా చూడకూడదు. ’’
‘‘మనిషి మాంసం తప్ప అన్నీ తింటావు అంటారు.. నీ గురించి తెలిసిన వాళ్లు.. అదేంటిరా.. గుడ్డు కూడా తినకుండా ఎలా ఉంటావు?’’
‘‘మంచి నీళ్లయినా తాగుతావా? ఇదిగో ప్లాస్టిక్..’’
‘‘ఏంటీ.. ప్లాస్టిక్ నీళ్లు కూడా వచ్చేశాయా? ’’
‘‘నీ భయం పాడుగానూ.. ప్లాస్టిక్ బాటిల్‌లో నీళ్లు అని పూర్తిగా చెప్పక ముందే అలా ఉలిక్కి పడుతున్నావ్. ప్లాస్టిక్ గుడ్లు వచ్చాయనే భయమే కదా.. ఏదీ ముట్టడం లేదు’’
‘‘ప్లాస్టిక్ సర్జరీ నిజం అయినప్పుడు ప్లాస్టిక్ బియ్యం నిజం ఎందుకు కాదు?’’
‘‘వెనకటికొకడు దేవుడ్ని ప్రార్థించి తాను ఏది ముట్టుకున్నా బంగారం కావాలని వరం కోరుకున్నాడు. దాంతో వాడు ఏది ముట్టుకున్నా బంగారం అయింది. చివరకు తిందామని అన్నాన్ని ముట్టుకున్నా, తాగుదామని మంచినీళ్లు ముట్టుకున్నా బంగారం అయింది. దేవుడు వరాలు ఇస్తాడు కానీ తీసుకోడు కదా? ఈ వరం నాకు వద్దు దేవుడా? అని ఎంత మొత్తుకున్నా లాభం లేకపోయింది. అన్నం, నీళ్లు లేక బంగారంతోనే కన్ను మూశాడు’’
‘‘నువ్వే కాదు.. చిన్నప్పుడు ఈ కథ నేనూ చదివాను. నాకెందుకు చెబుతున్నావు?’’
‘‘నిన్ను చూస్తే వాడు బంగారంతో చచ్చిపోయినట్టు, ప్లాస్టిక్ నీ ప్రాణం తీస్తుందేమో అనిపిస్తోందిరా! మా ఇంట్లో ప్లాస్టిక్ బియ్యంతో వండిన అన్నమే అనుకుందాం. మరి మీ ఇంట్లో అన్నం ప్లాస్టిక్ బియ్యంది కాదని నమ్మకమేంటి? చివరకు ఎక్కడ అన్నం చూసినా నీకు ప్లాస్టిక్ కనిపిస్తుంది. తినలేవు, తినకుండా ఉండలేవు. ప్లాస్టిక్‌ను తిన్నాననే భావనతో కుంగి కృశిస్తావు. తిన్నా , తినకున్నా బతకలేవు’’
‘‘చూసిందాన్ని కూడా నమ్మవా? వీడియోలు చూపిస్తా చూడు’’
‘‘అదేదో సినిమాలో జూనియర్ ఎన్టీఆర్, సీనియర్ ఎన్టీఆర్ కలిసి డ్యాన్స్ చేశారు తెలుసా?’’
‘‘ఎలా సాధ్యం? సీనియర్ ఎన్టీఆర్ చనిపోయిన చాలా కాలానికి జూనియర్ హీరో అయ్యాడు కదా? ఐనా మనం మాట్లాడుకునే దానికి దీనికి సంబంధం ఏంటోయ్ ’’
‘‘చిన్నప్పుడు చక్కరను భూమిలో పాతి పెడితే చక్కెర పండుతుందని, విరిగిపోయిన పన్ను పాతిపెడితే బంగారం అవుతుందని అందరం గట్టిగా నమ్మేవాళ్లం ’’
‘‘అంటే అసలు కల్తీనే లేదంటావా? ’’
‘‘అవేం అపశకునపు మాటలు. కల్తీ లేని వస్తువే లేదు. కాలుష్యం, కల్తీ లేని జీవితమే లేదు.’’
‘‘అంటే వీడియో కూడా నమ్మవా? ’’
‘‘మరి నేను ఏకంగా జూనియర్, సీనియర్ ఎన్టీఆర్‌లు కలిసి డ్యాన్స్ చేసింది చూపిస్తా అన్నా నమ్మడం లేదు’’
‘‘ఆమ్లేట్ తినను అన్నందుకు ఇంత క్లాస్ తీసుకుంటావా?’’
‘‘సరే కోడిగుడ్డు గురించే మాట్లాడుకుందాం. హోల్‌సేల్ మార్కెట్‌లో కోడిగుడ్డు ధర మూడున్నర రూపాయలు’’
‘‘చైనా వాళ్లను నమ్మేందుకు వీలు లేదు. వాళ్లు ప్లాస్టిక్ గుడ్లను ఇండియాకు పంపిస్తున్నారు. ఇది ముమ్మాటికీ నిజం. వీడియోలు ఉన్నాయి. నువ్వు చైనాకు ఏజెంట్‌వేమో అని నా అనుమానం. పూర్వం సోవియట్ రష్యాలో ప్రతి ఒక్కరూ ఏజెంట్లుగా ఉండేవారట! రష్యా పతనం తరువాత ఇప్పుడు చైనా వాడిదే పెత్తనం పెరిగింది కదా? ఎవరు ఏజంటో, ఎవరు దేశద్రోహినో తెలియడం లేదు. ’’
