21, మే 2018, సోమవారం

డబ్బు మాట్లాడుతుంది!

నిదానమే ప్రధానం - ఆలస్యం అమృతం  విషం
ఈ రెండు మాటలు చెప్పింది మన పెద్దలే. నిదానం ప్రధానం అంటూనే ఆలస్యం అమృతంవిషం  అంటారు. రెండింటిలో ఏది పాటించాలి అనేది కొందరి సందేహం అయితే, పెద్దలిలానే చెబుతారు. వారి మాటలు పాటించాల్సిన అవసరం లేదు అనేది కొందరి జోకులు. రెండూ అక్షర సత్యాలే. ఏ సమయంలో ఏ మాట పాటించాలి అనే నిర్ణయంలోనే మన విజ్ఞత దాగి ఉంటుంది.
‘‘డబ్బు అన్నింటినీ కొనలేదు. డబ్బుతో వాచీ కొనగలవేమో కానీ సమయాన్ని కొనలేవు, డబ్బుతో పుస్తకాన్ని కొనగలవు కానీ జ్ఞానాన్ని కొనలేవు. డబ్బుతో బెడ్‌ను కొనగలవు కానీ నిద్రను కొనలేవు. డబ్బుతో నీకు హోదా రావచ్చు కానీ ఆదరణ దక్కదు. డబ్బుతో రక్తాన్ని కొనగలవు కానీ జీవితాన్ని కొనలేవు.
అంటే డబ్బే అన్నీ చేయలేదు అంటావు. డబ్బు సమస్యలంటావు. సరే నేను నీ మిత్రున్ని కదా? ఈ సమస్యలన్నీ నేను భరిస్తాను. నీ డబ్బు మొత్తం నాకిచ్చేయ్’-
డబ్బు అన్నీ కొనలేవు అనే మాటలపై ప్రచారంలో ఉన్న ఓ జోకు ఇది.
డబ్బుపై రష్యన్ భాషలో ఓ మంచి కథ కూడా ఉంది.
ఒక కుటుంబరావు చిన్న కుటుంబం, ఆదాయం తక్కువే అయినా ఉన్న దాంట్లో భార్యాపిల్లలతో సంతోషంగా ఉంటాడు. ఓ రోజు అతనికో బంగారు నాణెం దొరుకుతుంది. దాన్ని రుద్దితే అందులో నుంచి మరో నాణెం వస్తుంది. అలా రుద్దుతూనే ఉంటాడు. నాణాలు వస్తుంటాయి. ఇదో మాయానాణెం. ఎన్నిసార్లు రుద్దితే అన్ని నాణాలు వస్తాయని అశరీరవాణి పలుకుతుంది. ఇంటిలోని నేలమాళిగలోకి వెళ్లి ఎవరికీ కనిపించకుండా నాణాన్ని అలా రుద్దుతూనే ఉంటాడు. తన కుటుంబాన్ని, పిల్లలను చివరకు తనను తాను మరిచిపోయి నాణాన్ని రుద్దుతూనే ఉంటాడు.
గడ్డం పెరిగిపోతుంది. తనను తానే గుర్తించలేని స్థితికి చేరుకుంటాడు. హఠాత్తుగా భార్యా పిల్లలు గుర్తుకు వస్తారు. ఇక నాణాలు చాలు, వారిని చూడాలని అనుకుని బయటకు వస్తాడు. అతన్ని ఎవరూ గుర్తు పట్టరు. పిల్లలకు పిల్లలు పుడతారు. అంతా జీవితంలో సంతోషాన్ని అనుభవిస్తుంటారు. జీవితంలో అన్నీ వదిలేసి ఇంత కాలం నేను సాధించింది ఏమిటని కుప్పకూలిపోతాడు.
ఇది కథ మాత్రమే కాదు. మన జీవితం కూడా.
డబ్బు సంపాదనలో పడి, బతకడం మానేస్తున్నాం. కుటుంబం, పిల్లలు, చిన్న చిన్న సంతోషాలు అన్నీ వదిలి మాయా నాణెం వెంట పరుగులు పెడుతున్నామేమో కదా?
ఇంతకూ డబ్బు సంపాదించమంటున్నారా? వద్దంటున్నారా? అనే సందేహం వస్తుందా? మళ్లీ మొదటి సమస్యకు వద్దాం. ఈ పెద్దలు ఎప్పుడూ ఇంతే నిదానమే ప్రదానం అంటారు, ఆలస్యం అమృతం విషం అంటారు. అలానే డబ్బులేకపోతే ఎవరూ పట్టించుకోరు అంటారు. డబ్బే ముఖ్యం కాదంటారు. రెండింటిలో దేన్ని అనుసరించాలి అంటే రెండూ నిజమే. జీవితంలో అన్నీ సమపాళ్లలో ఉండాలి. కుటుంబం ముఖ్యమే, కెరీర్ ముఖ్యమే, డబ్బు సంపాదనా ముఖ్యమే. వీటన్నింటిని సమన్వయం చేసుకోవడమే జీవితం. ఒకటి లేకపోతే మరోటి ఉండరు.
పాత సినిమా పాటలు వింటూ భార్య ముఖాన్ని చూసుకుంటూ మహా అయితే ఒక రోజంతా ఇంట్లోనే ప్రేమను తింటూ ఉంటావేమో ! కానీ డబ్బు లేకపోతే కుటుంబ సభ్యులు కూడా పట్టించుకోరు. విలువ ఇవ్వరు.
కుటుంబానికి తగిన సమయం ఇవ్వాలి, అదే సమయంలో డబ్బు సంపాదన ఉండాలి. ఒకదాని కోసం మరోదాన్ని నిర్లక్ష్యం చేయాల్సిన అవసరం లేదు. రెండింటికి ప్రాధాన్యత ఇస్తే జీవితంలో సుఖ సంతోషాలు ఉంటాయి. సమాజంలో గుర్తింపు విలువ ఉంటుంది.
డబ్బు అన్నీ ఇస్తుంది. డబ్బు మనిషిని శక్తివంతునిగా మారుస్తుంది. తన జీవితంపై తనకు పట్టు ఉంటుంది. అనేక సమస్యలకు కారణం డబ్బు. అది చేతిలో ఉంటే సమస్యలను పరిష్కరించుకోవచ్చు. డబ్బు లేకపోవడం అదే ఒక పెద్ద సమస్య. అనేక సమస్యలను డబ్బు పరిష్కరిస్తుంది కానీ డబ్బు లేని సమస్యను మరేదీ పరిష్కరించదు. డబ్బే పరిష్కరిస్తుంది. డబ్బు ఆత్మవిశ్వాసంతో పాటు ధీమా గా ఉండేట్టు చేస్తుంది. ఆర్థికంగా బాగున్నప్పుడు తనకు ఏదీ చేయాలనిపిస్తే అది చేయగలం. లేదంటే ఇష్టం ఉన్నా లేకున్నా జీతం ఇచ్చే పనిలో ఉండాల్సి వస్తుంది. మన జీవితం మీద మనకు హక్కు లేని పరిస్థితి వస్తుంది. ఆర్థికంగా స్వేచ్ఛ లేని పరిస్థితిలో. డబ్బు సమాజంలో గౌరవం ఇస్తుంది. గుర్తింపు ఇస్తుంది.
ఒకప్పుడు మద్రాస్‌లో ఒక వెలుగు వెలిగిన ఎస్ వరలక్ష్మి కారులో వెళుతుంటే డ్రైవర్‌ను ఆపి కానిస్టేబుల్ ఏదో ప్రశ్నించి వాదనకు దిగాడట! ఎస్ వరలక్ష్మి నచ్చజెప్పడానికి ప్రయత్నిస్తే, ఆ కానిస్టేబుల్ కనీసం పట్టించుకోలేదు. ఎస్ వరలక్ష్మి నవ్వుకుని కానిస్టేబుల్‌కు ఒక నోటు ఇవ్వగానే వెళ్లి పొమ్మని దారి చూపాడట! గొల్లపూడి మారుతీరావు ఈ విషయాన్ని ఇటీవల రాశారు.
ఎస్ వరలక్ష్మి తెలుగు తమిళ సినిమాల్లో కొన్ని దశాబ్దాల పాటు ఒక వెలుగు వెలిగిన నటి. ఆ రోజుల్లో ఆమెను గుర్తించని వారు లేరు. ఆ ట్రాఫిక్ పోలీస్ కొత్త తరానికి చెందిన వాడు. పాత తరంలో ఎస్ వరలక్ష్మి కీర్తి గురించి అతనికి తెలియదు. కీర్తి ప్రతిష్టలకు కాల పరిమితి ఉంటుంది కానీ డబ్బుకు కాలపరిమితి ఉండదు. ఎప్పుడైనా డబ్బు శక్తివంతమైంది. డబ్బుకు మనం విలువ ఇస్తే అది మనకు విలువ ఇస్తుంది. గత కాలంలో తెలుగు సినిమాల్లో, తెలుగు సాహిత్యంలో పేదరికానికి చాలా గ్లామర్ కల్పించారు. పేదరికాన్ని గ్లామరైజ్ చేసిన వారు కూడా డబ్బు సంపాదన కోసమే ఆ పని చేశారు తప్ప పేదరికాన్ని ప్రేమించేందుకు కాదు. చట్టబద్ధంగా, ధర్మబద్ధంగా సంపాదించడం, సంపన్నులు కావడం తప్పు కాదు.
*
-బి.మురళి(ఆంధ్రభూమి ఆదివారం 20-5-2018)