‘‘ఔను.. చైనావాళ్లు పిల్లికళ్లతో ఉంటారు. వాళ్లు ఏమైనా చేయగలిగిన వాళ్లు.. గుడ్లు ఎందుకు పెట్టరు. ఒలింపిక్స్‌లో స్వర్ణ పతకాల కోసం పిల్లలను మర మనుషులుగా, బొమ్మలుగా మార్చి శిక్షణ ఇచ్చే వాళ్లు వ్యాపారం కోసం గుడ్లు పెట్టినా పెడతారు. వాళ్లే స్వయంగా రోజూ కొన్ని వందల గుడ్డు పెడుతున్నారు అనుకుందాం. ఆ గుడ్లను ఇండియాకు రహస్యంగా ఎలా తెస్తారు?’’
‘‘చైనా వాళ్లు గుడ్లు పెడతారు అని నేను అనడం లేదు. ప్లాస్టిక్ గుడ్డను పరిశ్రమల్లో తయారు చేసి పంపిస్తారు అంటున్నాను’’
‘‘ఏదైనా ఒకటే. మూడున్నర రూపాయలకు హోల్‌సేల్ మార్కెట్‌లో గుడ్డు దొరికితే, చైనావాడికి ఒక ప్లాస్టిక్ గుడ్డు తయారు చేసేందుకు ఎంత ఖర్చవుతుంది. దానిని ఇండియాకు దొంగచాటుగా ఎలా తెస్తారు? తేవడానికి ఎంత ఖర్చు. ప్లాస్టిక్ గుడ్లు చైనా నుంచి మన కంచం వరకు చేరాలి అంటే ఎంత మంది సహకరించాలి’’
‘‘నీకు ఇండియా కన్నా చైనాపైనే ప్రేమ ఎక్కువ కనిపిస్తోంది’’
‘‘నా ప్రేమ సంగతి తరువాత.. మన దేశ సరిహద్దులు దాటి ప్లాస్టిక్ బియ్యం, ప్లాస్టిక్ గుడ్లు , ప్లాస్టిక్ క్యాబేజీలు, ప్లాస్టిక్ మంచి నీళ్లు, చివరకు మనం పీల్చే ప్లాస్టిక్ గాలి చైనా నుంచి దేశంలోకి వస్తోంది అంటే మన దేశ ప్రజల కన్నా చైనా ఏజెంట్లే ఎక్కువ మంది ఉండాలి.’’
‘‘ ఇంతకూ ఏమంటావు?’’
‘‘ నువ్వనుకునేది నిజం.. అయితే ఈ దేశభద్రత ప్రమాదంలో పడినట్టు నేను అనుకున్నది నిజం అయితే మనిషి మనుగడ ప్రమాదంలో పడ్డట్టు..’’
‘‘అర్థం కాలేదు’’
‘‘డజను మంది టెర్రరిస్టులు వస్తేనే దేశం అల్లకల్లోలం అవుతుంది. కోట్లాది మంది తినే బియ్యం, గుడ్లు ప్లాస్టిక్‌వి యథేచ్ఛగా వస్తున్నాయంటే దేశ భద్రత ప్రమాదంలో పడ్డట్టే.. ప్లాస్టిక్ బియ్యం అబద్ధం అని టీవీ చానల్ వారికి తెలుసు.. సంచలనం కోసం ప్రసారం చేస్తున్నారు అని అనుకుంటే ఒక వార్త కోసం దేశాన్ని కూడా తాకట్టు పెడతారేమో అని భయం వేస్తోంది. ’’
‘‘అంతా కనూఫ్యూజ్డ్‌గా ఉంది. నిజం చెప్పండి.. మీ భార్యాభర్తలు ఇద్దరు నిజంగా మనుషులా? ప్లాస్టిక్ మనుషులా? ’’ 
‘‘మీ సంబరాన్ని నేనెందుకు కాదనా లి .. స్కై లాబ్  పడితే తో  భూమి పై ఉన్న వారంతా  పైకి పోతా రని మన చిన్నప్పుడు కూడా నమ్మి ఓ నెల రోజులు ఇవే చివరి రోజులు అని సంతోషంగా గడిపాం. 1999 లో యుగాంతం అని గట్టిగా వినిపించింది .. తరువాత తోక చుక్క అటు ఇటూ తోక ఊపుతుంది ఆ తోక తాకితే అంతే అని తెగ ప్రచారం జరిగింది 2000 సంవత్సరం రాగానే 2 కె సమస్యతో విమానాలు ఆకాశం లో నిలిచి పోతాయి.  ఆస్పత్రుల్లో ఆపరేషన్ లు ఆగి పోతాయి  కంప్యూటర్ తో పాటు మన గుండె ఆగిపోతుంది అంటే  నమ్మలేదా ? అబద్దం అయినా నమ్మామ్ . నమ్మకమే జీవితం నమ్మితే కాస్త మజానే కానీ పోయేదేముంది నమ్ముదాం ’’*
-బుద్దా మురళి(జనాంతికం 9. 6. 2017)

27, మే 2017, శనివారం

వర్ణవివక్ష.. మేధావుల నిరసన

‘‘అంత ఆసక్తిగా చూస్తున్నావు.. ఎంసెట్ రిజల్ట్స్‌నా? ’’
‘‘ఎంసెట్, ఐఐటి రిజల్ట్స్‌లో ఆసక్తి ఏముంటుంది? ర్యాంకులన్నీ మనవాళ్లేకే కదా! జనసేన పార్టీ రిక్రూట్‌మెంట్ టెస్ట్ ఫలితాలు చూస్తున్నా. అందరికీ తెలిసిన ప్రశ్నలకు- పవన్‌కల్యాణ్ మదిలో ఉన్న సమాధానాలు ఏంటో ఊహించి రాయడం కష్టం ’’
‘‘ప్రశ్నించేందుకే పార్టీ.. అంటే ఇదేనా? మనమే అర్థం చేసుకోలేదు.’’
‘‘మన ఆరుగురు మేధావులం - వర్గ పోరాటానికి ఆస్కారం లేని వాటిపై మాట్లాడుకుందాం. ఇది కాలనీ పార్కు. న్యూస్ చానల్స్ చర్చలో అయితే ఎంత గట్టిగా చర్చించినా, కొట్టుకున్నా ఓకె ’’
‘‘ఆరుగురు మేధావులం అని మీకు మీరే చెప్పుకుంటే సరిపోదు. ఇక్కడున్న అందరం ఒప్పుకోవాలి. ఓ వార్త చెప్పనా?’’


‘‘నువ్వేం చెప్పబోతున్నావో నాకు తెలుసు. బాబు అమెరికాలో విస్తృతంగా తిరుగుతుంటే అమెరికా అధ్యక్షుడిగా పోటీ చేస్తున్నారా? అని అక్కడి వారు చినబాబు లోకేశ్‌ను అడిగిన విషయం గురించే కదా? సాటి తెలుగువాడు ఎదుగుతుంటే సహించలేవా? ఏం.. తెల్లవాడు వందల ఏళ్లు ప్రపంచాన్ని పాలిస్తే భరించవచ్చు కానీ ఓ తెలుగువాడు అమెరికా వెళ్లి ఆ దేశానికి అధ్యక్షుడిగా ఎన్నికైతే తప్పా? ఇదేం వివక్ష?’’
‘‘ట్రంప్.. తుంటరి తనం తగ్గించుకో.. నీకే ప్రమాదం- అని చెబుతూనే ఉన్నాం.. చెప్పంగ వినని వాడిని చెడంగ చూడాలి అంటారు. ఉంటే గింటే ట్రంప్‌కు భయం కానీ నాకెందుకు? ఆంధ్రకు లోకేశ్, తెలంగాణకు కెసిఆర్, దేశానికి మోదీ ఉన్నారు. తెంపరి ట్రంప్, తుంటరి కొరియా ప్రపంచాన్ని వణికిస్తున్నప్పుడు ఒక తెలుగువాడు అమెరికా పగ్గాలు చేపట్టి ప్రపంచాన్ని దారిన పెడితే సంతోషమే’’


‘‘ఇంతకాలం ప్రపంచంపై వాళ్లు పెత్తనం చేస్తే మనం సహించలేదా? ఇప్పుడు పెత్తనం చెలాయించే అవకాశం మాకొచ్చింది. ఖానూన్‌కే హాత్ బహత్ లంబే హోతా హై... అమెరికా తక్ బీ హోతాహై.. పితాశ్రీ పరంతూ..’’
‘‘దానికీ, దీనికి సంబంధం ఏంటి?’’
‘‘నాకూ తెలియదు. నాకు హిందీలో ఆ రెండు మూడు మాటలే వచ్చు. హిందీ సినిమాలు, మహాభారత్ సీరియల్ చూసి నేర్చుకున్నాను. కాస్త గంభీరమైన మాటలు కదా? అని వాడేశాను.’’
‘‘ఇక్కడ హిందీ ఎవరికీ రాదు. ఫరవాలేదు. ’’
‘‘హలో.. వౌనంగా ఉన్న నువ్వే కాదు.. ఇక్కడ మేం కూడా మేధావులమే. నువ్వొక్కడివి ఏదో దీర్ఘాలోచనలో ఉన్నట్టు ఆ పోజు ఏంటి? ’’
‘‘మీ మాటలు చూస్తే మీరెవరూ అసలు విషయాన్ని గ్రహించలేదనిపిస్తోంది. తెలంగాణలో విప్లవం రాబోతుంది. ఇప్పటి వరకు వేరు. ఇక నుంచి వేరు. ఎపిటి మేధావి జెఎసి రంగంలోకి దిగనుంది. కెసిఆర్‌కు కష్టకాలం మొదలైంది.’’
‘‘ఎపిటి జెఎసినా? మొదటిసారి వింటున్నా?’’
‘‘ఇంకా ఇది బయటకు రాలేదు. ఆంధ్రా మేధావి సంఘం , తెలంగాణ మేధావి సంఘం ఈ రెండూ కలిస్తే ఒక్కసారి ఊహించుకో’’
‘‘అంతా అయిపోయిన తరువాత నువ్వు మళ్లీ సమైక్యాంధ్ర వాదం వినిపిస్తున్నట్టుగా ఉంది. రెండూ ఎలా కలుస్తాయి?’’
‘‘మొన్న ధర్నా చౌక్ వద్ద ధర్నాకు ఆంధ్రా మేధావి సంఘం నేత రాలేదా? ధర్నాలో ఆంధ్రా మేధావులు, తెలంగాణ మేధావులు కలిసి ఎపిటి మేధావి జెఎసి ఏర్పాటు చేస్తే అప్పుడుంటుంది సినిమా..’’
‘‘ఔను.. భయం పట్టుకుంది కాబట్టే పోలీసులతో పాలించాలని చూస్తున్నారు. పోలీసులకు వందల కోట్ల బహుమతులు ప్రకటిస్తున్నారు. వందల ఉపగ్రహాలను ఒకేసారి ప్రయోగిస్తున్న ఈ కాలంలో, అమెరికాలో ఐటి రంగం మొత్తం తెలుగు వారి చేతుల్లో ఉన్న ఈ రోజుల్లో ,ఒక తెలుగు సినిమా 15 వందల కోట్ల రూపాయలు వసూలు చేసిన ఈ కాలంలో ఇంకా పోలీసులు అవసరం అంటారా? ’’