18, మే 2018, శుక్రవారం

పిడకలు -ప్లిప్ కార్ట్ -ప్రజాస్వామ్యం

‘‘ఈ కాలం పిల్లలకు బొత్తిగా లోకజ్ఞానం లేకుండా పోయిందండీ రావుగారూ! ఆన్‌లైన్‌లో.. అదే ప్రపంచమని బతికేస్తున్నారు.’’
‘‘స్మార్ట్ ఫోన్  పుట్టినప్పటి నుంచి ఉన్నదే కదా? ఇప్పుడు కొత్తగా ఏమైందని?’’
‘‘అది కాదండీ రావుగారూ.. మా వాడు ఏమన్నాడో తెలుసా? అన్‌లైన్‌లో ప్రజాప్రతినిధుల అమ్మకాలు, కొనుగోళ్లు చేయవచ్చు కదా? ప్రభుత్వాన్ని ఏర్పాటు చేసేందుకు క‘ర్నాటకం’ ఎందుకు? అని అంటున్నాడు’’
‘‘ఐదు రోజుల మ్యాచ్‌ను ఎంజాయ్ చేసిన తరం మనది, 20ట్వంటీని కూడా బోర్ అంటున్న తరం వాళ్లది. వాళ్లకు బాల్ బాల్‌కూ ఫలితం తేలిపోవాలి.’’
‘‘అది కాదురా అని అబ్బాయికి రాజకీయం గురించి చెప్పడానికి ప్రయత్నిస్తే వాడేమన్నాడో తెలుసా? మరీ చాదస్తంగా మాట్లాడకు డాడీ నాలెడ్జ్ లేనిది నాకు కాదు మీకే... ఇంకా సంచీ పట్టుకుని షాప్‌కు వెళ్లి పప్పులు, ఉప్పులు తేవడం కాదు. అప్‌డేట్ కావాలి. కూరగాయలు కోసం అమ్మతో కలిసి సంతకు వెళ్లడం కాదు. ‘బిగ్ బాస్కెట్’కు ఆన్‌లైన్‌లో ఆర్డర్ ఇస్తే పాలకూర కట్టలు కూడా ఇంటికొచ్చి ఇచ్చి పోతారని నాకే క్లాస్ తీసుకుంటున్నాడు. రెండు రూపాయలు విలువ చేసే పాలకూర కట్ట ఆన్‌లైన్‌లో దొరుకుతుంది. ఫ్లిప్‌కార్ట్ వాడు పది రూపాయలకు మూడు పిడకలు ఆన్‌లైన్‌లో అమ్ముతున్నాడు. ప్రభుత్వం ఏర్పాటు చేసేందుకు అవసరమైన ప్రజాప్రతినిధుల ధర పిడకల కన్నా తక్కువగా ఉంటుందా? ఆన్‌లైన్‌లో ఎందుకమ్మరు? అని ప్రశ్నిస్తున్నాడు. ’’
‘‘నాకూ అలానే అనిపిస్తుంది. స్టార్ హోటల్స్, క్యాంపు లు ఇవన్నీ అవసరమా? ఆన్‌లైన్‌లో అమ్మకాలు జరిపి, అమ్మకం పన్ను కూడా వసూలు చేస్తే ప్రభుత్వానికి బోలెడు ఆదాయం. సమయం ఆదా అవుతుంది. ఫ్లిప్‌కార్టును వాల్‌మార్ట్ వాళ్లు కొన్నారట కదా? అమెరికా వాడి తెలివే తెలివి. ఇప్పటి వరకు ఆన్‌లైన్‌లో దొరకనివి కూడా ఇప్పుడు దొరుకుతాయి చూస్తూ ఉండండి.. ఫ్లిప్‌కార్టును వాల్‌మార్ట్ చేపట్టగానే ఇండియా మార్కెట్‌ను దృష్టిలో పెట్టుకుని ప్రజాప్రతినిధుల అమ్మకాలు కూడా ఆన్‌లైన్‌లో మొదలవుతాయి. అసలు ధర ఎంతో తెలియక రహస్యంగా అమ్మకాలు, కొనుగోళ్లు సాగడం వల్ల అమాయకులు త క్కువ ధరకు అమ్ముడు పోతున్నారు. ప్రజాస్వామ్యం అన్నప్పుడు అందరికీ సరైన ధర లభించాలి. ఆన్‌లైన్‌లో అయితే అమ్మేవారికి, కొనేవారికి న్యాయం జరుగుతుంది. దేశ వ్యాప్తంగా అన్ని మార్కెట్‌లను ఆన్‌లైన్ చేసినప్పుడు ‘ప్రజాస్వామ్యం’ అమ్మకాలను ఆన్‌లైన్ ఎందుకు చేయరు? అదే జరిగితే ఫలితాలు వచ్చిన గంటలోనే కర్నాటకలో పాలన మొదలయ్యేది. ఇలా ఐతే ప్రజాస్వామ్యం ఎలా ముందుకు వెళుతుంది? ’’
‘‘రావుగారూ మీకు కామర్స్ తెలుసుకానీ, రాజకీయాలు, ప్రజాస్వామ్యం, రాజ్యాంగం అంటే ఏమీ తెలియదు! అబ్బాయితో అంటే వాడేమన్నాడో తెలుసా? ’’
‘‘ప్రపంచం మారిపోయిందన్న విషయం నీకే తెలియడం లేదు డాడీ! గ్రామ సర్పంచ్‌ను ఏకగ్రీవంగా ఎన్నుకోవడం కోసం గ్రామాల్లో వేలం వేస్తారు. వచ్చిన డబ్బును గ్రామ అభివృద్ధి కోసం ఖర్చు చేస్తారు. గ్రామానికి వర్తించిన ఈ సూత్రం మొత్తం నియోజక వర్గానికి అప్లై చేసి వేలం వేస్తే వందల కోట్లు వస్తాయి.. ఆ నిధులను నియోజక వర్గ అభివృద్ధికి ఖర్చు చేయవచ్చు. జిఎస్‌టి వసూలు చేయవచ్చు. మహారాష్టల్రో పండే సంత్రాలను, కాశ్మీర్‌లో పండే ఆపిల్స్‌ను రైతులు దేశంలో ఎక్కడైనా అమ్ముకోవచ్చు. అలానే నేతలు ఒక ప్రాంతంలో అమ్ముడు పోవడం ఏమిటి? మార్కెట్ ఎక్కడుంటే అక్కడ లభించాలి. ఉల్లిగడ్డలు ఎక్కడైనా అమ్ముకోవచ్చు కానీ ప్రజాస్వామ్యంలో అత్యంత ఖరీదైన నేతలకు ఈ సౌకర్యం ఉండొద్దా? మొన్న బాబాయ్ బెంగళూరులో ఉద్యోగం వచ్చిందని వెళ్లిపోతూ ఇక్కడ ఓటును రద్దు చేసుకుని అక్కడ నమోదు చేసుకున్నాడు కదా? ఓటరు దేశంలో ఎక్కడికి వెళ్లినా తన ఓటును అక్కడ నమోదు చేసుకోవచ్చు. మరి ఓటరుకు ఉన్న సౌలభ్యం నేతలకు ఎందుకు ఉండరాదు? ఒకసారి గెలిచిన వారు దేశంలో ఎక్కడైనా చెలామణి కావాలి. దీని వల్ల గిట్టుబాటు ధర లభిస్తుంది. అవసరం అయిన వారికి సరైన ధరలో నేతలు లభిస్తారు. టెక్నాలజీ లేక ముందు రాసుకున్న నిబంధనలు మార్చాల్సి అవసరం ఉంది డాడీ అని మా వాడు వాదిస్తున్నాడండి. పాలన అంటే పాలకూర కట్టలు కొనడం అనుకున్నారా? ఏ పార్టీకి మెజారిటీ రానప్పుడు ప్రభుత్వం ఏర్పాటు చేయడం అంత ఈజీ కాదు.’’
‘‘మీరు ఎంఏ పొలిటికల్ సైన్స్ అని తెలుసు?’’
‘‘ప్రజాస్వామ్యం పాఠ్యపుస్తకాల్లో ఉన్నట్టు ఉండదని నాకు తెలియదా? నేనన్నది నేతలను కొనడం అంత ఈజీ కాదు అని. కర్నాటకలో వైస్రాయ్ హోటల్ లేకపోవడమే అసలు సమస్య అని ఓ కుర్రకుంక అంటున్నాడు. అసలు వీళ్లకు రాజకీయం ఏం తెలుసు? వైస్రాయ్ హోటల్ వల్లనే అధికారం వస్తే ఆ హోటల్ ఓనరే సీఎం అయ్యేవాడు. రాజకీయాలంటే ఎన్ని తెలివి తేటలు ఉండాలి? విలువలు మరచి నీతులపై ఉపన్యాసాలు ఇవ్వాలి. ఏం మాట్లాడతారు.. తెలిసీ తెలియకుండా! మార్కెట్‌లో వినియోగదారుడే దేవుడు కానీ డెమొక్రటిక్ మార్కెట్‌లో క్రయవిక్రయాలు ఈజీ కాదు. ఆ మధ్య కొనుగోళ్లకు వెళ్లి 50 లక్షలు అడ్వాన్స్ కూడా ఇచ్చి చివరకు జైలుకు వెళ్లాల్సి వచ్చింది. హైదరాబాద్‌లో పొరుగు రాష్ట్రం పోలీస్ స్టేషన్లు పెడతాం అని వార్నింగ్ ఇచ్చిన వాళ్లు. కొనుగోళ్ల వ్యవహారం కెమెరాకు, కొన్నవారి గొంతు సెల్‌ఫోన్‌కు చిక్కగానే పదేళ్ల ఉమ్మడి బంధం కూడా వదులుకొని రాత్రికి రాత్రి సొంత ఊరు వెళ్లాల్సి వచ్చింది. ’’
‘‘అయినా ఇవీఎంలను రిమోట్‌తో కంట్రోల్ చేసి కావలసిన ఫలితాలు తెచ్చుకున్నారట కదా? అదేదో సరిగా ఆపరేట్ చేయవచ్చు కదా? ఎటూ కాకుండా ఈ ‘హంగ్’ లెక్కలెందుకు?’’
‘‘చూడండి.. రావుగారూ.. పైకి చెప్పుకోవడానికి మొహమాట పడతాం ప్రతివాడూ మేధావే. ఫలితాలు ఇలా వస్తాయని ఒక లెక్క చెబుతాం. ఫలితాలు వచ్చాక మన అంచనా నిజం కాకపోతే మన ఇగో హర్ట్ అవుతుంది. ఇవీఎంలను మేనేజ్ చేశారని మన ఈగోను సంతృప్తి పరుచుకుంటాం.’’
‘‘సరే.. ఇంతకూ గద్దె ఎవరికి? ?’’
‘‘ఏ దేశమైనా 11 మంది బృందంతో క్రికెట్ అడుతుంది. కానీ పాకిస్తాన్ జట్టు మాత్రం పనె్నండు మందితో ఆడుతుంది- అని ఆప్పట్లో ఓ జోక్. అంటే- రిఫరీ కూడా వారి జట్టులో సభ్యుడే’’
‘‘అది కాదండీ.. నేను కర్నాటక గురించి అడిగితే మీరు పాక్ క్రికెట్ జట్టు గురించి మీరేదో చెబుతున్నారు’’
‘‘మీరడిగిందే నేను చెప్పానండి రావుగారూ.. మీరే అర్థం చేసుకోలేదు’’

  ‘‘ విశ్వ శాంతి , దేశాభివృద్ధి ,ఆంధ్రకు ప్రత్యేక హోదా కోసం పదిమంది కర్ణాటక ప్రతిపక్ష సభ్యులు అధికార పక్షానికి మద్దతు ఇచ్చినట్టు తెల్లవారు జామున కల వచ్చింది . నిజమవుతుందా ?’’
‘‘ తెల్ల వారు జామున వచ్చిన కళలు నిజమవుతాయి ’’
‘‘ప్రజాస్వామ్యం లో విలువలు రోజు రోజుకు పెరుగుతున్నాయి . ఒకప్పుడు కోటి రూపాయలు పలికిన సరుకు ఇప్పుడు వంద కోట్లు పలుకుతుందట . నిజానిజాలు స్వామికి తెలియాలి ’’
‘‘ఏ స్వామికి ?’’
‘‘వెంకన్న స్వామికి 
‘‘పాపం ఆయనే  కష్టాల్లో ఉన్నారు .’’ 
-బుద్దా మురళి (జనాంతికం 18-5-2018)