‘‘పోలీసులు గనుక లేకపోతే శాంతిభద్రతల బాధ్యత మావోస్టులదా? ’’
‘‘మన దేశ బడ్జెట్‌లో భారీ వాటా రక్షణ రంగానిదే. అసలు యుద్ధం వస్తుందో లేదో తెలియదు కానీ వేల కోట్ల రూపాయలు రక్షణ రంగానికి అవసరమా? అసలీ దేశానికి సైన్యం అవసరమా?’’
‘‘ బాగా చెప్పారు. నా రాష్ట్రం, నా దేశం, నా ఖండం అంటూ ఎక్కడికెళుతున్నాం? విశ్వమానవులుగా ఉండలేమా? దేశాల మధ్య గోడలను కూల్చేయండి’’
‘‘ఏదో కూల్చమంటున్నారు. మా అల్లుడు ఈ మధ్యనే ప్రొక్లెయిన్ కొన్నాడు. కూల్చివేత పనులు ఏవైనా మా అల్లుడికే ఇవ్వాలి.. అలా అయితేనే మీకు నా మద్దతు ఉంటుందని చెబుతున్నాను.’’
‘‘ఉండవయ్యా ప్రతి దానిలో నువ్వు వ్యాపారం వెతుకుతావు. అప్పుడెప్పుడో బెర్లిన్ గోడ కూల్చారని కిరణ్‌కుమార్‌రెడ్డి ఇటుక ముక్క జేబులో పెట్టుకుని తిరిగినట్టు. ఇక్కడ దేశాల మధ్య గోడలు కూల్చడం అంటే కవి హృదయం- అన్ని దేశాలూ ఒకటి కావాలని అంతే. నిజంగా కూల్చేందుకు గోడలేమీ లేవు.’’
‘‘మరి దేశ రక్షణ బాధ్యత టెర్రరిస్టులు చూసుకుంటారా? ’’
‘‘మరీ అంత సంకుచితంగా హిందుత్వ వాదంతో ఆలోచించకండి విశ్వమానవుడిగా ఆలోచించాలి. దేశానికి హద్దులే ఉండనప్పుడు సైన్యం అవసరమే ఉండదు’’


‘‘అడగడం మరిచిపోయాను. మీ ఇంటి కాంపౌడ్ వాల్ నిర్మాణం ఎంత వరకు వచ్చింది? ’’
‘‘దొంగలు ఎక్కువయ్యారు. ఒక్క పురుగు కూడా లోనికి రాకుండా కాంపౌడ్ వాల్, గ్రిల్స్ ఏర్పాటు చేశారు. ఖర్చు అయితే అయింది కానీ ’’
‘‘అది సరే.. ఏదో అద్భుతమైన సంగతి అన్న పెద్దాయన మళ్లీ వౌనంగా ఉండిపోయాడు, ఏంటో అది చెప్పండి’’
‘ ధర్నా చౌక్ 
వంటి చిన్నా చితక సమస్యలను పట్టుకొని ఎన్నాళ్లు రోడ్డున పడతారు. అంతర్జాతీయ సమాజం దృష్టిని ఆకర్శించే ఐడియా ఉంది’’
‘‘ప్లీజ్ చెప్పు.. ఉత్తమ్‌కుమార్‌రెడ్డి గడ్డం బాధ చూడలేక పోతున్నాం.’’
‘‘చెబుతా చెబుతా.. వర్ణ వివక్ష తెలుసా? వర్ణవివక్షకు పాల్పడితే అంతర్జాతీయ సమాజం ముందు తల వంచుకోవాలి. ’’
‘‘తెలుసు? ఐతే ’’
‘‘కేసిఆర్ ముఖ్యమంత్రిగా ప్రమాణ స్వీకారం చేసినప్పుడు ఏ రంగు దుస్తులు వేసుకున్నారు?’’
‘‘తెలుపు’’
‘‘గణతంత్ర దినోత్సవం, స్వాతంత్య్ర దినోత్సవం, రాష్ట్ర ఆవిర్భావ దినోత్సవం నాడు..? ’’


‘‘అన్ని రోజులూ తెలుపే.. అయితే..?’’
‘‘సప్తవర్ణాలు ఉండగా, తెలుపు దుస్తులు మాత్రమే వేసుకోవడం అంటే వర్ణవివక్ష చూపడమే కదా? దీనిపై మనం కోర్టుకు వెళితే అంతర్జాతీయ సమాజం ముందు.. మనం మనసు పెట్టి ఆలోచిస్తే ఇలాంటివి ఇంకా చాలా కనిపిస్తాయి. ’’
‘‘ నువ్వే కాదు .. నేను .. మనం అందరం మేధావులమేనని ఒప్పుకుంటున్నాం.’’