14, మే 2018, సోమవారం

జమున విజయరహస్యం

బంజారాహిల్స్ రోడ్ నంబర్ 12 జగన్నాథ ఆలయం సమీపంలోని రోడ్డు గుండా వెళితే అడవిని తలపించే అపార్ట్‌మెంట్. పేరుకు అది అపార్ట్‌మెంట్ అయినా విశాలమైన ఆవరణ, కృత్రిమంగా ఏర్పాటు చేసిన వాటర్ ఫాల్స్. అటవీ ప్రాంతానికి వచ్చామేమో అనిపిస్తుంది.
ఆ అపార్ట్‌మెంట్‌లో విశ్రాంతి జీవితం గడుపుతున్న జమునను కలవడానికి వెళ్లినప్పుడు ఏ జర్నలిస్టుకైనా ముందు కళ్ల ముందు కనిపించే వాస్తవం ఆశ్చర్యంగా ఉంటుంది. ఎందుకంటే ఆ కాలం నాటి నటీనటులు చాలా మంది మహానటులుగా గుర్తింపు పొందినా అంతిమ దశలో మాత్రం దయనీయమైన జీవితం గడిపారు. కానీ జమున జీవితం దీనికి భిన్నంగా ఉంది. వయసు మీద పడినా తగ్గని ఆత్మవిశ్వాసం. దేవుడి దయవల్ల ఇంకా నలుగురికి సహాయం చేసే స్థితిలోనే ఉన్నాను అని చెప్పారు.
***
ఆర్థికంగా బలహీనంగా ఉండడం మనిషిని నిర్వీర్యం చేస్తుంది. డబ్బుకు పేదవాళ్లం కానీ గుణానికి కాదు అనే గంభీరమైన డైలాగులు సినిమాల వరకు బాగానే ఉంటాయి. కానీ మనిషిని బలహీనుడిగా మార్చేస్తాయి.
ఆర్థికంగా ఫరవాలేదు అనుకున్నప్పుడు మనిషి ఆత్మవిశ్వాసంతో ఉండగలడు.
తెలుగు సినిమా రంగంలో ఎన్టీఆర్, ఎఎన్‌ఆర్‌ను రెండు కళ్లు అంటూ సినిమా వాళ్లు ఇప్పటికీ చెబుతుంటారు. ఆ రెండు కుటుంబాల పట్టు సినిమా రంగంపై ఇంకా ఉండడం వల్ల వీరు పోయి ఇంత కాలం అయినా అదే మాట మాట్లాడతారు. ఇక మనకు సినిమాల్లో అవకాశాలు అవసరం లేదు అనుకున్న వయసులో సహజకవి మల్లె మాల లాంటి వారు ఎన్టీఆర్ గురించి నిర్మొహమాటంగా తన మనసులోని అభిప్రాయాన్ని రాసిన పుస్తకాన్ని వెంటనే మార్కెట్ నుంచి వెనక్కి తెప్పించుకోవలసి వచ్చింది. మల్లెమాలకు సినిమాల్లో ఇక భవిష్యత్తు లేదని ధైర్యంగా రాశాడు. కానీ మల్లెమాల కుమారుడికి ఇంకా భవిష్యత్తు ఉంది కాబట్టి ఆ పుస్తకాన్ని మార్కెట్ నుంచి వెనక్కి తెప్పించారు. 76ఏళ్ల వయసులో ఈ మధ్య చంద్రమోహన్ కూడా ధైర్యంగా ఎన్టీఆర్ గురించి ఒక ఇంటర్వ్యూలో చెప్పారు. ఒక సినిమాలో ఎన్టీఆర్‌కు తమ్ముడిగా చంద్రమోహన్‌ను ఎంపిక చేశారు. షూటింగ్‌కు సిద్ధమై రిహార్సల్స్ చేసుకుంటుంటే బాలకృష్ణను ఆ పాత్రకు ఎంపిక చేశారు. ఇక జీవితంలో ఎన్టీఆర్‌తో నటించవద్దని నిర్ణయించుకున్నాను. ఎన్టీఆర్ నీకో మంచి పాత్ర ఇస్తాలే బ్రదర్ అన్నాడట! ఆయన ఆఫర్ చేశాక రిజెక్ట్ చేయాలని అనుకున్నారు. కానీ ఎన్టీఆర్ మాత్రం ఎలాంటి ఆఫర్ చేయలేదని, నిర్మాత ద్వారా విషయం తెలిసిన ఎంజి రామచంద్రన్ తనతో పాటు నటించేందుకు తమిళ సినిమాలో అవకాశం ఇచ్చారని చంద్రమోహన్ చెప్పారు. ఆర్థికంగా బలంగా ఉన్న చంద్రమోహన్ ఇప్పుడు భయపడాల్సిన స్థితిలో లేరు. అవకాశాల కోసం ఎదురు చూడాల్సిన వయసు కాదు. దాంతో ధైర్యంగానే మాట్లాడేశారు.
ఎన్టీఆర్ మరణించి రెండు దశాబ్దాల గడిచిన తరువాత కూడా ఆయనపై ఎవరికైనా వ్యతిరేక అభిప్రాయం ఉంటే వ్యక్తం చేయలేని పరిస్థితి. అలాంటిది ఎన్టీఆర్ సినిమాల్లో ఒక వెలుగు వెలుగుతున్న కాలంలో ఎన్టీఆర్‌కు వ్యతిరేకంగా మాట్లాడడం అంటే ఊహించగలమా? అదీ సినిమాల్లో ఆయనతో హీరోయిన్‌గా నటించే నటి ఒకరిని కాదు ఏకంగా రెండు కళ్ల వ్యతిరేకతను తట్టుకుని సినిమా రంగంలో బతికి బట్టకట్టడం అంటే ఊహించగలమా?
అసాధ్యం అనుకున్న దీన్ని జమున సాధ్యం చేసి చూపించింది.
మీలో ఇంతటి ధైర్యానికి కారణం ఏమిటని ఆసక్తిగా ఆమెను అడిగినప్పుడు 1930-40 ప్రాంతంలోనే మా నాన్న ఎగుమతి వ్యాపారంలో ఉన్నారు. పసుపు, పొగాకు విదేశాలకు ఎగుమతి చేసేవారు. మా నాన్న కలిగించిన ఆత్మవిశ్వాసమే నా ధైర్యానికి కారణం అంటూ చెప్పుకొచ్చారు.
ఎంతో మంది మహానటులు సినిమాల్లో ఎంతో ఉన్నత స్థానానికి వెళ్లి చివరి దశలో చితికి పోయి పూట గడవడమే కష్టం అయిన దశకు చేరుకున్నారు. ధనం- మూలం పేరుతో అలాంటి నటుల గురించి వరుసగా రాస్తూ జమున అభిప్రాయాలు తెలుసుకునే ప్రయత్నం చేశాను. చాలా మంది నటీనటులు ఆర్థికంగా చితికి పోయారు. నటులకు ఇదేమైనా శాపమా? ఈ శాపం నుంచి మీలాంటి నటులు ఎలా తప్పించుకున్నారని ప్రశ్నిస్తే, ఆసక్తికరమైన విషయాలు చెప్పారు.
‘‘ఒకరికి పైసా అప్పు ఇచ్చేది లేదు, ఒకరి వద్ద అప్పు తీసుకునేది లేదు. నేను మొదటి నుంచి దీనికి కట్టుబడి ఉన్నాను. ఇష్టపూర్వకంగా సహాయం చేశాను కానీ అప్పు ఇవ్వలేదు.. సావిత్రి, నాగయ్య, కాంతారావు వారు వీరు అని కాదు సినిమా రంగానికి చాలా మంది ఆర్థికంగా దెబ్బతిన్నది సినిమాలు తీయడం వల్ల. వ్యసనాల వల్ల ఆస్తి కరిగిపోదు. కొంత ఆర్థికంగా నష్టపోవచ్చు కానీ వ్యసనాల వల్ల ఆస్తులు కరిగిపోయిన వారు ఎవరూ లేరు. నిర్మాతగా సినిమాలు తీయడం వల్ల దెబ్బతిన్న వారే ఎక్కువ. మనం నటులం నటనకే పరిమితం కావాలి అని మొదటి నుంచి అనుకున్నాను. దానికే కట్టుబడి ఉన్నాను. నిర్మాతగా మారి ఉంటే నా పరిస్థితి కూడా దెబ్బతినేది. భానుమతి మాత్రం నిర్మాతగా మారినా దెబ్బతినలేదు. దానికి కారణం వారికి స్టూడియో ఉండడం వల్ల. సావిత్రి నిర్మాతగా సినిమా తీయడం వల్లనే ఆర్థికంగా దెబ్బతిన్నారు. జెమినీ గణేషన్‌కు మార్కెట్ ఉన్న సమయంలో సినిమా మొదలైంది. హఠాత్తుగా మార్కెట్ పడిపోయింది. సినిమా ఆలస్యం అయింది. జెమినీ గణేషన్ మార్కెట్ మళ్లీ పుంజుకుంది. ఆ సమయంలో సినిమాను అమ్మేసుకుంటే సావిత్రి దెబ్బతినేది కాదు. కానీ తానే స్వయంగా విడుదల చేయడం, సినిమా విడుదల సమయానికి జెమినీ గణేషన్ మార్కెట్ మళ్లీ పడిపోవడంతో చేతులు కాల్చుకుంది. మిస్సమ్మ సినిమాలో నటించినందుకు ఆ రోజుల్లో నిర్మాతలు పదిహేనువేల పారితోషికం లేదా కారు ఇస్తామని చెప్పారు. ఆ సినిమాలో ముఖ్యనటులు అందరికీ ఇదే ఆఫర్. అప్పుడు నేను కారు తీసుకున్నాను. అంతకు ముందు కారు తీసుకోవాలని కొందరు చెప్పినా మా నాన్న మాత్రం అవకాశాలు ఎలా ఉంటాయో తెలియదు. తొందర పడి కారు తీసుకుంటే తరువాత అవకాశాలు లేకపోతే ఇబ్బంది పడతావు అని నాన్న చెప్పారు. ప్రారంభం నుంచే డబ్బు విషయంలో జాగ్రత్తగా ఉన్నాను. భూములు కొన్నాను. భవనాలు కొన్నాను. మేడ్చల్‌లో 50 ఎకరాల భూమిని ఆ మధ్య మా అబ్బాయి అమెరికాలో ఇళ్లు నిర్మించుకోవడానికి అమ్మేశాను’’ అంటూ చెప్పారు. తెలుగు సినిమాకు రెండు కళ్లు ఎన్టీఆర్ ఎఎన్‌ఆర్ ఆ రోజుల్లో జమునను బహిష్కరించినప్పుడు ఆమె అస్సలు భయపడలేదు. ఆ సమయంలోనే హిందీ సినిమాల్లో హీరోయిన్‌గా మంచి అవకాశాలు వచ్చాయి. తెలుగులో హీరోయిన్ ఓరియంటెడ్ సినిమాల్లో అవకాశాలు వచ్చాయి. సారీ చెప్పేందుకు జమున ససేమిరా అన్నారు. చివరు టీ కప్పులో తుఫానులా ఎవరూ సారీ చెప్పకుండానే వివాదం సమసిపోయింది. ఆర్థిక అంశాల్లో మొదటి నుంచి ఒక ప్రణాళికా బద్ధంగా ఉండడం, సంపాదించిన డబ్బును సరైన విధంగా ఇనె్వస్ట్ చేయడం వల్ల జమున ఎప్పటికీ జముననే అనుకునేట్టు ఆత్మవిశ్వాసంతో బతక గలుగుతున్నారు. ఒక్క సినిమా రంగం అనే కాదు ఏ రంగంలోనైనా చాలా మంది అధికారం చలాయించిన వారు చివరి దశలో ఆర్థికంగా బలంగా లేకపోవడం వల్ల దయనీయంగా బతుకుతారు. మొదటి నుంచి సరైన విధానంలో ఆర్థిక ప్రణాళిక రూపొందించుకున్న వారికి చివరి దశ కూడా సంతోషంగా గడిచిపోతుంది. అది మన చేతిలోనే ఉంది. మన ఆలోచనలే మన తలరాతలను రాస్తాయి. మన తలరాతలను మరెవరో రాయరు. 1936 ఆగస్టు 30న హంపిలో జన్మించిన జమున 82ఏళ్ల వయసులోనూ ఆత్మవిశ్వాసంతో బతుకుతున్నారంటే ప్రారంభ కాలంలో ఆమె జీవన విధానమే కారణం.
--బి.మురళి
(ఆంధ్ర భూమి 6-5-2018)

జ్ఞానం ఉంటే.. సంపద మీ వెంటే..

లక్ష్మి, సరస్వతి .. ఈ ఇద్దరూ ఒకరున్న చోట మరొకరుండరు అంటారు. కానీ ఇప్పుడు కాలం మారింది. ఇద్దరూ చెట్టాపట్టాలేసుకుని తిరుగుతున్న కాలం ఇది. ఎక్కడ సరస్వతీ దేవి ఉంటే అక్కడ లక్ష్మీదేవి కూడా ఉంటోంది. ఒకప్పుడు సంపన్నుల సంతానం మాత్రమే ధనికులు. ఇప్పుడు సరస్వతి కటాక్షం ఉంటే లక్ష్మి వారిని వెతుక్కుంటూ వస్తోంది. బెంగళూరు ఐటి కంపెనీలో ఉద్యోగం చేసే నిజామాబాద్ కుర్రాళ్ల మెదడులో పురుడు పోసుకున్న ‘రెడ్‌బస్’ ఆలోచన వారిని సంపన్నులుగా మార్చింది. వారిని కోటీశ్వరులుగా మార్చింది సరస్వతి దేవే. ఆలోచనలే మనుషులను సంపన్నులుగా మారుస్తున్న కాలం ఇది.
‘డబ్బు డబ్బును ఆకర్షిస్తుంది..’- అనేది పాతమాట. మనకు ప్రతి రోజు కొన్ని వేల ఆలోచనలు వస్తాయి. వాటిని ఆచరణలో పెట్టిన వారే విజేతలవుతారు. పూర్వకాలంలో సాంప్రదాయ వ్యాపారంలో ఉన్న వారికి సరస్వతి తోడు ఉండడం అచ్చిరాలేదేమో! సరస్వతి, లక్ష్మి ఒకే చోట ఉండరనే మాట ఆ కాలనికి సరిపోవచ్చు. ఇప్పుడు ఒకటి లేకపోతే మరొకరటి ఉండదు. సరస్వతి లేకపోతే లక్ష్మీదేవి ఈ కాలంలో ఎక్కువ రోజులు నిలువదు.
ప్రపంచంలో ప్రముఖ కంపెనీల సిఇఓలందరికీ ప్రధానంగా ఉండే అలవాటు ఏమిటంటే ప్రతినిత్యం ‘చదవడం’. సిఇఓలే కాదు, ఏ రంగంలో ఉన్న వారిలోనైనా కామన్‌గా కనిపించే అలవాటు ఇది. కొంత ఆశ్చర్యంగా అనిపించవచ్చు కానీ ‘పోర్బ్స్’ జాబితాలో చోటు సంపాదించుకున్న ప్రపంచ సంపన్నులు, ప్రముఖ కంపెనీల సిఇఓలకు బాగా చదివే అలవాటుంది. చదవడం నుంచే వారు విశ్రాంతి పొందుతున్నారు. వారు పని చేసే రంగానికి సంబంధించిన కొత్త ఆలోచనలను పుస్తకాలు చదవడం నుంచి పొందుతున్నారు.
రాజకీయాల్లోనూ బాగా చదివే అలవాటున్నవారు రాణిస్తున్నారు. తెలంగాణ కొత్తగా ఏర్పడిన రాష్ట్రం అయినా కొత్త కొత్త ఆలోచనలతో దేశం దృష్టిని ఆకర్షిస్తోంది. ముఖ్యమంత్రి కల్వకుంట్ల చంద్రశేఖర రావుకు బాగా చదివే అలవాటు దీనికి దోహదం చేసింది. ప్రపంచ ప్రఖ్యాత కంపెనీల సిఇఓల అలవాట్లపై ఇటీవల ఒక సర్వే నిర్వహించారు. బాగా చదివే అలవాటు తమను ఉన్నత స్థితికి తీసుకు వెళ్లిందని వారు పేర్కొన్నారు.
ప్రఖ్యాత కంపెనీల సిఇఓలు ఏటా సగటున 60 పుస్తకాలు చదువుతున్నట్టు తేలింది. ఎక్కువగా వీరు తమ రంగానికి సంబంధించిన పుస్తకాలు, జీవిత చరిత్రలు, మానవ సంబంధాలు, వృత్తిలో నైపుణ్యానికి సంబంధించిన పుస్తకాలు చదువుతున్నారు. సక్సెస్ సాధించిన వారి జీవిత చరిత్రలను చదవడం వల్ల వారు ఎదుర్కొన్న సమస్యలు, వాటిని అధిగమించిన తీరు తమకు ఎంతో ఉపయోగపడుతుందని చెబుతున్నారు. ‘ఫేస్‌బుక్’ సృష్టికర్త జుకర్ బర్గ్ యూనివర్సిటీ చదువును మధ్యలోనే ఆపినా పుస్తకాలు చదివే అలవాటు తనకు ఎంతగానో ఉపయోగపడిందని చెబుతుంటారు. ప్రపంచంలో ఇనె్వస్ట్‌మెంట్ గురుగా పేరుపొందిన వారెన్ బఫెట్‌కు పుస్తకాలు బాగా చదివే అలవాటుంది. 11ఏళ్ల వయసు నుంచే పెట్టుబడులు పెట్టడం మొదలు పెట్టి 13 ఏళ్ల వయసు నుంచి ఆదాయ పన్ను చెల్లిస్తున్న బఫెట్‌కు పుస్తకాలే పెట్టుబడులకు సంబంధించిన గురువులు. ప్రపంచ సంపన్నుల ఫోర్బ్స్ జాబితాలో ఈసారి మూడవ స్థానంలో నిలిచిన బఫెట్‌కు- అత్యంత ఇష్టమైన పని పుస్తకాలు చదవడం. అన్ని రకాల పుస్తకాలు ఆయన చదువుతారు. ఏ కంపెనీ భవిష్యత్తు ఎలా ఉంటుంది? ఎక్కడ పెట్టుబడి పెడితే బాగుటుంది? అనే అంశాలపై కొత్త ఆలోచనలను ఆయనకు పుస్తకాల నుంచే లభిస్తుంది. ‘నేను రోజుకు కనీసం ఐదువందల పేజీలు చదువుతాను. ఇలా చదవడం ద్వారా వచ్చిన జ్ఞానం చక్రవడ్డీలా ఉపయోగపడుతుంది’ అని ఆయన చెబుతారు. ఈ రోజుల్లో పుస్తకాలు కొనడం ఖరీదైన వ్యాపకం ఏమీ కాదు. పైగా ఇంటర్‌నెట్‌లో ప్రపంచ వ్యాప్తంగా ఉన్న పుస్తకాలు మన అర చేతిలో ఇమిడిపోతున్నాయి.
చాలా మందికి పుస్తకం చదవాలంటే బద్ధకం. జుకర్ బర్గ్ 2015 నుంచి నెలకు రెండు పుస్తకాలు చదవాలని నిర్ణయించుకున్నారట! ఇప్పటికీ ఆచరిస్తున్నారు. మంచి పుస్తకాలు పెద్ద ఎత్తున సేకరిస్తున్నారు. ఇన్ఫోసిస్ వ్యవస్థాపకుడు నారాయణమూర్తి అపూర్వమైన, అరుదైన వేలాది పుస్తకాలను సేకరించి నెట్‌లో ప్రజలకు అందుబాటులో ఉండే విధంగా ఒక ప్రాజెక్టు చేపట్టారు. ఆయన కుమారుడు ఈ ప్రాజెక్టు నిర్వహిస్తున్నారు. దీన్ని అనవసర ఖర్చుగా వారు భావించడం లేదు. భారతీయ జ్ఞాన సంపదను అందరికీ అందుబాటులో తీసుకు వచ్చే ప్రయత్నంగా భావిస్తున్నారు. నారాయణమూర్తి భార్య సుధామూర్తి పుస్తకాలు చదవడమే కాదు, చాలా పుస్తకాలు రాశారు. వివిధ గ్రంథాలయాలకు వీరు పెద్ద సంఖ్యలో పుస్తకాలు సమకూర్చుతున్నారు. మైక్రోసాఫ్ట్ సిఇఓ బిల్‌గేట్స్ ఎంత బిజీగా ఉంటున్నా వారానికి ఒక పుస్తకం చదవాలనే నియమం పెట్టుకుని కచ్చితంగా పాటిస్తున్నారు. జీవితంలో విజయం సాధించాలంటే పుస్తకాలు చదవాలంటారు ఆయన.
ఇక, ఆర్థికంగా విజయం సాధించిన వారు రోజూ కనీసం అరగంట పాటు చదువుతారని సర్వేలో తేలింది. ఎక్కువగా జీవిత చరిత్రలు, చరిత్ర, రాజకీయ పరిణామాలు, కంపెనీల విజయగాధలకు సంబంధించిన పుస్తకాలు చదువుతున్నారు. సంపద కూడబెట్టుకోవడం అంటే అంతా డబ్బు రూపంలోనే కాదు. ఆరోగ్యంగా ఉండడం, మానసికంగా బలంగా ఉండడం, జీవితాన్ని ఆస్వాదించడం అన్నీ సంపదనలే. జ్ఞాన సముపార్జన కూడా ధనమే. కంటికి కనిపించక పోవచ్చు కానీ అదీ ఆరోగ్యమే. సంపాదన మరింత పెరగాలంటే జ్ఞాన ధనం ముఖ్యం.
--బి.మురళి
(ఆంధ్రభూమి 13-5-2018)

11, మే 2018, శుక్రవారం

ఇది.. గుండెపోటు తనం!

ఏరా..? అంత దిగులుగా ఉన్నావు? ప్రధానమంత్రి పదవికి ఓకే అని రాహుల్, సిఎం పదవికి సిద్ధం అని రేవంత్ ప్రకటించారు.. ఇంకెందుకు దిగులు. ఈ దేశం మరీ గొడ్డు పోలేదు. పాలించేందుకు ఎవరో ఒకరు వస్తారులే దిగులు పడకు’’
‘‘నా దిగులుకేం కానీ, నాకన్నా ఎక్కువ దిగులుగా కనిపిస్తున్నావ్? ఏమైంది?’’
‘‘ దిగులు నా కోసం కాదు.. కర్నాటక ఎన్నికల కోసం ’’
‘‘పోటీ చేస్తున్న ఏదో ఒక పార్టీ గెలుస్తుంది. ఏవరో ఒక నాయకుడు ముఖ్యమంత్రి అవుతాడు. దానికంత దిగులెందుకు? కాలం కలిసొస్తే పోటీ చేయని నాయకుడు కూడా ముఖ్యమంత్రి కావచ్చు. కింగ్ మేకరే కింగ్ కావచ్చు. ఐనా కర్నాటక ప్రజలకు లేని దిగులు నీకెందుకు? పదవి పోతుందేమోనని ఆ రాష్ట్ర ముఖ్యమంత్రి, పరువుపోతుందేమోనని ప్రచారం చేసిన ప్రధాని మోదీ దిగులుపడితే అర్థం ఉంది? ఊళ్లోపెళ్లికి ఎవరిదో హడావుడి అన్నట్టు వారికి లేని దిగులు నీకెందుకోయ్’’
‘‘నేను కూడా సరిగ్గా ఈ విషయంలోనే దిగులు పడుతున్నాను. నువ్వన్నట్టు ఎవరి పెళ్లికో ఎవరి హడావుడినో అన్నట్టు. కర్నాటక ఎన్నికలకు తెలుగు వారి హడావుడి చూస్తుంటే, ఫలితాలు వచ్చాక ఏమవుతుందా? అని దిగులవుతుంది. అమెరికాలో ఎవరు గెలవాలో, కర్నాటకలో ఎవరు ఎవరిని ఓడించాలో, కులాల వారిగా తెలుగువారు ఫత్వాలు జారీ చేస్తుంటే, ఫలితాలు వచ్ఛాక ఓడినవారు ప్రతీకార ఫత్వాలు జారీ చేస్తే ఎలా ఉంటుందా? అని దిగులు. మన వాళ్లు అక్కడి తెలుగు వాళ్ల కోసం తెలుగులో జారీ చేసిన ఫత్వాను- తెలుగు రాదు కాబట్టి ట్రంప్ చదవలేదు గనుక బతికి పోయాం. కన్నడ భాషకు తెలుగు భాష దగ్గరగా ఉంటుంది. మన ఫత్వా వాళ్ల దృష్టిలోనూ పడింది. ఫలితాలు తేడాగా వస్తే. మన వాళ్ల పరిస్థితి?’’
‘‘మరీ అతిగా ఊహిస్తున్నావోయ్! ఐటీ కంపెనీల్లో ఉద్యోగం కోసం వెళ్లే మన వాళ్లు ఓటర్లుగా నమోదు చేయించుకోవడం, క్యూలో నిలబడి ఓటు వేయడం, ఫత్వాను పాటించడం జరిగే పనేనా? పోనీ ఎప్పటి నుంచో ఉన్న తెలుగువాళ్ల ఓట్లు భారీగా ఉన్నాయనుకున్నా, కులం, ఉప కులం, తెగ అన్నీ చూసుకునే ఓటు వేస్తారు.  హిల్లరీ సలహా సంఘం లో మనవాళ్ళు , ట్రంప్  సలహా సంఘం లోనూ మన వాళ్ళు దూరి పోయారు . ఇద్దరిలో ఎవరు గెలిచినా ఫలించిన తెలుగు వ్యూహం అంటాం . హిల్లరీ గెలవాలి అని పత్వా ఇచ్చింది మనమే . ట్రంప్ గెలవాలని కాశీలో పూజలు చేయించింది మనమే . ఇద్దరిలో ఎవరు గెలిచినా మనదే గెలుపు . మన వాళ్ళు ఎక్కడున్నా పది మంది తెలుగు వాళ్లకు సగటున పన్నెండు సంఘాలు ఉంటాయి .  ఒకే కుటుంబం నుంచి భార్య ఒక పార్టీ నుంచి మంత్రి , భర్త మరో పార్టీ నుంచి పదవి . కుటుంబమే వేరు వేరు పార్టీలుగా చీలిన ఈ రోజుల్లో మన పత్వా పని చేస్తుందా ?  అన్ని పార్టీలకూ ఆ ఓట్లు చీలిపోతాయి నువ్వేమీ కంగారుపడకు. ’’
‘‘సరే కానీ- నా దిగులు సంగతి చెప్పాను. మరి ఇంతకూ నీ దిగులెందుకో చెప్పనే లేదు’’
‘‘నీది మరీ లోకల్ సమస్య.. నాది విశ్వమానవ సమస్య’’
‘‘ఏంటది?’’
‘‘మూడు రోజులు తక్కువ 500 కోట్ల సంవత్సరాల్లో సూర్యుడు అంతమవుతాడట!’’
‘‘ఇదేం లెక్క జ్యోతిష్కుడు చెప్పాడా? ’’
‘‘కాదు.. సైంటిస్ట్‌లే మూడు రోజుల క్రితం- ఐదువందల కోట్ల సంవత్సరాల్లో సూర్యుడు అంతరిస్తాడని చెప్పారు. నేను ఆ మూడు రోజులు మినహాయించి చెప్పాను.’’
‘‘ఏమండోయ్! సూర్యుడు అంతరిస్తే ఇక మనం సంసారం చేసినట్టే. ఏసీ పెట్టుకున్నప్పటి నుంచి కరెంటు బిల్లు భరించలేకపోతున్నానని ఇప్పటికే ఏడుస్తున్నారు. ఇక సూర్యుడు అంతరిస్తే కచ్చితంగా పగలు లైట్లు తప్పవు. విద్యుత్ బిల్లు రెట్టింపు అవుతుంది. ఇప్పుడే చెబుతున్నాను. కావాలంటే మీ సిగరేట్ల ఖర్చు, సినిమాలు, టీ ఖర్చు తగ్గించుకోండి. అంతే కానీ విద్యుత్ బిల్లు పెరుగుతోందని ఇంటి ఖర్చు తగ్గిస్తే మాత్రం ఊరుకునేది లేదు.’’
‘‘నాన్నోయ్.. సూర్యుడు అంతరిస్తే ఇక మేం స్కూల్‌కు వెళ్లాల్సిన అవసరం లేదా?’’
‘‘ఏదో ముతక సామెత చెప్పినట్టు- సూర్యుడు చచ్చిపోతాడురా దేవుడా అని నేను అందోళన చెందుతుంటే మధ్యలో మీరేంటి?’’
‘‘తుఫాన్‌ను ఆపేసినట్టు సూర్యుడి మరణాన్ని ఆపలేరా! ఇలాంటి రోజు వస్తుందనే అరచేతిని అడ్డుపెట్టి సూర్యోదయాన్ని ఆపలేరని ఎప్పుడో అన్నారు.’’
‘‘తెలిసీ తెలియకుండా మాట్లాడకు. సూర్యోదయాన్ని ఆపలేరు అని చెప్పడంలో కవి హృదయాన్ని అర్థం చేసుకోవాలి. ఏదో విప్లవ పార్టీలకు డిమాండ్ బాగా ఉన్న రోజుల్లో ఇలాంటి డైలాగులు పాపులర్ . ఇది అర్జున్‌రెడ్డి కాలం, ఆర్. నారాయణమూర్తి కాలం కాదు.’’
‘‘ఏమండీ.. మీకు చెప్పొద్దని దాచి పెట్టాను. మా తమ్ముడు మాదాపూర్‌లో త్రిబుల్ బెడ్‌రూం ఫ్లాట్ కొంటున్నాడు. అడ్వాన్స్ కూడా ఇచ్చేశాడు. నిన్ననే తమ్ముడు, మరదలు వచ్చి చెప్పారు. అడ్వాన్స్ వెనక్కి తీసుకోమంటారా? సూర్యుడే అంతరించినప్పుడు రియల్ ఎస్టేట్ ధరలు పడిపోకుండా ఉంటాయా? ’’
‘‘హైదరాబాద్ గాంధీనగర్‌లో మూడు వందల రూపాయలకు మూడు వందల గజాల ప్లాటు అమ్మిన కాలం నుంచి ధరలు తగ్గుతాయనే మాటలు వింటున్నాను. తెలంగాణ వస్తే స్థలాల ధరలు పడిపోతాయని కొందరు, రాకుంటే పడిపోతాయని మరి కొందరు తెగ ప్రచారం చేశారు. నోట్ల రద్దుతో డమాల్ అని కొందరు, జిఎస్‌టితో రియల్ ఎస్టేట్ శకం ముగిసినట్టే అని మేధావులు అంచనా వేశారు. మొన్నటికి మొన్న రిజిస్ట్రేషన్‌కు ఆధార్ అనుసంధానం వల్ల భూముల ధరలు పాతాళంలో పడిపోవడం ఖాయమన్నారు. తీరా మొన్న హెచ్‌ఎండిఏ వాళ్లు ప్లాట్లను వేలం వేస్తే లక్షా 56 వేల రూపాయలకు గజం ధర పలికింది. ఒకేసారి ఇంత ధర పలకడం వల్ల రియల్ ఎస్టేట్ పడిపోతుందని మళ్లీ ప్రచారం. పెరుగుట విరుగుట కొరకే అనేది రియల్ ఎస్టేట్‌కు వర్తించదు. పెరుగుట పెరుగుట కొరకే ’’
‘‘అన్నయ్య గారూ.. మీరు మరోలా అనుకోవద్దు, మా వారూ, మీరూ మరీ దీర్ఘంగా ఆలోచిస్తున్నారు.. అంత మంచిది కాదేమో? మగవాళ్లకే గుండెపోటు ప్రమాదం ఎక్కువట.. ఎందుకో తెలుసా?’’
‘‘ఆడవారి నుంచి గృహహింసను తట్టుకోలేక కావచ్చు.. హా..హా..’’
‘‘కాదన్నయ్య గారూ.. ప్రపంచంలోని ప్రతి సమస్యపై మగాళ్లు అతిగా ఆలోచిస్తారు కాబట్టి గుండెపోటు ఎక్కువ. కర్నాటక ఎన్నికల ఫలితాలపై అక్కడి నాయకుల్లో కన్నా ఆ వార్తలు రాసే మీడియా వారిలో, ఆయా పార్టీల అభిమానుల్లో ఆందోళన ఎక్కువగా ఉంది. ఎన్నికల్లో ఒక్క నాయకుడికి కూడా గుండెపోటు రాదు కానీ మీడియావారికి, అభిమానులకు గుండెపోట్లు వస్తున్నాయి. క్రికెట్ ఆడేవారి కన్నా అది చూసీ మీలాంటి వారిలో ఆందోళన ఎక్కువగా కనిపిస్తోంది? ఎందుకంటారు?’’
‘‘అది కూడా నువ్వే చెప్పమ్మా..!’’
‘‘టెన్షన్ నాయకులకుండాలి కానీ మీకెందుకు? రేపేం జరుగుతుందో తెలియదు. ఐదువందల కోట్ల సంవత్సరాల తరువాత అంతరించే సూర్యుడి గురించి ఆందోళన అవసరమా? అతిగా ఆలోచించడం మేధావితనం కాదు గుండెపోటు తనం అవుతుంది.’’
*

బుద్దా మురళి(జనాంతికం - 11-5-2018)

4, మే 2018, శుక్రవారం

నవ్వుకుందాం హాయగా..