బుద్దా మురళి (జనాంతికం 26. 5. 2017)

19, మే 2017, శుక్రవారం

‘లో బడ్జెట్’ పార్టీ!లు

‘‘పార్టీ అన్నావు, పదిమందిని పిలిచావు. ఇక్కడ పార్టీకి కావలిసిన ఆయుధాలు ఏమీ కనిపించడం లేదు. ఇంతకూ పార్టీ ఉందా? లేదా?’’
‘‘పార్టీ ఉంది. కానీ- మీరనుకుంటున్న మందు పార్టీ కాదు, నాదగ్గరో బ్రహ్మాండమైన ఐడియా ఉంది. మందు పార్టీతో ఒక్క రోజు కిక్కు.. కానీ అదే కిక్కు ఏళ్ల తరబడి ఉండాలంటే రాజకీయ పార్టీ అవసరం. మనమంతా కలిసి ఓ రాజకీయ పార్టీ పెట్టబోతున్నాం. దాంతో మనకు రోజూ ఆరోగ్యకరమైన, ఆదాయకరమైన కిక్కు’’
‘‘రోజుకో పార్టీ పుడుతోంది. కోన్‌కిస్కా మనం పార్టీ పెడితే పట్టించుకునేదెవరు? మరీ జోక్ చేస్తున్నావ్’’
‘‘నువ్వు పంజాగుట్ట నుంచే వచ్చావు కదా? దారిలో అంబానీ రిలయన్స్ ప్రెష్, బాబు హెరిటేజ్ మాల్, బజాజ్ మోర్ కనిపించాయి కదా? మన గల్లీలోకి వచ్చాక సుబ్బయ్య కిరాణా షాపు ఉంది. అంబానీ రిలయన్స్‌లో ఆకుకూరలు అమ్ముతున్నారని- ఇంటింటికీ తిరిగి గంపలో ఆకుకూరలు అమ్మే మంగవ్వ భయపడి వ్యాపారం మానేసిందా? అంబానీ కస్టమర్లు అంబానీకి, మంగవ్వ కస్టమర్లు మంగవ్వకుంటారు. హెరిటేజ్ కస్టమర్లు హెరిటేజ్‌కు, సుబ్బయ్య తాత కిరాణా షాప్ కస్టమర్లు సుబ్బయ్య కుంటారు. అలానే పెద్ద పెద్ద పార్టీలకు వాళ్ల వ్యాపారం వాళ్లకుంటుంది. మనం పెట్టే చిన్న పార్టీ వ్యాపారం మనకుంటుంది.’’
‘‘అంత ఖర్చు మనం భరించగలమా? ’’
‘‘ఇంకా ఏ లోకంలో ఉన్నావురా? బాహుబలి సినిమా టికెట్ ఖరీదంత ఖర్చు కూడా కాదు పార్టీ పెట్టాలంటే. ఒక్క టికెట్ ఖర్చుతో మనం పది మందిమి కలిసి పార్టీని ఎలక్షన్ కమిషన్ వద్ద రిజిస్టర్ చేయించుకోవచ్చు.’’
‘‘పార్టీ అంటే సొంత మీడియా ఉండాలి లేదా మీడియా మేనేజ్‌మెంట్ తెలియాలి కదా?’’
‘‘అవి అధికారంలో ఉన్న, అధికారంలోకి రావాలనుకున్న పార్టీలకు కనీస అవసరాలు. అవి బాహుబలి బడ్జెట్ పార్టీలు, మనది లో బడ్జెట్ పార్టీ. ట్విట్టర్‌లో, ఫేస్‌బుక్‌లో ఏ ఖర్చూ లేకుండానే మన పార్టీ సిద్ధాంతాలను జనానికి చెప్పేయవచ్చు. మహా మహా పవర్ స్టార్లే ట్విట్టర్‌లో మూడేళ్ల నుంచి పార్టీ నడిపేస్తున్నాడు. మనం నడపలేమా? ’’
‘‘ఉద్యోగంలో ఉన్నప్పుడు నాలుగు చేతులా సంపాదించి వెనకేసుకున్నాం.. మనం పార్టీ పెడితే సిబిఐ దాడి జరిగే ప్రమాదం లేదంటా వా?’’
‘‘మరీ నిన్ను నువ్వు ఎక్కువగా అంచనా వేసుకోకు.. మోదీ పనీపాటా లేకుండా ఉన్నాడనుకున్నా వా? ఒక్క చోట కూడా డిపాజిట్ రాని మన పార్టీని పట్టించుకునేంత తీరిక ఆయనకు లేదు. చిన్నపామునైనా పెద్ద కర్రతో కొట్టాలన్నట్టు కొన ఊపిరితో ఉన్న విపక్షాలు ఏకం అవుదామనే ఆలోచన కూడా రాకుండా చేసేందుకే మమత,లాలూ,చిదంబరంలపై సిబిఐ దాడులు. వీరి కూటమిలోకి ఎవరు వచ్చే అవకాశం ఉంటే వాళ్లపైనా సిబిఐ దాడులు జరుగుతాయి.. కానీ- డిపాజిట్ రాని మనపై కాదు.’’
‘‘డిపాజిట్ కూడా రాదని నువ్వే గ్యారంటీ ఇస్తూ, పార్టీ పెడదామని కూడా నువ్వే అంటున్నావు.. ఇదేం డబుల్ స్టాండర్డ్?’’