ఏమండోయ్, చిన్నోడు ఏమంటున్నాడో చూశారా?’’
‘‘ఏరా.. ఇంకా స్కూల్‌కు రెడీ కావడం లేదు’’
‘‘నేను స్కూల్‌కు రాజీనామా చేశా నాన్నా’’
‘‘ఎందుకురా?’’
‘‘ముందు పాఠశాలల్లో విద్యార్థుల సమస్యలు ఏమిటో అధ్యయనం చేస్తాను. విద్యాశాఖ మంత్రిగా వారి సమస్యలు పరిష్కరిస్తాను. అందుకే రాజీనామా చేశాను. టీచర్ల తీరు నాకు నచ్చలేదు. మానవ హక్కులను ఉల్లంఘించే విధంగా పాఠాలు చెబుతున్నారు. ఒక్కో స్కూల్‌కు వెళతాను. విద్యార్థులతో మాట్లాడతాను. సమస్యలు తెలుసుకుని, ఏదైనా పార్టీలో చేరి విద్యాశాఖ మంత్రిని కావాలా? లేక నేనే పార్టీ పెట్టాలా? అని నిర్ణయం తీసుకుంటాను.’’
‘‘నువ్వింకా పిల్లాడివిరా! ఇప్పుడే పార్టీ పెట్టలేవు’’
‘‘ఐతే బాలల హక్కుల సంఘానికి వెళతాను’’
‘‘ఎందుకు?’’
‘‘ఆయనెవరో ఐపిఎస్ ఆఫీసర్ తెలుగునాట హీరోగా మీడియా గుర్తింపునకు అలవాటు పడి, మహారాష్టల్రో ఎలాంటి గుర్తింపు రాకపోవడంతో రాజీనామా చేసేసి రాజకీయాల్లోకి వచ్చి వ్యవసాయ శాఖ మంత్రి కావాలని కోరుకుంటే.. ఆహా ఓహో అన్నారు. చదుకునే పిల్లల సమస్యలను పరిష్కరించడానికి నేను స్కూల్‌కు రాజీనామా చేసి విద్యార్థుల సమస్యలపై అధ్యయనం చేస్తానంటే ప్రతి ఒక్కరూ విమర్శించడమే, పెద్దలకో న్యాయం, పిల్లలకో న్యాయమా? బాలలకు హక్కులు లేవా? ఇదేనా ప్రజాస్వామ్యం. ఇందుకోసమేనా తెలంగాణ తెచ్చుకున్నది . ఇందుకోసమేనా మన దేశానికి స్వాతంత్య్రం వచ్చింది?’’
‘‘బాగైందా? పిల్లాడు ఇంట్లో ఉన్నప్పుడు టీవీలో ఆ దిక్కుమాలిన చర్చలు చూడకండి అంటే విన్నారా? పిల్లాడికి రాజకీయ అవగాహన ఉండాలి అన్నారు. ఇప్పుడు అనుభవించండి..’’
‘‘అరే బడుద్దాయ్.. ముందు స్కూల్‌కు వెళ్లు.. నీతో తరువాత మాట్లాడతాను’’
‘‘స్కూల్‌కు వెళుతున్నా చదువుకోవడానికి కాదు. స్కూల్ పిల్లల చదువు సమస్యలను అధ్యయనం చేయడానికి..’’
‘‘హా..హా.. పులి కడుపున పులే పుట్టిందోయ్ కుటుంబరావు. మీ వాడికి నిన్ను మించిన రాజకీయ పరిజ్ఞానం అలవడినట్టుగా ఉంది.’’
‘‘రావోయ్.. రా!.. ఏమేవ్ మీ అన్నయ్య వచ్చాడు. టీ తీసుకురా! మావాడి సంగతికేం కానీ .. దేశంలో ఏం జరుగుతోంది? ఏంటీ విశేషాలు?’’
‘‘నెల్లూరులో ఓ అటెండర్ వద్ద వంద కోట్ల ఆస్తి దొరికిందట!’’
‘‘చిన్నచేపల గురించి ఏం మాట్లాడతావు కానీ.. నాకైతే పాపం అనిపించింది. ఆ అల్పజీవి అంత సొమ్ము కూడబెట్టడానికి ఎంత కష్టపడ్డాడో? శ్రమశక్తి అవార్డు పొందాల్సిన వాడు’’
‘‘ప్రచారానికి దూరంగా ఉండాలని ఆ అవార్డు వద్దన్నాడేమో కానీ- అతను కోరుకుంటే దక్కని అవార్డు ఉంటుందా? జోక్ కాదు నిజంగా చెబుతున్నాను. ఎవరికీ చిక్కకుండా, అనుమానం రాకుండా వంద కోట్లు నొక్కేయడం, దాచి పెట్టడం అంటే మాటలా? ఎంత శ్రమ పడాలి. ఎంత శక్తి ఉండాలి. జేబులు ఖాళీగా ఉన్నా ఎంతో ఆస్తి ఉన్నట్టు పోజులు కొడుతూ, కారు కొని నెలవారీ వాయిదాలు కట్టలేక ముఖం చాటేస్తూ, పైకి సంపన్నుల్లా నటించే వారున్న ఈ రోజుల్లో వంద కోట్ల ఆస్తి ఉండి అటెండర్‌గా పని చేస్తూ ఏమీ లేనట్టు నటించడం అంటే పాపం.. అతను ఎంత క్షోభను అనుభవించాడో. అందుకు శ్రమశక్తి అవార్డే కాదు. నటభూషణ అవార్డు కూడా ఇవ్వాలి’’
‘‘ఇలాంటి అవతార పురుషులు ప్రతి చోట, ప్రతి ఆఫీసులో ఉంటారు కానీ దేశ రాజకీయాలు ఎలా ఉన్నాయి?’’
‘‘ముఖ్యమంత్రులకు దిష్టి తీయాలి?’’
‘‘ఈ నగరానికేమైంది అనే ప్రకటన గుర్తుకు వచ్చి, ఈ ముఖ్యమంత్రులకేమైంది అనిపిస్తోంది?’’
‘‘ఔను ఏమైంది? అన్నింటికీ నేనే అనే ముఖ్యమంత్రి ఏకంగా తాను పుట్టక ముందు స్వాతంత్య్ర పోరాటం చేసి బ్రిటీష్ వారిని గడగడలాడించానని సెలవిచ్చారు. ఆ మధ్య పోతనతో రామాయణం రాయించారు.’’
‘‘గంటల తరబడి మాట్లాడినప్పుడు మాట జారదా? దానికి ఇన్ని జోకులా?’’
‘‘అన్నింటికీ నేనే అంటారు కాబట్టి మాట జారడం కాదు.. సీరియస్‌గానే చెప్పారేమో అని అనుమానం. ఏంటీ అలా గోళ్లు గిల్లుకుంటున్నావ్! గోళ్లు పెరిగితే త్రిపుర ప్రభుత్వాన్ని విమర్శించు’’
‘‘ఎందుకు?’’
‘‘పుండు గోక్కుంటే ఎంత హాయిగా ఉంటుందో, పెరిగిన మన గోళ్లను ఎవరైనా తీస్తే అంత హాయిగా ఉంటుంది. తమ ప్రభుత్వాన్ని విమర్శిస్తే గోళ్లు తీసేస్తామని త్రిపుర సిఎం బంపర్ ఆఫర్ ఇచ్చాడట. పత్రికల్లో చూశాను.’’
‘‘గోళ్లు పెరిగిన వారంతా ఒకేసారి త్రిపుర పాలకుడ్ని విమర్శిస్తే సరి.. గోళ్లు పీకే ఉచితసేవ అందుకోవచ్చు’’
‘‘అంటే త్రిపుర పాలకుడి పాలనాకాలం అంతా గోళ్లు పీకడంతోనే గడచిపోతుందేమో?’’
‘గోళ్లు గిల్లుకోవడం కన్నా గోళ్లు పీకడం బెటర్ కదా! గుడ్డికన్నా మెల్ల మేలు అన్నట్టు’’
‘‘అది సరే.. బ్రిటిష్‌వారితో పోరాడి వారిని గడగడలాడించిన జాతి మా  పార్టీ అని ఆయన గారన్నారట.. మేధావులు ఊరికే అనరు.. ఆ మాటల వెనుక ఉద్దేశం ఏమై ఉంటుంది?’’
‘‘ఆయన అన్నదాంట్లో తప్పేముంది? ప్రతి మాటా అక్షర సత్యం. చినబాబు ఇప్పుడిప్పుడే తెలుగు అక్షరాలు నేర్చుకుంటున్నాడు. చినబాబు తప్పు మాట్లాడితే అర్థం చేసుకోవచ్చు కానీ పెదబాబు కూడా...’’
‘‘చినబాబును నువ్వు తక్కువగా అంచనా వేస్తున్నావు. పెద్ద ఎన్టీఆర్ రాజకీయాల్లో ఉన్నపుడు ఢిల్లీలో చక్రం తిప్పడానికి హిందీ నేర్చుకునే ప్రయత్నం చేశారు. ఆయనకు హిందీ రాలేదు కానీ హిందీ నేర్పించే ప్రయత్నం చేసిన యార్లగడ్డ ఢిల్లీలో ఓ మోస్తరు చక్రం తిప్పే స్థాయికి ఎదిగారు . ఉమ్మడి రాష్ట్రంలో మైనారిటీ ల మనసు దోచేందుకు   పెదబాబు ఉర్దూ నేర్చుకునే ప్రయత్నం చేసినా సాధ్యం కాలేదు. ఆయనకు  ఉర్దూ రాలేదు. ఉర్దూ నేర్పే ప్రయత్నం చేసినాయన ఉర్దూ మరచిపోలేదు. రాష్ట్ర విభజనతో ఉర్దూ అవసరం లేకుండా పోయింది. ఇప్పుడు చినబాబు ఖర్చుకు వెనుకాడకుండా తెలుగు నేర్చుకుంటుంటే అభినందించాల్సింది పోయి విమర్శలా?’’
‘అదిసరే.. మా పార్టీ స్వాతంత్య్రం కోసం పోరాడిందని ఎందుకన్నాడంటావ్?’’
‘‘కవి హృదయం అర్థం చేసుకోవాలి.. మన దేశ స్వాతంత్య్రం కోసం జరిగిన పోరాటానికి నాయకత్వం వహించిన పార్టీ ఏది?’’
‘‘కాంగ్రెస్ పార్టీ..’’
‘‘మరి ఆయన చెప్పింది  
అదే కదా! ఈరోజు దేశంలో ఉన్న అన్ని పార్టీలకూ మాతృసంస్థ కాంగ్రెస్ కదా.. అంటే దేశం కోసం పోరాడి స్వాతంత్య్రం తెచ్చామని గర్వంగా ప్రకటించే హక్కు అన్ని పార్టీలకూ ఉంది. నదులన్నీ సముద్రం లో కలిసినట్టు పార్టీలన్నీ కాంగ్రెస్ నుంచి పుట్టినవే ..  అన్ని పార్టీలూ ఆ తానుముక్కలే అని నిజాయితీగా చెప్పినందుకు అభినందించాలి.’’
‘‘ఏంటో... నారదుడికి గూగుల్ కన్నా ఎక్కువ తెలుసు అని ఒక సీఎం, స్వాతంత్య్రం వచ్చాక పుట్టినా స్వాతంత్య్రం కోసం పోరాడింది తమ పార్టీయేనని మరో సీఎం.. మహాభారత కాలంలోనే ఇంటర్నెట్ ఉందని మరో మేధావి అనడం.. పాలకుల ప్రకటనలు వింటుంటే ఏదో తికమకగా ఉం ది’’
‘‘ వ్యవసాయం దండగ అంటే తప్పు పట్టారు ఇప్పుడొకాయన ఉద్యోగం కోసం ఎదురు చూడడం దండగ వ్యవసాయం చేసుకోండి అంటే తప్పు పడుతున్నారు .. పాపం పాలకులు ఏం మాట్లాడినా తప్పేనా ? ’’
‘‘చూడోయ్.. దేశంలో సమస్యలు ఎప్పుడూ ఉంటాయి.. మొఘలుల కాలంలో, బ్రిటీష్ వారి హ యాంలో సమస్యలున్నాయి.. నెహ్రూ పాలనలో ఉన్నా యి.. ఇప్పుడూ ఉన్నాయి.. భవిష్యత్‌లోనూ ఉంటాయి... ఇంతటి సమస్యల్లోనూ మనం హాయిగా  నవ్వుకునేలా ప్రకటనలు చేస్తున్న పాలకులను మన పాలిట వరంలా భావించాలి’’
‘‘అంతేలే.. సమస్యల సుడిగుండంలో కొట్టుకుపోకుం డా హాయిగా నవ్విస్తున్నారు నేటి పాలకులు తమ ప్రకటనలతో...’’ *
-- బుద్ధా మురళి (జనాంతికం 4-5-2018)

25, ఏప్రిల్ 2018, బుధవారం

వారికీ మనకూ తేడా అదే..!వారెన్ బఫెట్

‘‘అబ్బాయికి ఐటి కంపెనీలో జాబ్ వచ్చింది. ఉద్యోగంలో చేరి రెండు నెలలు అవుతోంది. ప్రారంభ జీతమే నెలకు 60 వేలు. మొనే్న కొత్త కారు కొన్నాం పది లక్షలు. నెల నెలా కిస్తు చెల్లించాలి. పోతే పోయింది. పిల్లల సంతోషం కన్నా మనకింకేం కావాలి?’’
***
హైటెక్ సిటీలో ఉద్యోగమాయె. వాడి స్థాయికి తగ్గట్టు ఇల్లు ఉండాలి కదా? అందుకే మాదాపూర్‌లో కోటి రూపాయల ఫ్లాట్ కొన్నాం. అబ్బాయి ముచ్చట పడ్డాడని కొన్నాను. వాడి జీతం మొత్తం ఇఐంఐలకు పోతోంది. నా జీతంతో ఇల్లు గడుస్తోంది. పిల్లలు కళ్ల ముందు ఎదుగుతుంటే ఇంత కన్నా సంతోషం ఏముంటుంది?’’
***
‘‘మంచి ఉద్యోగం కావడంతో మంచి సంబంధాలు వచ్చాయి. పోతే పోయింది కానీ పెళ్లి ఆర్భాటంగా చేశాం. అప్పు ఇప్పుడు కాకపోతే రేపు తీరుస్తాం కానీ జీవితంలో పెళ్లి ఒకేసారి కానీ మళ్లీ మళ్లీ రాదు కదా? నేనైతే మా పిల్లల మాట ఎప్పుడూ కాదనను. బర్త్‌డేనే ఆర్భాటంగా చేసే నేను పెళ్లి ఖర్చుకు వెనకాడుతానా? ’’
***
కొంచెం అటూ ఇటూగా మధ్య తరగతి కుటుంబరావుల ఇళ్లల్లో ఇలాంటి మాటలే వినిపిస్తాయి. అప్పు చేసైనా ఆనందం అనుభవించాలి.. నా డబ్బు, నా ఇష్టం.. నా అప్పు నేను కట్టుకుంటాను మధ్యలో మీ సలహా ఏంటి? అనే మాట కూడా వినిపించవచ్చు ఎవరైనా సలహాలు ఇవ్వాలని ప్రయత్నిస్తే... కానీ జీవితంలో ఉన్నత స్థాయికి చేరుకున్న వారి అలవాట్లను పరిశీలిస్తే మనకు చిత్రంగా అనిపించవచ్చు. కాళ్లు కడిగినప్పుడే కాపురం చేసే తీరు తెలుస్తుంది. అన్నట్టు చిన్న చిన్న అలవాట్లలోనే ఆ పెద్దవారి ఎదుగుదల కనిపిస్తుంది.
రిటైర్ అయ్యేనాటికైనా సొంత ఇల్లు సమకూర్చుకుంటే అదే మనం సాధించిన ఘన విజయంగా చాలా మంది భావిస్తారు. ఇంటి విలువే జీవితంలో తాను సంపాదించిన ఆస్తి చాలా మందికి. మహానగరంలో ఒక సొంత ఇల్లు ఉంది అంటే- కొంచెం అటూ ఇటూగా అర కోటీశ్వరుడన్న మాట.
స్టాక్ మార్కెట్ గురించి తెలిసిన వారు వారెన్ బఫెట్ పేరు వినకుండా ఉండరు. ఇనె్వస్ట్‌మెంట్ గురువుగా ప్రపంచంలో కోట్లాది మంది ఆయన్ని ఆరాధిస్తారు. ప్రపంచంలో పది మంది సంపన్నుల జాబితాలో తప్పని సరిగా కనిపించే వారెన్ బఫెట్ ఇంటి ఖరీదు ఈ లెక్కన ఎంత ఉండాలి? మన ఆస్తిలో వంద శాతం ఇంటి విలువే అయితే ఈ అంకెను తలకిందులుగా తిప్పితే ఎంత అవుతుందో బఫెట్ ఇంటి విలువ సరిగ్గా అంతే. ఆయన ఆస్తిలో 001% మాత్రమే ఆయన ఇంటి విలువ. నెబ్రస్‌కాలోని 1958లో 31,500 డాలర్లకు కొనుగోలు చేశారు. ఐదు పడక గదులున్న ఈ ఇంటినే బఫెట్ అంటిపెట్టుకుని ఉన్నారు. ప్రపంచంలో కెల్లా సంపన్నుడిగా మారినా, ఇంటిని మాత్రం మార్చలేదు. ఇప్పుడు దాని విలువ 250,000 డాలర్లు. తాను పెట్టిన పెట్టుబడుల్లో మూడవ అత్యున్నతమైన పెట్టుబడి ఈ ఇల్లే అంటారాయన నవ్వుతూ. స్టాక్ మార్కెట్‌లో పెట్టుబడులు పెట్టే వారికి, డబ్బుకు సంబంధించి ఆయన చెప్పిన మాటలు ఇనె్వస్టర్లకు ఉపనిషత్తు సూక్తుల వంటివి. సంపన్నులు పైలోకం నుంచి ఊడిపడరు. వాళ్లు కూడా మొదట్లో సామాన్యులే. వారి అలవాట్లు, ఆలోచనలే వారిని సంపన్నులుగా మారుస్తాయి.
గంటకో సిగరెట్, రోజుకో ప్యాకెట్ సిగరెట్లు తాగడం ద్వారా ఒక్కో దమ్ముకు బోలెడు సంతోషం కలుగుతుంది. ఇది అప్పటికప్పుడు కనిపించే కిక్కు. కానీ పొగ తాగడం వల్ల రోజుకు ప్యాకెట్, నెలకు 30 ప్యాకెట్లు లెక్క పెడితే డబ్బు, ఆరోగ్యం ఎంత పాడు చేసుకుంటున్నామో చేతిలో చిల్లి గవ్వ లేనప్పుడు ఊపిరి తిత్తులు రిపేరింగ్‌కు వచ్చి ఆస్పత్రిలో బెడ్ మీద ఉన్నప్పుడు లెక్కిస్తే అలాంటి అలవాట్లు ఉన్నవారికి వారి మీద వారికే కోపం వస్తుంది. ఓ రెండు దశాబ్దాల పాటు పీల్చిన సిగరెట్లు గుండెలకు తూట్లు పొడుస్తుంది. అదే డబ్బును రెండు దశాబ్దాల పాటు ఇనె్వస్ట్ చేస్తే రిటైర్‌మెంట్ జీవితం ప్రశాంతంగా గడిచేట్టు చేస్తుంది.
అప్పు దేని కోసం చేస్తున్నామనేదే ముఖ్యం. అలవాట్లు, ఆడంబరాలకు అప్పులు చేసి రోడ్డున పడే జీవితాలు ఎన్నో కనిపిస్తాయి. సంపన్నుల జీవితాలను గమనిస్తే ఇలాంటి చిన్న చిన్నవే వారిని ఎక్కడికో ఏ విధంగా తీసుకు వెళుతుందో అర్థమవుతుంది. వారెన్ బఫెట్‌కు ఉన్న సంపదతో విశాలమైన భవనాలు నిర్మించుకోవచ్చు కానీ ఇప్పుడున్న ప్రాంతంలో సంతోషంగా ఉండగలుగుతున్నప్పుడు మరో చోటకు వెళ్లి సంతోషం వెతుక్కోవలసిన అవసరం ఏముంది? అంటాడతను. చివరు బఫెట్ వాడే కారు సైతం ఇలాంటిదే. ఆయన తలుచుకుంటే కారు కాదు ఏకంగా కార్ల కంపెనీని కొనగలరు. లాభసాటి అనుకుంటే కార్ల కంపెనీ కొంటారు. కార్ల కంపెనీల షేర్లు కొంటారు. కారు మార్చరు. 2014లో క్యాడిలాక్ కారును 45వేలకు కొనుగోలు చేశారు. అంతకు ముందే ఇదే కంపెనీ 2006 మోడల్ కారు ఉండేది. ఈ కారులో వెళుతుంటే ఇబ్బందిగా ఉందని కుమార్తె చెబుతుంది. ఏడాదికి 3500 కిలో మీటర్లకు మించి తిరగను, తరుచుగా కార్లు మార్చాల్సిన అవసరం ఏముంది అంటారాయన. బ్రేక్‌ఫాస్ట్‌కు 3.17 డాలర్లకు మించి ఎప్పుడూ ఖర్చు చేయనంటారు.
మరీ ఇంత పిసినారా? నాకే గనుక అంత ఆస్తి ఉంటే పెద్ద భవనంలో రాజభోగాలు అనుభవించే వాణ్ణి. విలాస వంతమైన కార్లలో తిరిగే వాణ్ణి అని చాలా మంది అనుకుంటారు. ఆలోచనల్లో ఇలాంటి తేడానే ఒకరిని పేదవారిగా నిలిపితే , మరొకరిని సంపన్నుడిగా మారుస్తుంది. ఎవరో అన్నట్టు పేదవాడిగా పుట్టడం తప్పు కాదు. పేదవాడిగానే ఉండిపోవడం తప్పు. చిత్రంగా మన దేశంలో రాజకీయాలు కూడా పేదరికాన్ని గ్లామరైజ్ చేసేశాయి. ఇప్పుడు ప్రపంచంలో ఉన్న సంపన్నులు పేద, మధ్యతరగతి లో పుట్టిన సామాన్యులే తమ ఆలోచనలతో అవకాశాలు అందిపుచ్చుకుని సంపన్నులు అయ్యారు. మన భవిష్యత్తును మన ఆలోచనలే నిర్ణయిస్తాయి.
-బి.మురళి(Published Sunday, 22 April 2018 భూమి )

20, ఏప్రిల్ 2018, శుక్రవారం

అసలేం జరుగుతోంది..?

అసలేం జరుగుతోంది..?
ఇంతకీ ఏం జరుగుతోంది..?’’
‘‘శ్రీరెడ్డి పేరు శ్రీ శక్తిగా మారింది.బ్లాక్ అండ్ వైట్ కాలం నాటి సినిమాల్లో త్యాగ మయ హీరో తప్పులన్నీ తనపై వేసుకొని రాజు వయ్యా మహ రాజు వయ్యాఅని పించుకొన్నట్టు వర్మ శ్రీ తప్పులను తనపై వేసుకొన్నాడు . వర్మకు ఇది కొత్త పాత్రే 
 . దేశంలో ఇరవై నిమిషాలకో అత్యాచారం జరుగుతోందని తేలింది. ప్రధాని దీక్షను తీవ్రంగా విమర్శించిన ముఖ్యమంత్రి ఈనెల 20న ‘హోదా’ కోసం దీక్ష చేస్తానని ప్రకటించారు. దీక్షకు కోట్ల రూపాయల ఖర్చుతో అదిరిపోయే ఏర్పాట్లు .ఫెడరల్ ఫ్రంట్‌లో కలిసేది లేదని సిపిఎం నేత తమ్మినేని ప్రకటించారు’’