‘‘పార్టీ పెడదాం అన్నాను.. కానీ అధికారంలోకి వస్తాం అని చెప్పానా? ఏదో కాలక్షేపం, రిటైర్‌మెంట్ తర్వాత కాసింత ఆదాయం, కాసింత గుర్తింపు కోసం పార్టీ కానీ, అధికారం కోసమా? తెలిసిన వాళ్లుంటే టీవీ చానల్‌లో చర్చలకు పిలుస్తారు . మనవలు, మనవరాళ్లు టీవీలో అదిగో.. మా తాతయ్య.. అని మురిపెంగా చెప్పుకుంటారు. అఖిలపక్ష సమావేశం అని పిలిస్తే మధ్యలో దూరిపోవచ్చు. ఎన్నికల ముందు ఎలక్షన్ కమిషన్ పిలుస్తుంది. జీడిపప్పు, స్వీట్, సమోసా అధికారులు అందిస్తుంటే తినడంలో ఆ మజానే వేరు.’’
‘‘అంటే జీడిపప్పు కోసం పార్టీనా?’’
‘‘అదొక్కటే కాదు.
రిటైర్ అయ్యాక ఇంట్లో భార్యా పిల్లలు కూడా మనను పట్టించుకోవడం లేదు
కానీ మనం టీవీ లో ట్రంప్ దుందుడుకు తనం కొరియా తెంపరి తనం మోదీ దూకుడు గురించి శూన్యం లోకి చూస్తూ గడ్డం నిమురుకుంటూ మాట్లాడుతుంటే ఎలా ఉంటుంది ఓ సారి ఊహించుకో . ఎవరైనా చనిపోతే మనమూ సంతాప సందేశం పం పొచ్చు, దేశంలో ఎక్కడేం జరిగినా మనం ఖండిచవచ్చు. హర్షించవచ్చు. ఆ చాన్స్ పార్టీలకే ఉంటుంది. వందల కోట్ల అస్తి పరులకు ఉండదు. త్రిబులెక్స్ సబ్బులకు పట్టణాల వా రీగా డీలర్లను నియమించినట్టు మనం ఔత్సాహికులను పట్టణాల వారీగా నియమించవచ్చు. ’’
‘‘వాళ్లకు డబ్బులివ్వాలేమో అని అనుకోవద్దు.. ఆ అవసరం లేదు. మనం వాళ్లను వాటాలు అడక్క పోతే చాలు లెటర్ హెడ్‌తో వాళ్ల స్వయం ఉపాధి మార్గాలు వాళ్ళు వెతుక్కుంటారు.’’
‘‘ఈరోజుల్లో క్రిమినల్స్‌కు మంచి క్రేజ్ ఉంది కదా? మన పార్టీలోకి కనీసం లోకల్ రౌడీనైనా ఆహ్వానిస్తే బాగుంటుందేమో?’’
‘‘హాజీమస్తాన్ అని పెద్ద స్మగ్లర్. ఆయన ఆత్మకథలతో బాలివుడ్‌లో ఎన్నో సినిమాలు వచ్చాయి. నేర సామ్రాజ్యానికి మకుటం లేని మహారాజు. తన పాపులారిటీ చూసుకొని మురిసిపోయి రాజకీయ పార్టీ పెట్టి ఎందుకూ పనికి రాకుండా పోయాడు. అప్పటి వరకు ఆయనంటే భయంతో వణికిపోయిన వారు పట్టించుకోవడం మానేశారు. దీన్ని బట్టి నీకు అర్థం కావలసింది ఏమంటే రాజకీయాల్లోకి వచ్చిన తర్వాత నేరాలు చేస్తేనే క్రేజ్ ఏర్పడుంది. నేరాలు చేసి రాజకీయాల్లోకి వస్తే ఎవరూ పట్టించుకోరు. ’’
‘‘మీరంతా ఒప్పుకున్నట్టే కదా? అదే మేధావులు, మాజీ మావోయిస్టులు అయితే ఏకాభిప్రాయం కుదరక పార్టీ ఏర్పాటు వేదికపైనే భిన్నాభిప్రాయాలతో చీలిపోయి. వేదికను రెండు ముక్కలు చేసి చేరో ముక్కతో వెళ్లిపోతారు.’’
‘‘పార్టీ అన్నాక దానికో పేరుండాలి కదా?’’
‘‘బాగా ఆలోచించాను. ప్రజల పార్టీ అని పెడదాం తిరుగుండదు. కానీ- తెలంగాణ రాష్ట్ర సమితి టైటిల్ పక్క రాష్ట్రంలో పని చేయదు. తెలుగుదేశం తమిళనాడుకు విస్తరిద్దాం అంటే పేరే అడ్డంకిగా మారింది. ప్రజల పార్టీ అంటే దేశంలో ఎక్కడైనా బ్రాంచీలు ఏర్పాటు చేయవచ్చు. మహిళలు, పురుషులు, వృద్ధులు, ఎస్సీ, ఎస్టీ, ఓసి, బిసి, మైనారిటీలకు ప్రాధాన్యత మా పార్టీ సిద్ధాంతం అని ప్రకటించేద్దాం. ’’
‘‘అందరికీ ప్రాధాన్యత అన్నావు కదా ఇక మిగిలింది ఎవరు? ’’
‘‘పెద్ద పెద్ద పార్టీలన్నీ ఇలానే చెబుతాయి. అలా చెప్పడం ఓ ఆనవాయితీ’’
‘‘ పార్టీ రిజిస్ట్రేషన్ ఖర్చు అందరం సమానంగా భరిద్దాం. ఆదాయంలోనూ సమానంగా పంచుకుందాం.. ఈ ఉమ్మడి ప్రకటన మీద మీరంతా సంతకం చేయండి ’’
ఇంత కాలం రాజకీయ పార్టీలు తమ స్వార్థం చూసుకున్నాయి కానీ ప్రజలను పట్టించుకోలేదు. ప్రజల కోసం ప్రజల పార్టీ ఏర్పాటు చేస్తున్నాం అని సగర్వంగా ఉమ్మడి ప్రకటన చేస్తున్నాం. జై ప్రజల పార్టీ..
*బుద్దా మురళి (జనాంతికం 19. 5. 2017)