‘‘తమ్మినేని పార్టీ ఇంకా ఉందా? ఉంటే ఎక్కడ..?’’
‘‘దేశమంటే రెండు తెలుగు రాష్ట్రాలేనా? ’’
‘‘సర్లే.. కమ్యూనిస్టులు కలవకపోయినా- ఒక్క సీటు గెలవక పోయినా , వాళ్లే ప్రధానమంత్రి అయితే సంతోషమే! మంగళగిరి సీటు కోసమే ఈ మహోద్యమం అని గిట్టని వాళ్లు విమర్శిస్తున్నారు. నేను ఎన్నో విశేషాలు చెబితే, తమ్మినేని గురించే అడిగావంటే ఆయనంటే నీకెంత అభిమానమో తెలుస్తునే ఉంది.’’
‘‘ఐతే- ఇప్పుడు శ్రీ శక్తి గురించి మాట్లాడనా మరి.. వద్దులే.. చట్టాన్ని ఆశ్రయించాలని పవన్ కల్యాణ్ చెప్పినందుకే నానా బూతులు తిడుతోంది.. ఆమె సంగతి మనకెందుకులే... ఆ చానల్స్ గంటల తరబడి.. రోజుల తరబడి చూపిస్తున్నా, చర్చిస్తున్నా ఇప్పటికీ నాకు విషయం అర్థం కాలేదు. టీవీ చర్చల్లో మొదటి రోజు ఆమె తెలుగు సినిమాల్లో తెలుగు వారికి అవకాశం ఇవ్వాలని కోరింది. ఒక సినిమా ఆయన ఫోన్ చేసి అవకాశం ఇస్తానన్నాడు. వ్యవహారం ఎటు నుంచి ఎటు పోయిందో.. ఆమెను మహోద్యమ నాయకురాలిగా ప్రకటించేశారు. ఇలా ఎలా అయిందని ఎవరినైనా అడుగుదామంటే నేనెంత అజ్ఞానంలో ఉన్నానో అందరికీ తెలిసిపోతుందని అడగలేదు. ఈ పాపులారిటీతో ఆమె రెండు రాష్ట్రాల్లో జాతీయ పార్టీని ఏర్పాటు చేస్తే ఎన్నికల్లో నిలబడేట్టుగానే ఉంది. పది మంది అనుచరులు లేని వాళ్లు కూడా పార్టీ పెట్టేస్తుండగా, ఆమె పెడితే కొత్తగా పోయేదేముంది?’’
‘‘రాఖీ సావంత్ ఆ మధ్య పార్టీ పెట్టింది. ఏమైందో తెలియదు. పద్మనాభం హీరోగా వచ్చిన జాతకరత్న మిడతం భొ ట్లు సినిమా చూశావా? మిడతం భొట్లు తన నోటికి వచ్చింది ఏదో అనేస్తాడు. అవే జరుగుతాయి. అంతా అతడ్ని కా లజ్ఞానిగా కీర్తిస్తారు. కాలం కలిసొస్తే శ్రీరెడ్డి కాస్తా స్ర్తిశక్తిగా మా రుతుంది. ’’
‘‘అర్థం కాలేదు..’’
‘‘కొన్ని విషయాలు అర్థం అయి కాకుండా ఉంటేనే బాగుంటుంది. జ్యోతిలక్ష్మి డ్యాన్స్‌లా?’’
‘‘ఒకదానికొకటి అస్సలు సంబంధం లేదు కదా? ’’
‘‘ఉందనుకుంటే ఉంది.. లేదనుకుంటే లేదు.’’
‘‘ఏమడిగినా సినిమాలనే ఉదహరిస్తావెందుకు?’’
‘‘సినిమాలు, జీవితం వేరు కాదు.. పాలలో నీళ్లలా ఒకదానిలో ఒకటి కలిసిపోయాయని నమ్ముతాను కాబట్టి’’
‘ఈ వివాదాలు ఎందుకు కానీ.. ఎల్లుండి ఢిల్లీలో మా అబ్బాయి గృహ ప్రవేశం.. నువ్వు వస్తావా?’’
‘‘మీ వాడు తొందరపడి ఢిల్లీలో ఇల్లు కట్టాడు.’’
‘ఢిల్లీ కొచ్చిన ముప్పేముంది? వద్దంటున్నావు’’
‘ 
‘ఢిల్లీ భస్మం అయినప్పుడు అందులో ఉన్న మీ వాడి ఇల్లు కూడా బూడిద అవుతుంది.’’
‘‘1999లో, 2012లో యుగాంతం జరిగిపోతుందని వి న్నాం. 2018లో యుగాంతం అని కొత్తగా ప్రచారం ఏదైనా ప్రారంభం అయిందా? ’’
‘‘నీవేం మిస్సవుతున్నావో నీకే అర్థం కావడం లేదు. హైదరాబాద్ పత్రికల్లో చదివితే నీకేముందని? తెలంగాణకు వరప్రసాదం కాళేశ్వరం, రైతులకు వ్యవసాయ పెట్టుబడి.. వంటి చప్పటి వార్తలే తప్ప. మసాలా ఉన్న గొప్ప వార్తలు మి స్సవుతున్నావు.’’
‘ఢిల్లీలో శివప్రసాద్ వేషాలతో పాటు అన్నీ చూసి తరించాను. మరింకేం మిస్సయ్యాను.?
‘‘మూడోకన్ను తెరిస్తే ఢిల్లీలో ప్రభుత్వం భస్మం అవుతుందని నందమూరి బాలకృష్ణ అనంతపూర్‌లో చెప్పిన వార్త హైదరాబాద్‌లో వచ్చిందా? ’’
‘‘రాలేదు..’’
‘‘తెలుగువారు ఒక్కసారి తొడకొట్టి ఢిల్లీకి వినిపించాలని పిలుపు ఇచ్చారు. నువ్వు విన్నావా? ’’
‘‘నిజమా? నాకు తెలియదు.. బహుశా ఆయన పిలుపు అమరావతి ఎడిషన్ దాటి పోలేదేమో .. పోయి ఉంటే నిజంగా ఒక్కసారి తెలుగు వారంతా తొడ కొడితే ఢిల్లీ ప్రభుత్వం గజగజ వణికిపోకుండా ఉంటుందా? ’’
‘‘వ్యంగ్యమా..?’’
‘‘కంటిచూపుతో ఆయన రైలును వెనక్కినడిచేట్టు చేశాడు. ఈ రోజే టీవీలో చూశా.. అదేదో సినిమాలో పాతికమంది ఆడవిలన్లతో త్రిష బాలకృష్ణపై దాడికి వస్తుంది. ఏం జరుగుతుందా? అని ఉత్కంఠ.. పాతికమంది ఆడపులుల్లా మీదకు వస్తుంటే ధైర్యంగా ఉన్న బాలకృష్ణ..’’
‘‘ఆ.. ఆ అప్పుడేమవుతుంది?’’
‘‘నేను కూడా ఇలానే ఏమవుతుందా? అని ఉత్కంఠగా చూశాను. అమ్మాయిలు అడుగులో అడుగేసుకుంటూ పైపైకి వస్తుంటే జేబులో చెయ్యి పెట్టిన బాలకృష్ణ..’’
‘‘గన్ తీశాడా..?’’
‘‘అంతకన్నా శక్తివంతమైన ఆయుధం’’
‘‘ఎకె 47?’’
‘‘అది జేబులో పట్టదు. 
జేబులో నుంచి బాడీ స్ప్రే తీసి తనపై కొట్టుకున్నాడు. అంతే.. చీల్చి చెండాడానికి వచ్చిన ఆ పాతిక మంది అమ్మాయిలు ఆ వాసనకు.. అదే ఫర్మ్యూమ్ సువాసనకు ఆయనపై పడిపోతే పాపం.. త్రిష వాళ్లను పక్కకు లాగలేక నానా తంటాలు పడింది.’’
‘‘మేగ్నట్‌కు ఇనుము అతుక్కు పోయినట్టు, పాతిక రూపాయల బాడీ స్ప్రేకు పాతికమంది అతుక్కు పోతారని బాలయ్య బాబు ద్వారా- ఆ సినిమా సభ్యసమాజానికి గొప్ప సందేశం ఇచ్చింది.’’
‘‘ఎన్టీఆర్, బాలయ్య బాబులను మించి సాహసాలు చేసిన హరికృష్ణ టాలెంట్‌ను తొక్కేస్తున్నారు. ’’
‘‘వీరిని మించిన టాలెంట్..? నేను నమ్మను..’’
‘‘ఇద్దరు ఎన్టీఆర్‌లు, బాలకృష్ణల వరకు ఏం చేశారు- మహా అయితే పులిని, సింహాన్ని చంపేశారు, సుమోలను గాలిలోకి లేపారు. అంతే కదా? కానీ హరికృష్ణ సింహాన్ని చిత్తుగా ఓడించి కాడికట్టి పొలం దున్నించాడు.’’
‘‘ఆ..’’
‘‘విజయరామరాజు సినిమాలోనట.. టీవీలో ఆ దృశ్యం వస్తే చూశా. ఇంతటి టాలెంట్ వల్ల తనకు ఎప్పటికైనా ప్రమాదం అని తెలిసే కావచ్చు హరిని పక్కన పెట్టారు. ’’
‘‘మన చర్చ దారి తప్పుతుందేమో?’’
‘‘ఎలా?’’
‘‘సినిమా వేరు, వాస్తవం వేరు. రాజకీయ పరిణామాలు అనే సీరియస్ విషయాలను నువ్వు సినిమాలతో కలిపి మాట్లాడుతున్నావ్’’
‘‘్ఢల్లీ భస్మం చేయడం గురించి బాలయ్య బాబు చెప్పి న డైలాగు సినిమాలో కాదు అనంతపురం సభలో.. ఆ డైలాగు విని జనం కేరింతలు కొట్టారు. ప్రత్యేక హోదా ఇచ్చేస్తాం అని మోదీ ప్రకటించినా అంతటి చప్పట్లు వినపడవేమో! సినిమా, వాస్తవం కలిసిపోయి చాలాకాలం అయింది. రెండు గంటల్లో సినిమా ముగుస్తుంది. రాజకీయ సినిమా ఏళ్ల తరబడి సాగుతుంది. ఎన్నికల ఏడాదిలో రాజకీయ సినిమా మలుపులతో ఉర్రూతలూగిస్తుంది.’’
‘‘ఎంత గొప్ప సినిమా ఐనా రెండు గంటల తరువాత థియేటర్ నుంచి బయటకు రావాలి. రాకపోతే జీవితం ఉండదు. ’’ *

బుద్దా  మురళి (జనాంతికం 20.4.2018)

16, ఏప్రిల్ 2018, సోమవారం

విలువలకే ప్రాధాన్యం





డబ్బుకు మనం విలువ ఇస్తే- అది మనకు విలువ ఇస్తుంది. మనం నిర్లక్ష్యం వహిస్తే ధనం తానేంటో చూపిస్తుంది. అసామాన్య విజయాలు సాధించిన కొందరి జీవిత అలవాట్లను తెలుసుకుంటే మనపై వారి ప్రభావం ఎంతో కొంత ఉంటుంది.
చేతిలో చిల్లిగవ్వ లేని హీరో అందమైన అమ్మాయిని ప్రేమిస్తాడు. ‘డబ్బు లేని నువ్వు అమ్మాయిని పెళ్లి చేసుకుని ఎలా పోషిస్తావ’ని తండ్రి ప్రశ్నిస్తే- ‘మిస్టర్ కుటుంబరావ్.. డబ్బు సంపాదించడం పెద్ద కష్టం కాదు. ఆరునెలల్లో నీ కన్నా ఎక్కువ సంపాదించి చూపిస్తాను’ అని ఏమీ లేని బికారి హీరో కోటీశ్వరుడైన హీరోయిన్ తండ్రిని చాలెంజ్ చేసి, తాను ముందుగా చెప్పినట్టుగానే ధనం సంపాదించి హీరోయిన్‌ను పెళ్లి చేసుకుంటాడు. ఇది సినిమా కథ. ఇలాంటివి సినిమాల్లోనే సాధ్యం అవుతాయి కానీ నిజజీవితంలో అలా ఉండదు. జీవితంపై ఎలాంటి అవగాహన లేకుండా ఆవారాగా తిరిగే హీరో సినిమాలో కోటీశ్వరుడు అవుతాడేమో కానీ నిజ జీవితంలో అలా జరగదు.
మనం నడిచే దారే మన భవిష్యత్తును నిర్ణయిస్తుంది. ఇన్ఫోసిస్ సుధామూర్తి ప్రేమ- జీవితం సినిమా కథ లాంటిదే. ఐతే సినిమాలో హీరో చాలెంజ్ చేసి సంపాదించి హీరోయిన్‌ను పెళ్లి చేసుకుంటాడు. కానీ సుధామూర్తి దంపతులు సామాన్యులుగా ఉన్నప్పుడే పెళ్లి చేసుకుని, తమ జీవిత విధానం ద్వారా సంపన్నులు అయ్యారు. ఎంతటి సంపన్నులు అంటే వాళ్ల కంపెనీలో ఓ పదివేల రూపాయలు పెట్టుబడి పెట్టిన వారు కేవలం పదేళ్లలో కోటీశ్వరులు అయ్యారు. వేల కోట్ల ఆస్తి ఉన్న ఆ దంపతులను చూస్తుంటే- మధ్యతరగతి కుటుంబీకుల్లా కనిపిస్తారు. అలా కనిపించడమే కాదు, వారి జీవిత విధానం కూడా అలానే ఉంటుంది.
సుధామూర్తి ఇచ్చిన పదివేల రూపాయల పెట్టుబడితో నారాయణమూర్తి ‘ఇన్ఫోసిస్’ సంస్థను ప్రారంభించి అంతర్జాతీయంగా ఖ్యాతి గడించారు. ఒకరు ఇంటి బాధ్యత, ఇంకొకరు కంపెనీ బాధ్యత పంచుకుని జీవితంలో ఊహించని స్థాయికి ఎదిగారు.
ఖరీదైన చీర కొనుక్కోవడానికి కూడా ఇష్టపడిన సుధామూర్తి ఇంట్లో సుమారు 20 వేల పుస్తకాలున్నాయి. ఇంటి కోసం కొనడమే కాదు, కర్నాటకలో దాదాపు 60వేల గ్రంథాలయాలకు ఈ దంపతులు ఉచితంగా పుస్తకాలు అందజేశారు. వీరి పెళ్లి ఖర్చు కేవలం ఎనిమిది వందల రూపాయలు. ఆ ఖర్చును చెరి సగం భరించామని సుధామూర్తి నవ్వుతూ చెబుతుంటారు.
అసామాన్య విజయాలు సాధించిన వారు ఎలాంటి ప్రత్యేకతలు కలిగి ఉండరు. అందరిలానే వీరికీ రోజుకు ఇరవై నాలుగు గంటలే ఉంటాయి. అందరిలానే రెండు చేతులు, రెండుకాళ్లే ఉంటాయి. కానీ 24 గంటలూ సమయాన్ని సద్వినియోగం చేసుకుంటారు. ఆలోచనలే మనిషిని ఉన్నత స్థాయికైనా, పతనానికైనా తీసుకువెళతాయి. మనం ఎలాంటి ఆలోచనలతో వెళుతున్నామనేదే మన భవిష్యత్తును నిర్ణయిస్తుంది.
సినిమా రంగంలో అత్యున్నత స్థానం నుంచి అధఃపాతాళానికి పడిపోయిన ఎందరో మహానుభావుల గురించి మనకు తెలుసు. దీనికి భిన్నంగా ఒక సామాన్యురాలు అత్యున్నత స్థాయికి చేరుకున్న సుధామూర్తి ఎందరికో స్ఫూర్తిదాతగా నిలిచారు.
ఆడవారి షాపింగ్ మీద ఉన్నన్ని జోకులు మరే అంశంపై ఉండవేమో! గంటల తరబడి మహిళలు షాపింగ్‌లో కాలం గడుపుతారనే పేరు. వారు అలంకరణకు ప్రాధాన్యత ఇవ్వడం సాధారణమే. కొన్ని వేల కోట్ల రూపాయల ఆస్తి ఉన్న మహిళ షాపింగ్‌కు వెళితే ఎలా ఉంటుందో అని మనం ఏవేవో ఊహించుకుంటాం. కానీ, ‘ఇన్ఫోసిస్’ నారాయణ మూర్తి భార్య, ఇన్ఫోసిస్ ఫౌండేషన్ చైర్‌పర్సన్ సుధామూర్తి గత 20 ఏళ్ల నుంచి కనీసం ఒక చీర కూడా కొనలేదు. పుణ్యక్షేత్రమైన కాశీకి వెళ్లిన వారు తమకు ఇష్టం అయిన ఏదో ఒక దాన్ని అక్కడ వదిలేయడం సంప్రదాయం. ఎక్కువ మంది తమకు నచ్చిన ఆహార పదార్థాన్ని వదిలేస్తారు. సుధామూర్తి మాత్రం షాపింగ్ అలవాటును వదిలేశారు. అప్పటి నుంచి కొత్తగా చీరలేమీ కొనలేదు.
‘అక్రమాల ద్వారానే డబ్బు సంపాదిస్తారనే ఆలోచన తప్పు. ధర్మ బద్ధంగా కూడా ధనం సంపాదించవచ్చు’ అని ఇన్ఫోసిస్‌ను ప్రారంభించినప్పుడు తన మిత్రులను ఉద్దేశించి నారాయణమూర్తి చెప్పిన మాట. చెప్పడమే కాదు, ఆయన ఆచరణలో చూపించారు. విలువలకు కట్టుబడిన ‘ఇన్ఫోసిస్’ సంస్థ ఐటి రంగంలో ప్రపంచంలోనే అత్యుత్తమ సంస్థగా నిలిచింది.
భార్యాభర్తల మధ్య ఉండాల్సింది ‘ఇగో’ల పోరాటం కాదు. ఒకరికొకరు చేయుతనివ్వడం. సుధామూర్తి వల్లనే తాను విజయం సాధించానని, తన విజయంలో ఆమెదే ముఖ్యపాత్ర అని నారాయణమూర్తి చెబుతారు. విచ్చలవిడిగా ధనం ఖర్చు చేసి, ఖరీదైన కార్లలో తిరగడమే సంపన్నత కాదు. వందల కోట్ల ఆస్తి ఉన్నా సామాన్యుల్లానే జీవిస్తూ, తాము సంపాదించిన డబ్బుతో సేవా కార్యక్రమాలు నిర్వహిస్తూ సంపూర్ణ జీవితం గడుపుతున్న సుధామూర్తి, నారాయణమూర్తి దంపతుల జీవితం ఆద్భుతం. డబ్బుకు మనం విలువ ఇస్తే అది మనకు విలువ ఇస్తుందని ఈ దంపతుల జీవితాలను చూస్తే ఎవరికైనా అర్థమవుతుంది. ఏ రంగంలోనైనా సకాలంలో అడుగు పెట్టడం ముఖ్యం అంటారు నారాయణ మూర్తి. 1971లోనే ఐటి రంగం అభివృద్ధిని ఊహించి ఆ రంగంలో అడుగు పెట్టడమే కాకుండా ఘన విజయం సాధించి, విలువలతో జీవనం సాగిస్తున్నారు. విలాసాలతో ఎంతో మంది సంపన్నులు బికారులుగా మారిపోయిన ఈ కాలంలో సామాన్యులకే కాదు, సంపన్నులకూ వీరి జీవితం ఆదర్శప్రాయం.
-బి.మురళి

13, ఏప్రిల్ 2018, శుక్రవారం

జైజై.. ఫేక్‌న్యూస్..!