12, మే 2017, శుక్రవారం

జగన్ మోదీ జుగల్ బందీ

‘‘నీకీ విషయం తెలుసా..?’’
‘‘చెప్పదలుచుకున్న విషయం వాస్తవమే అనే నమ్మకం నీకుంటే చెప్పు..’’
‘‘ఏ కాలంలో ఉన్నావోయ్..? వాట్సప్‌లో వచ్చింది చెప్పడమే తప్ప నిజానిజాలు ఎవడిక్కావాలి? సరే ముందు విషయం విను. తనపై ఉన్న కేసుల విషయమే వైకాపా అధినేత జగన్ దిల్లీలో ప్రధాని మోదీని కలిశారు’’
‘‘అంటే మోదీ కేసులను ఎత్తేసే దుకాణం పెట్టారా? మోదీ న్యాయమూర్తి కాదు, కనీసం న్యాయవాది కూడా కాదు, ప్రధానమంత్రి అయిన ఆయన కేసులెలా ఎత్తేస్తారు?’’
‘‘మరీ అమాయకంగా మాట్లాడకు.. అధికారం చేతిలో ఉంటే ఏమైనా చేయవచ్చు ’’
‘‘వామ్మో పెళ్లయిన బ్రహ్మచారి.. మిగిలిన నాయకుల్లా కాదు నిప్పులాంటి మనిషి అనుకున్నాం. ఈయనా అంతేనా? కేసులు ఎత్తెయడానికి తలూపడంపై మీరు ఉద్యమించాల్సిన అవసరం ఉంది’’
‘‘ఏయ్ ఆగు.. నేనేం చెబుతున్నాను.. నువ్వేమంటున్నావ్. కేసులు ఎత్తేయించుకోవడానికే మోదీ వద్దకు జగన్ వెళ్లాడంటున్నాం.. కానీ మోదీ కేసులు ఎత్తేశాడని చెప్పడం లేదు. మిత్రపక్షంగా ఉండి, అసలే కష్టాల్లో ఉన్న మేం మోదీని అంత మాటంటామా? ’’
‘‘ ఔను! అంటే ఊరుకోవడానికి ఆయనేమన్నా కాంగ్రెస్ నాయకుడా? అసలే గుజరాతీ.. ఆపై బిజెపి.. ఆయనతో వ్యవహారం అల్లాటప్పా కాదు. గోదాముల్లో బూజు పట్టిన కేసుల దుమ్ము దులిపి బయటకు తీస్తున్నారు. తమిళనాడులో పట్ట్భాషేకానికి సిద్ధమవుతున్న చిన్నమ్మ తలవంచక పోవడంతో జైలుకు వెళ్లాల్సి వచ్చింది. అదేదో ‘ప్రత్యామ్నాయ కూటమి’కి సిద్ధం అవుతుంటే బిహార్ మాజీ సిఎం, ఆర్‌జెడి పార్టీ అధినేత లాలూప్రసాద్ యాదవ్ చేత- ఎప్పుడో దశాబ్దాల క్రితం మింగిన గడ్డిని ఇప్పుడు కక్కిస్తున్నారు. దశాబ్దాల కేసులు బయటకు తీసే చాన్స్ ఉన్నప్పుడు- తాజా లైవ్ స్టోరీ ‘ఓటుకు నోటు’ కేసును బయటకు తీయడం పెద్ద కష్టమా?’’
‘‘మనలోమాట.. జగన్‌కు మోదీ అపాయింట్‌మెంట్ ఎందుకిచ్చినట్టు?’’
‘‘జగన్- చంద్రబాబుకు ప్రత్యర్థి కానీ మోదీకి కాదు. లాజిక్ అర్థం చేసుకోవాలి. మిత్రుడి శత్రువు శత్రువే అనేది రాజుల కాలం నాటి రాజకీయం. మిత్రుడి శత్రువు కూడా మిత్రుడే అనేది ప్రజాస్వామ్య రాజకీయం. త్వరలో రాష్టప్రతి ఎన్నికలూ ఉ న్నాయి. ఒక్కరిని నమ్ముకుని వారి చేతిలో మన జుట్టు ఉంచడం కన్నా ఇద్దరినీ చేరదీసి, ఇద్దరితో ఆడుకోవడం తెలివైన రాజకీయం. మోదీ తెలివైన నాయకుడు.’’

‘‘మోదీ సంగతి వదిలేయండి ! ‘పవన్ కళ్యాణా? ఆయనెవరు? ఆయన సినిమా ఒక్కటి కూడా చూడలేదం’టూ విజయనగరం రాజుగారు భలే దెబ్బకొట్టారు కదూ!’’
‘‘అప్పుడెప్పుడో తెలంగాణ ఉద్యమ కాలంలో- తర్వాత ఎన్నికల ప్రచారంలో కెసిఆర్ ఈ మాట అంటే ఓ అర్థం ఉంది. ఒకే డైలాగు అన్ని కాలాల్లో అందరికీ పని చేయదు. ఎన్టీఆర్‌కు ‘దాన వీర శూర కర్ణ’ లాంటి డైలాగులు బాగుంటాయి. మహేశ్ బాబుకు చిన్న చిన్న డైలాగులు సరిపోతాయి. వారి డైలాగు వీరికి, వీరి డైలాగు వారికి ఇస్తే సిల్లీగా ఉంటుంది.’’
‘‘కెసిఆర్ అంటే తప్పు కాదు కానీ రాజు అంటే తప్పా? ఇదేం న్యాయం ?’’
‘‘ఏ రాష్ట్ర ప్రభుత్వమైనా ఎలా పని చేస్తుందో ముఖ్యమంత్రి, మంత్రులు వెళ్లి గవర్నర్‌కు నివేదిక ఇస్తారు. తెలుసా?’’
‘‘నాకెందుకు తెలియదు బాగా తెలుసు.’’
‘‘కానీ ఒక్క మీ ప్రభుత్వంలో మాత్రం నాయకులు పవన్ కళ్యాణ్‌కు క్రమం తప్పకుండా నివేదికలు ఇస్తుంటారు. అధికారంలోకి వచ్చాక కూడా నివేదికలు ఇస్తున్నారు. చివరకు రాజుగారు ఆ మాట అన్నరోజు కూడా టిటిడి ఇవో నియామకంపై ప్రభుత్వంలో పెద్దలు పవన్‌కు వివరణ ఇచ్చి వచ్చారని పార్టీ వారే చెప్పారు. ఓ వైపు సూపర్ గవర్నర్‌గా గౌరవిస్తూ, పాలనపై నివేదికలు ఇస్తూ మరోవైపు ఆయనెవరో నాకు తెలియదు అంటే అది ‘పంచ్ డైలాగు’ అని మీకు అనిపించవచ్చు కానీ వినేవారికి సిల్లీగా ఉంటుంది. ’’
‘‘తెలంగాణలో కొత్త పార్టీలు వస్తున్నాయి.. అప్పుడుంటుంది మజా. నెల రోజుల్లో తెలంగాణలో విప్లవం వస్తుంది చూడు’’
‘‘కొత్త పార్టీలు రావడం ఏంటి ?ఎప్పుడో వచ్చేశాయి. ఫేస్‌బుక్‌లోనే పుట్టాయి. అక్కడే చీలిపోయాయి. ఇన్నయ్య ఫేస్‌బుక్‌లో కొత్త పార్టీ ప్రకటన చేసి కోదండరామ్‌ను కలుపుకున్నారు. పోస్టు పెట్టిన వెంటనే జెఎసిలో కొందరు తీవ్రంగా ఖండించి అలాంటిదేమీ లేదని ఫేస్‌బుక్‌లోనే సమాధానం ఇచ్చారు. మరో గ్రూపునకు చెందిన చెరుకు సుధాకర్ ఫేస్‌బుక్‌లోనే పార్టీ ప్రకటన చేసి ఇన్నయ్యను, కోదండరామ్‌ను కలుపుకున్నారు. దెబ్బకు దెబ్బ అన్నట్టు సుధాకర్ ప్రకటనను ఇన్నయ్య ఫేస్‌బుక్‌లోనే ఖండించారు.’’
‘‘అంటే’’
‘‘వీళ్ల చిత్తశుద్ధిని తప్పు పట్టలేం. మేధావుల మధ్య ఏకాభిప్రాయం ఉండదు. ఫేస్‌బుక్‌లో ఒక ‘పోస్ట్’ జీవిత కాలం ఎంతో వీరు పెట్టే, పెట్టాలనుకునే పార్టీల జీవిత కాలం అంతే. త్వరలో సంచల ఛానల్ ప్రారంభం అంటూ ఫేస్‌బుక్‌లో పోస్టు కనిపించగానే ఉన్న ఉద్యోగం వదులుకొని వెళ్లవద్దు అని మన కుర్రాళ్లకు చెప్పు. ఆ ‘త్వరలో’ అనేది ఒక జీవిత కాలం గడిచిపోయినా రాదు. టీవిలు చూపించే వంటలు, ఫేస్‌బుక్ లో పుట్టే పార్టీలు చూసేందుకు బాగుంటాయి. దిగితే కానీ లోతు తెలియదు. తింటే కానీ రుచి తెలియదు.’’
‘‘ధర్నా  చౌక్ సంగతేమైంది?’’
‘‘ఇంత బతుకు బతికి ఇంటి వెనుక చావడం అనే మాట విన్నావా? ’’
‘‘వినలేదు’’
‘‘వీర విప్లవ పార్టీ.. తెలంగాణ సాయుధ పోరాటానికి నాయకత్వం వహించిన సిపిఎంకి పవన్ కళ్యాణ్ అండ దొరికింది. ధర్నా చౌక్ కోసం మా ఉద్యమానికి మీ మద్దతు కావాలని పవన్‌ను పోరాట యోధుడు తమ్మినేని అడిగితే పవన్ సరే అని అన్నారు. దాదాపు రెండు దశాబ్దాల్లో సిపిఎం సాధించిన పెద్ద విజయంగా దీన్ని చెప్పుకో వచ్చు.’’
‘‘జనంలో క్రేజ్ ఉన్న పవన్ మద్దతు వామపక్షాలకు దక్కినందుకు మీకు కుళ్లు..’’
‘‘పాలిటిక్స్‌లో హాస్యం కనుమరుగు కాకుండా కాపాడే వ్యక్తుల, శక్తుల పట్ల నేనేప్పుడూ అభిమానంగానే ఉంటాను. కుళ్లుకునే ప్రసక్తే లేదు.’’
‘‘ధర్నా  చౌక్ ఉద్యమం ఏమవుతుందంటావ్?’’
‘‘ఇంకో రెండేళ్ల పాటు ఈ పార్టీలన్నీ తమ శక్తియుక్తులు ధర్నా చౌక్‌కే పరిమితం చేసేట్టు కెసిఆర్ వ్యూహం పన్నారేమో అని -. రెండేళ్లు గడిస్తే విపక్షాలకు ధర్నా చౌక్, కెసిఆర్‌కు అధికారం ఖాయం . ఎవరు కోరుకున్నది వారికి దక్కుతాయి 
’’
*
-బుద్దా మురళి(జనాంతికం . 12. 5. 2017)