ఏమోయ్.. మీ అన్నయ్య వచ్చాడు.. కాస్త టీ తీసుకురా!’’
‘‘చక్కెర కాస్త ఎక్కువేసి తీసుకురా చె ల్లెమ్మా.. ‘హోదా’ కోసం నా వంతు ఉద్యమం ఇదే. షుగర్ ఉన్నా ఎక్కువ చక్కెర వేసుకుని టీ తాగడం ద్వారా కేంద్రానికి నిరసన తెలుపుతున్నా..’’
‘‘ఇదేదో బాగుందిరోయ్! నిరసనలో భాగంగా సాయంత్రానికి బదులు, ఉదయమే బార్‌కు వెళదామా?’’
‘‘నిరసన ఉద్యమాలు మీ మగాళ్లకేనా? ఆడాళ్లం కూడా వస్తాం. ఏమంటారు అన్నయ్య గారూ.. వదిన ఇంటి దగ్గరే ఉంది కదా?’’
‘‘ఏదో సరదాగా అన్నాను లేవోయ్.. నిజంగా వెళ్లేంత ధైర్యం ఉందా నాకు.. ఐనా ఇదేంటోయ్.. ఇంటర్వెల్ నుంచి సినిమాకు వెళ్లడం, వంద మీటర్ల పాదయాత్ర, పెరుగుకు బదులు మజ్జిగతో అన్నం తినడం, రెగ్యులర్‌గా వెళ్లే బాబాయ్ హోటల్‌కు బదులు అబ్బాయ్ హోటల్‌లో చట్నీ లేకుండా ఇడ్లీ తినడం ఉద్యమమేనా?’’
‘‘ప్రత్యేక హోదా గురించి పార్లమెంటులో అడిగితే జవహర్ లాల్ నెహ్రూ గురించి, స్వాతంత్య్ర పోరాటం గురించి ప్రధాని చెబితే తప్పు లేదు కానీ పప్పు లేకుండా సాంబార్‌తో వడలు తింటూ ఉద్యమిస్తే తప్పా? ఉద్యమం జాతీయ స్థాయి మీడియాను ఆకర్శించడానికి ఆలూ రహిత సమోసాలు తింటూ ఉద్యమిస్తాం’’
‘‘ప్రధాని అంటే గుర్తుకు వచ్చింది. నీకో రహస్యం తెలుసా? బలూచిస్తాన్‌ను ఇండియాలో కలిపేయడానికి 1947లో అక్కడి రాజు ఒప్పందం చేసుకున్న తరువాత కూడా నెహ్రూ వద్దని తిరస్కరించాడు ?’’
‘‘నిజమా..?’’
‘‘అంతేకాదు.. నేపాల్ కూడా ఇండియాలో కలిసి పోతాం అంటే నెహ్రూనే వద్దన్నాడు. శ్రీలంకనూ అలానే తిరస్కరించాడు.. మరో ఆశ్చర్యకరమైన విషయం ఏమంటే 1950లో ఇండియాకు ఐక్యరాజ్యసమితిలో శాశ్వత సభ్యత్వం ఇస్తామని ఆఫర్ ఇస్తే నెహ్రూ వద్దన్నాడు. 1955లో రష్యా ఇలానే ఆఫర్ ఇచ్చినా నెహ్రూ ససేమిరా అన్నాడు.’’
‘‘ఎందుకు వద్దన్నాడు..? కొంపదీసి మోదీ ప్రధాని అయితే ప్రపంచంలోనే అత్యంత శక్తివంతుడవుతాడని- దశాబ్దాల క్రితమే ఊహించి అన్నింటికీ నెహ్రూ వద్దని మోకాలడ్డాడా ఏంటి?’’
‘‘కాదు.. అసలు నెహ్రూ ఈ దేశస్థుడు కాడు. ఇరాన్‌కు చెందిన వాడు.. అందుకే వద్దన్నాడు.’’
‘‘నిజమే కానీ ఇంత ఆశ్చర్యకరమైన విషయాలు ఏ మీడియాలో రాలేదేంటి? అన్ని పార్టీలకూ మీడియా ఉంది కదా? ఎందుకు రాలేదంటావు. ఐనా ఇవన్నీ నీకెలా తెలిశాయి?’’
‘‘అందుకే చెప్పాను వాట్సాప్‌ను రెగ్యులర్‌గా చూడాలని. ఇలాంటి అద్భుతమైన రహస్యాలు ప్రచురించే ధైర్యం మీడియాకు లేదు. వాట్సాప్‌లో పెడతారు. మా వాట్సాప్ గ్రూప్‌లో చేరు.. నీకూ తెలుస్తాయి విశ్వ రహస్యాలు ఎన్నో’’
‘‘నాన్నోయ్ .. మహాత్మా గాంధీ, జవహర్ లాల్ నెహ్రూ అంటే ఎవరు నాన్నా?’’
‘‘ఏరా! లక్షల ఫీజు కట్టి నిన్ను కార్పొరేట్ స్కూల్స్‌లో చేర్పించింది ఇందుకేనా? గాంధీ జీ , నెహ్రూల గురించి తెలుసుకొంటే ఇక ఐఐటీ సీటు నీకేమొస్తుంది .?ఇంకా ఎక్కువగా టైం లేదు. ఇంకో ఆరేళ్లయితే ఐఐటి ఎంట్రెన్స్ టెస్ట్ రాయాలి. టెస్ట్‌కు సిద్ధం కాకుండా టైం వృథా చేస్తున్నావు. ఆరేళ్లంటే ఇలా చూస్తుండగానే వచ్చేస్తుంది. గదిలోకెళ్లి చదువుకో.. ఐనా గాంధీ, నెహ్రూ ఈ పేర్లు నీకెవరు చెప్పార్రా? రేపు మీ స్కూల్‌కు వచ్చి ప్రిన్సిపాల్‌ను- లక్షల్లో ఫీజు చెల్లిస్తే మీరు చెప్పే చదువు ఇదేనా? అని నిలదీస్తాను.. కడిగేస్తాను.’’
‘‘స్కూల్‌లో చెప్పలేదు నాన్నా! టైం వేస్ట్ అని మా టెక్నో స్కూల్‌లో స్వాతంత్య్ర దినోత్సవం, గణతంత్ర దినోత్సవం వంటివి కూడా జరపరు. మా ఫ్రెండ్ టింకూ వాళ్ల నాన్న ఫోన్‌లోని ఆశ్చర్యకరమైన వార్తలు మా అందిరికీ ఫార్వర్డ్ చేశాడు. టింకూ వాళ్ల నాన్న అదేదో పార్టీ ప్రచారం వాట్సాప్ వార్తలు తయారు చేస్తాడు. ఈ వార్తలు మార్కెట్‌లోకి విడుదల కాక ముందే టింకూ మాకు చూపిస్తాడు. మహాత్మా గాంధీ దక్షిణాఫ్రికాలో న్యాయవాదిగా ప్రాక్టిస్ చేసేప్పుడు బ్రిటీష్ వాళ్లు కొన్ని కేసులు ఇచ్చారట! ఆ కృతజ్ఞతతో గాంధీజీ మా దేశానికి స్వాతంత్య్రం వద్దే వద్దు మీ ఇష్టం ఉన్నన్ని రోజులు పాలించుకోండి అని రాసిచ్చాడట! సాక్షి సంతకం నెహ్రూ చేశాడట! ‘అప్పటికి ఇంకా పుట్టని వాళ్ళ ’ పార్టీ వారు ఈ ఘోరాన్ని చూడలేక పోరాటం చేసి స్వాతంత్య్రం తీసుకువచ్చారట! మళ్లీ ఇప్పుడు బ్రిటీష్ వారికే దేశాన్ని అప్పగించే కుట్ర జరుగుతుందట! ఇవన్నీ మాకు వాట్సాప్‌లో వచ్చాయి. అంతేకాదు నాన్నోయ్.. రెండవ ప్రపంచ యుద్ధం తరువాత బ్రీటిష్ సామ్రాజ్యాన్ని ఇండియాలో కలిపేయాలని ఆ దేశ ప్రజలంతా కోరితే.. బ్రిటన్ రాణి అంటే ఉన్న అభిమానంతో నెహ్రూ- ‘మీ దేశాన్ని మీరే పాలించుకోండి మాకు వద్దు’ అన్నాడట! నెహ్రూ చాలా తప్పు చేశాడు కదా నాన్నా.. బ్రిటన్‌ను మన దేశంలో కలిపేస్తే పాస్‌పోర్ట్, వీసా కోసం ఇబ్బంది పడేవాళ్లం కాదు. మీరు చెప్పుకునే వా ట్సాప్ వార్తలన్నీ పాతవి నాన్నా.. టింకూ మాకు కొత్త కొత్త వార్తలు జనానికి చేరకముందే చెబుతాడు. ’’
‘‘ఔన్రా.. ట్రంప్‌కు పాలించడం రావడం లేదు. మీ ‘చినబాబు’ను మా దేశానికి పంపించండి అని అమెరికా ప్రజలు ఏడుస్తూ వేడుకుంటున్నారట! అమెరికా కన్నా సొంత రాష్ట్ర అభివృద్ధి ముఖ్యం అని చినబాబును పంపడం లేదట! ’
‘‘వీళ్ళ ప్రచారం ఇలా ఉంటే ప్రచారం లో ప్రపంచానికి పాఠాలు చెప్పే వాళ్ళు ప్రధాని గుజరాత్ లో ప్రాథమికోన్నత పాఠశాల లో చదివేప్పుడు పక్క వాడి టిఫిన్ బాక్స్ నుంచి డోక్లా ఎత్తుకెళ్లిన దాన్ని కళ్ళకు కట్టినట్టు చూపుతూ ప్రచారం చేస్తున్నారు . ప్రపంచం లోని ప్రతి సమస్యకు ప్రధాని ఏవిధంగా కారకులో  అరటి పండు వలిచి పెట్టినట్టు వివరిస్తున్నారు . ప్రచారం లో సమ ఉజ్జిల మధ్య రసవత్తర మైన పోటీ చూస్తుంటే విఠలాచార్య సినిమాలో కాంతారావు రాజనాల ల మధ్య కత్తి యుద్ధం చూస్తున్నంత రంజుగా ఉంది .  
‘‘ఏమండీ.. ఇవన్నీ నిజమేనా? ’’
‘‘పిచ్చి పార్వతీ.. ఇంతోటి దానికే ఇలా షాకైతే ఎలా? నీకు వడ్డాణం చేయిస్తాను, బంగారు గాజులు చేయిస్తానని పెళ్లప్పుడు మాటిచ్చి ఇప్పటి వరకు ఎందుకు చేయించలేదో తెలుసా? ’’
‘‘డబ్బు లేక..’’
‘‘డబ్బు లేక కాదు.. నెహ్రూ వద్దన్నాడు.. లేకపోతే ఎప్పుడో చేయించేవాణ్ణి. అప్పుడు పక్కనే ఉన్న మహాత్మా గాంధీ కూడా అభ్యంతరం చెప్పలేదు.’’
‘‘గాంధీ ఐతేనేం, నెహ్రూ ఐతే నేం.. మగాళ్లంతా ఇంతే.. భార్యకు బంగారు నగలు చేయించాలంటే వద్దనేవాళ్లే’’
‘‘ఇవన్నీ వింటుంటే పిచ్చెక్కేట్టుగా ఉంది.. ఏది వ్యంగ్యమో, ఏది నిజమో అర్థం కావడం లేదు.’’
‘‘ఐదేళ్ల పాలనలో సాధించినవి చెప్పుకోవడానికి ఏమైనా ఉన్నవాళ్లు ఇదిగో మేం ఇవి సాధించాం తిరిగి అవకాశం ఇవ్వండి అని అడుగుతారు. చెప్పుకోవడానికి ఏమీ లేనప్పుడే.. ఎవరి స్థాయిలో వాళ్లు తాంతియా తోపేదే తప్పంతా అని ఫేక్ న్యూస్‌పై ఆధారపడతారు.’’
*